ބިމާބެހޭ ގާނޫނަށް އިސްލާހު ގެނައުމުގެ ބިލު ދިރާސާކުރުމަށް ކޮމިޓީއަށް
6 ސެޕްޓެމްބަރު 2021 | ހޯމަ 08:15ބިލު މަޖިލީހަށް ބަލައިގަތުމަށް ފާސްވީ ވޯޓުގައި ބައިވެރިވެ ވަޑައިގަތް 42 މެމްބަރުންގެ އިއްތިފާގުން
ބިން ވިއްކުމުގެ ބާރު ކައުންސިލްތަކަށް ދިނުމަށް ބިލުގައި ހިމަނާފައިވޭ
ދިވެހިރާއްޖޭގެ ބިމާބެހޭ ގާނޫނަށް އިސްލާހު ގެނައުމުގެ ބިލު ދިރާސާކުރުމަށް ލާމަރުކަޒީ ކޮމިޓީއަށް ފޮނުވައިފިއެވެ.
ބިލު މަޖިލީހަށް ބަލައިގަތުމަށް ފާސްވީ ވޯޓުގައި ބައިވެރިވެ ވަޑައިގެންނެވި 42 މެމްބަރުންގެ އިއްތިފާގުންނެވެެ.
ބިލުގައިވާ ގޮތުން ކައުންސިލްތަކުގެ މިލްކުވެރިކަމުގެ ދަށުގައިވާ ބިންތައް ބޭނުންކުރުމާއި ކުއްޔައް ދޫކުރެވޭނީ އެ ރަށް ނުވަތަ ސިޓީއެއްގެ ލޭންޑް ޔޫސް ޕްލޭންއާ އެއްގޮތްވާ ގޮތުގެ މަތިންނެވެ. ނޫން ނަމަ ގެދޮރުއެޅުމަށާއި އިޤުތިޞާދީ ކަންކަމަށާއި، އިޖުތިމާއީ ކަންކަމަށާއި ތިމާވެށި ރައްކާތެރިކުުރުމަށް އަދި ދައުލަތުގެ ބޭނުމަށެވެ. ހަމަ އެެހެންމެ އިޤުތިޞާދީ ބޭނުމަށްޓަކައި ކައުންސިލްތަކުގެ ދަށުގައިވާ ބިންތައް ބިމާ ބެހޭ ގާނޫނާ އެހެނިހެން ގާނޫނުތަކާ ޚިލާފުނުވާ ގޮތެއްގެ މަތިން ދެވަނަ ފަރާތަކަށް ވިއްކައި ކުއްޔަށް ވެސް ދޫކުރެެވޭނެއެވެ.
ބިމާ ބެހޭ ގާނޫނުގައިވާ ގޮތުން ރާއްޖޭގެ ބިމުގެ ދަފުތަރު ހޯމް މިނިސްޓްރީއާއި، ޕްލޭނިން މިނިސްޓްރީ އަދި އެންވަޔަރަމަންޓް މިނިސްޓްރީން ބަލަހައްޓަން ޖެހެއެވެ. އަދި ގާނޫނަށް އަލަށް ހުށަހެޅި އިސްލާހުގެ ދަށުން ކައުންސިލްތަކުގެ މިލްކުވެރިކަމުގެ ދަށުގައިވާ ބިންތަކުގެ މައުލޫމާތު ބިމުގެ ދަފްތަރުގައި ހިމަނަން ޖެހެއެވެ.
ޤާނޫނަށް ގެނެސްފައިވާ އިސްލާހުތަކުގެ ތެރޭގައި، ކައުންސިލްތަކުގެ މިލްކުވެރިކަމުގެ ދަށުގައިވާ ބިން އެ ކައުންސިލުތަކުން ދޫކޮށް، ކުއްޔަށްދީ ހެދުމުގެ ބާރު ވެސް ދީފައިވެއެވެ. ރަށްރަށުގެ ބިންތަކުގެ ތެރެއިން ދިރިއުޅެން ނޫން ބޭނުންތަކަށް ވެސް ބިންތައް އެކިބޭނުންތަކަށް ދޫކުރުމުގެ ބާރު ކައުންސލްތަކަށް ލިބިދެއެވެ. ބިމުގެ މިލްކުވެރިކަން ކައުންސިލްތަކަށް ލިބިގެންދާއިރު ކައުންސިލުތަކުގެ މިލްކުވެރިކަމުގެ ދަށުގައިވާ ބިންތައް ބޭނުންކުރަންވާނީ ނުވަތަ އެކި ފަރާތްތަކަށް ދޫކުރަންވާނީ، ނުވަތަ ކުއްޔަށް ދޭންވާނީ، އެބިން އޮތް ރަށެއް ނުވަތަ ސިޓީއަކަށް ކަމާބެހޭ ޤާނޫނުގައިވާ ގޮތުގެމަތިން ކަނޑައެޅިފައިވާ ލޭންޑް ޔޫސް ޕްލޭނާ އެއްގޮތްވާ ގޮތުގެމަތިންކަމަށް ވަނީ ބުނެފައެވެ.
ލާމަރުކަޒީ ޤާނޫނުން ލިބިދީފައިވާ ބާރުތައް ކައުންސިލްތަކަށް ދިނުމަށް ސަރުކާރުން ގެންދަވަނީ ލާމަރުކަޒީ ޤާނޫނާ ފުށުއަރާ ޤާނޫނުތައް އިސްލާހުކޮށް ޤާނޫނުތަކަށް ބަދަލު ގެންނަމުންނެވެ. އެގޮތުން ކައުންސިލްތަކަށް ލޯނު ނެގުމާއި ލޯނު ދޫކުރުމުގެ ބާރު ވެސް ލިބިދޭ ގޮތަށް ވަނީ އިސްލާހް ހުށަހަޅާފައެވެ.
މި ބިލު ސަރުކާރުގެ ފަރާތުން ހުށަހަޅުއްވާފައިވަނީ މަތިވެރި ދާއިރާގެ މެންބަރު ޙަސަން ޒަރީރެވެ. ބިލު ހުށަހަޅުއްވަމުން މެންބަރު ވިދާޅުވީ ސަރުކާރުން މި ބިލު ހުށަހެޅުމުގެ ބޭނުމަކީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ 150 ވަނަ މާއްދާގައި، އެ ގާނޫނާއި އެ ގާނޫނުގެ މަޤުޞަދުތަކާ ތަޢާރުޒުވާ ޤާނޫނުތައް ފާހަގަކުރަން ޖެހޭތީ ކަމަށެވެ.
