އައިޓީއެފްސީގެ މެމްބަރު ގައުމަކަށް ރާއްޖެވުމުގެ އެޕްރޫވަލް ލިބިއްޖެ

އިންޓަނޭޝަނަލް އިސްލާމިކް ޓްރޭޑް ފައިނޭންސް ކޯޕަރޭޝަން (އައިޓީއެފްސީ) ގެ މެމްބަރު ގައުމަކަށް ވުމަށް ރާއްޖެއިން ހުށަހެޅި ހުށަހެޅުން ބަލައިގެންފިއެވެ.

އައިޓީއެފްސީގެ މެމްބަރު ގައުމަކަށްވުމަށް ރާއްޖެއިން ހުށަހެޅި ހުށަހެޅުން ރަސްމީކޮށް ބަލައިގެންފައިވާއިރު، މިހުށަހެޅުން ރާއްޖެއިން ހުށައެޅީ އިސްލާމިކް ޑިވެލޮޕްމަންޓް ބޭންކް (އައިއެސްޑީބީ) ގްރޫޕުގެ އަހަރީ ބައްދަލުވުމުގެ ތެރެއިންނެވެ. ރާއްކެ އަކީ އޯއައިސީގެ މެމްބަރު ގައުމެއްކަމުން އައިޓީއެފްސީގެ މެމްބަރު ގައުމަކަށް ރާއްޖެ ނުވި ނަމަވެސް ފަންނީ އަދި މާލީ އެހީ އަބަދުވެސް ރާއްޖެއަށް ދަނީ ލިބެމުންނެވެ.

އެގޮތުން މިހާރު ކުރިއަށްދާ ބައްދަލުވުންތަކުގެ ހަވާސާ ބައްދަލުވުމެއްގައި އައިޓީއެފްސީން ވަނީ ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އަށް 75 މިލިއަން އެމެރިކާ ޑޮލަރުގެ ޓްރޭޑް ފެސިލިޓީއެއް ހަމަޖައްސައި ދިނުމަށް އެއްބަސްވެފައެވެ. އިސްލާމިކް ފައިނޭންސިންގެ މި މުރާބަހާ ފެސިލިޓީ އެސްޓީއޯއިން ބޭނުންކުރުމަށް ހަމަޖެހިފައިވަނީ ތެލާއި ކާޑުގެ ބާވަތްތައް ގަތުމަށެވެ. އެސްޓީއޯއަށް ދޫކުރި ފެސިލިޓީއާ ގުޅިގެން އައިޓީއެފްސީން ބުނީ މި ފައިސާއަކީ ކޮވިޑާ ގުޅިގެން ހީނަރުވެފައިވާ ރާއްޖޭގެ އިގުތިސާދު ދިރުވަން ކުރާ މަސައްކަތަށް މުހިންމު ފެސިލިޓީއެއް ކަމަށެވެ.

އޭގެ އިތުރުންވެސް 2019 ވަނަ އަހަރު، އައިޓީއެފްސީން ވަނީ ރާއްޖެއަށް 1.5 ބިލިއަން ޑޮލަރުގެ އެހީ ދިނުމަށް ފްރޭމް ވޯކް އެގްރިމެންޓެއްގައި ސޮއިކޮށްފައެވެ. ސަރުކާރުން ވަނީ މި އެއްބަސްވުމަކީ ދަނޑުވެރިކަމުގެ ދާއިރާގެ އިތުރުން ކުދި އަދި މެދުފަންތީގެ ވިޔަފާރިތަކަށް އިންވެސްޓްކުރުމަށް ލިބިގެންދިޔަ އެހީތެރިކަމެއް ކަމަށް ބުނެފައެވެ.

އުޒްބެކިސްތާނުގެ ވެރިރަށް ތަޝްކެންޓުގައި ކުރިއަށްދާ މިބައްދަލުވުންތަކުގައި ރާއްޖެއިން އައިއެސްޑީީބީއަށް ކަނޑައަޅާފައިވާ އެކްޓިން ގަވަނަރުގެ ހައިސިއްޔަތުން ޕްލީނެރީ ސެޝަންގައި ރާއްޖޭގެ ފަރާތުން އިސްކޮށް ބައިވެރިވަނީ އިކޮނޮމިކް މިނިސްޓަރ ފައްޔާޒް އިސްމާއިލް އެވެ. ބައްދަލުވުމުގެ ހަވާސާގެ ތެރެއިން މިނިސްޓަރ ފައްޔާޒް ވަނީ އައިޓީއެފްސީގެ ސީއީއޯ ހާނީ ސާލިމް އާއި ބައްދަލުކުރައްވާ ރާއްޖޭއާއި އައިޓީއެފްސީ ގުޅިގެން ހަރުދަނާ މަސައްކަތްތަކެއް ކުރުމާއި މެދު މަޝްވަރާ ކުރައްވާފައެވެ.

އިސްލާމިކް ޓްރޭޑް ފައިނޭންސިން ކޯޕަރޭޝަނަކީ އައިއެސްޑީބީގެ ޓްރޭޑް ފައިނޭންސިން ގޮތްޕެވެ.