މި ޕެންޑަމިކުގެ ހާލަތާއެކު ރާއްޖޭގެ ތައުލީމީ ނިޒާމަށް ބަދަލު ގެންނަންޖެހޭކަން ހާމަވެގެން ގޮސްފައިވާކަމަށް ވިލާ ކޮލެޖުގެ ރެކްޓަރ ޑރ. އަހުމަދު އަންވަރު ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން ޑރ. އަންވަރު ވިދާޅުވީ ތައުލީމީ ނިޒާމަކީ އުފެދެމުން ބަދަލުވަމުން އަންނަންޖެހޭ އެއްޗެއް ކަމަށެވެ. ނިޒާމަކީ އެ އޮތް ގޮތަކަށް އަބަދު އޮންނަންޖެހޭ އެއްޗެއް ނޫން ކަމަށާއި ތައުލީމީ ނިޒާމެއް އެކުލަވާލާއިރު، މިކަމުގައި އެކި ބޭބޭފުޅުން އެކުލަވާލާފައިވާ ފަލްސަފާތަކަށް ރިއާޔަތް ކުރަންޖެހޭކަމަށް ޑރ. އަންވަރު ވިދާޅުވިއެވެ. ފަލްސަފާއަކީ އެބަޔަކު ގެންނަން ބޭނުންވާ ތަރައްގީއަކާ ގުޅޭ، އެބައެއްްގެ އާދަކާދަތަކާ ގުޅޭ ފަލްސަފާއަކަށް ވާންޖެހޭނެ ކަމަށް ވެސް ވިދާޅުވިއެވެ.
ރާއްޖޭގައި ތައުލީމީ ނިޒާމެއް ބައްޓަންކުރާއިރު، ރާއްޖޭގެ ވިޔަފާރިވެރިންނާއި، ރާއްޖޭގެ އިންޑަސްޓްރީތައް ހިންގަވާ ބޭބޭފުޅުންނާ މަޝްވަރާކޮށް އެމީހުންގެ ވިސްނުންވެސް މިކަމުގައި ހިމަނަންޖެހޭ ކަމަށާއި ރާއްޖޭގެ ތައުލީމީ ނިޒާމުގައި މިކަންކަމަށް ރިއާޔަތްކޮށްފައިވަނީ ކިހާ މިންވަރަކަށްތޯ ބަލަންޖެހޭ ކަމަށް ޑރ. އަންވަރު ވިދާޅުވިއެވެ. ސްކޫލްތަކުގައި ކުދިންނަށް ތައުލީމު ދެމުންދަނީ ނުފެންނަ މުސްތަގުބަލަކަށް ކަމަށާއި، އެ ކުދިން ގައިގައި ހުންނަ ހުނަރުތަކުން އިންޑަސްޓްރީގައި ކިހާ ބޭނުމެއް ހިފޭތޯ ވެސް ބަލަން ޖެހޭ ކަމަށް ޑރ. އަންވަރު ވިދާޅުވިއެވެ.
މީގެ އިތުރުން ޓީޗަރުންނަކީ ގަދަރުވެރި ބައެއް ކަމަށާއި، ޓީޗަރުންނަށް އިހުތިރާމުކުރާ ފަދައިން ދަރިވަރުންނަށްވެސް އިހުތިރާމް ކުރަން ޖެހޭ ކަމަށް ޑރ އަންވަރު ވިދާޅުވިއެވެ. އެހެން އެކަން ކުރާނަމަ އެ އާދަ ދަރިވަރުންގެ ކިބައިގައި ހަރުލާނެ ކަމަށް ވިދާޅުވިއެވެ. ވަކިން ޚާއްސަކޮށް ސްކޫލްތަކުން ދަރިވަރުންނަށް ކުރާ އިތުބާރަކީ ތައުލީމީ ދާއިރާއެއްގައި މުހިންމު އެއްޗެއް ކަމަށް ޑރ. އަންވަރު ވިދާޅުވިއެވެ. މިއީ ކުދިންގެ ނަތީޖާއަށްވެސް ހެޔޮ އަސަރެއް ކުރާނެ ކަމެއް ކަމަށް ވިދާޅުވިއެވެ.
