ކެންސަރާއި ނާރުގެ ބަލިތަކަށް 2 އަހަރުގެ ތެރޭގައި 100 މިލިއަން ރުފިޔާ ޚަރަދުވެފައިވޭ - ހާރޫނު
6 ސެޕްޓެމްބަރު 2021 | ހޯމަ 12:44ތަފާސް ހިސާބުތަކަށް ބަލާއިރު 2018ވަނަ އަހަރު އެކަނިވެސް ކެންސަރު ބައްޔަށް 1،029 މީހުން ފަރުވާ ހޯދާފައިވޭ
އަޙުމަދު ހާރޫނު - ރައްޔިތުންގެ މަޖިލީހުގެ މަނަދޫ ދާއިރާގެ މެމްބަރު
ކެންސަރާއި ނާރުގެ ބަލިތަކަށް 2 އަހަރުގެ ތެރޭގައި 100 މިލިއަން ރުފިޔާ ޚަރަދުވެފައިވާކަމަށް ރައްޔިތުންގެ މަޖިލީހުގެ މަނަދޫ ދާއިރާގެ މެމްބަރު އަޙުމަދު ހާރޫނު ވިދާޅުވެއްޖެއެވެ.
ބޯތަކެތީގެ ރައްކާތެރިކަމުގެ ބިލުގެ ބަހުސް ފެށުމުގެ ގޮތުން މެމްބަރު ވިދާޅުވީ، އާސަންދަ ކުންފުނީގެ ތަފާސް ހިސާބުތަކަށް ބަލާއިރު 2018ވަނަ އަހަރު އެކަނިވެސް ކެންސަރު ބައްޔަށް 1،029 މީހުން ފަރުވާ ހޯދާފައިވާ ކަމަށެވެ. ޖެހިގެން އައި 2019ވަނަ އަހަރު އެއަދަދު 1417ށް އިތުރުވެފައިވާ ކަމަށް ތަފާސް ހިސާބުތަކުން ދައްކާ ކަމަަށެވެ. ހަމައެއާއެކު ނާރުގެ ބަލިތަކަށް 2018ވަނަ އަހަރު 405 މީހުން ރާއްޖެއިން ބޭރުން ފަރުވާ ހޯދާފައިވާިއރު 2019ވަނަ އަހަރު އެއަދަދު 646ށް އިތުރުވެފައިވާ ކަމަށެވެ. މިއީ ގާތްގަނޑަކަށް ސަތޭކަ މިލިއަނެއްހާ ރުފިޔާ ކަމަށް ހާރޫނު ވިދާޅުވިއެވެ.
މެމްބަރު ވިދާޅުވީ، މި ބަލިތަކަކީ އާއްމު ދިރިއުޅުމުގައި ކުރެވޭ ކަންކަމުގެ ސަބަބުން ޖެހޭ ބަލިތައްކަން ޑޮކްޓަރުންވެސް ފާހަގަ ކުރައްވާ ކަމަށާއި، ކާބޯތަކެތީގެ ރައްކާތެރިކަމަކީ މިފަދަ ބަލިތަކުން ރައްކާތެރިވުމަށް މުހިއްމު ދައުރެއް އަދާކުރާ ކަމެއް ކަމަށެވެ.
ގާނޫނުއަސާސީގައި ރަނގަޅު ކާނާއާއި ސާފު ބޯފެން ފުދޭ މިންވަރަކަށް ލިބެންޖެހޭ ކަމަށް އޮތްނަމަވެސް ކާބޯތަކެތީގެ ރައްކާތެރިކަން ކަށަވަރު ކުރުމަށް މިހާތަނަށް ވަކި ގާނޫނެއް ނެތްކަން ހާރޫނު ފާހަގަ ކުރެއްވިއެވެ. ކާބޯތަކެތީގެ ރައްކާތެރިކަމުގެ ބިލަކީ ވަރަށް ރަނގަޅު ކަންތައްތަކެއް ފާހަގަކޮށް ވަރަށް ރަނގަޅަށް ތަރުތީބު ކުރެވިފައިވާ ބިލެއް ކަމަށާއި، ބިލު ގާނޫނަކަށް ވެގެން އަންނަތާ 3 މަސް ތެރޭގައި ގަވައިދުތަކެއް ހަދައި އެއަަށް އަމަލުކުރަން ޖެހޭކަމަށް ހާރޫނު ވިދާޅުވިއެވެ. ކާބޯތަކެތީގެ ރައްކާތެރިކަން ކަށަވަރުކުރުމަށް ކަނޑައަޅާ ކަންކަމުގައި އިހުމާލުވާ މީހުންނަށް އެޅޭނެ ފިޔަވަޅުތައްވެސް ބިލުގައި ބަޔާން ކޮށްފައިވާ ކަމަށް މެމްބަރު ވިދާޅުވިއެވެ.
ކާބޯތަކެތި އުފެއްދުމުގެ މަރުހަލާގައި ރައްކާތެރިކަން ކަށަވަރުކުރުމާއި، ކާބޯތަކެތި އުފައްދައިގެން ވިއްކުމުގައި ހުންނަންޖެހޭ މިންގަނޑުތަކާއި، ކާބޯތަކެތި އުފައްދާ މީހާގެ ހުންނަންޖެހޭ މިންގަނޑުތައް ވެސް މި ބިލުގައި ބަޔާން ކޮށްފައިވެއެވެ.
ދިވެހިރާއްޖެއަށް އިމްޕޯޓުކުރާ ނުވަތަ ދިވެހިރާއްޖެއިން އެކްސްޕޯޓުކުރާ އަދި ދިވެހިރާއްޖޭގައި އުފައްދާ ކާބޯތަކެތި ޓެސްޓުކުރުމަށާއި، ކާބޯތަކެތި އުފައްދާ ތަންތަނާއި، ނުވަތަ ބަންދުކުރާ ތަންތަނާއި، ނުވަތަ ގުދަންކުރާ ތަންތަނާއި، ވިއްކާތަންތަނާއި، ކާބޯތަކެތި ފޯރުކޮށްދޭ ތަންތަނުގެ ޞިއްޙީ ރައްކާތެރިކަން ބެލުމަށާއި ތަޙްލީލުތައް ކުރުމަށް ނޭޝަނަލް ހެލްތު ލެބޯރޓަރީއެއް ޤާއިމުކުރަންވާނެކަމަަށް ބިލުގައި ބުނެފައިވެއެވެ.
ކާބޯތަކެތީގެ ރައްކާތެރިކަން ކަށަވަރު ކުރުމަށް ޚާއްސަ ލެބޯރޓަރީއެއް ޤާއިމްކުރަންވާނެ ކަމަށްވެސް ބިލުގައި ބަޔާން ކޮށްފައިވެއެވެ.
