ކޮންމެ ތިން ހަފްތާއިން އެއްފަހަރު ޑޮކްޓަރަށް ދެއްކުމަށް ވަނީ އަންގާފައި
ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު،
ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދަށް ރާއްޖެއަށް ވަޑައިގެންނެވޭނެ ސީދާ ދުވަހެއް ދަންނަވަން ދަތިކަމަށް އެމަނިކުފާނު ވިދާޅުވެއްޖެއެވެ.
އާދިއްތަ ދުވަހު އިނގިރޭސިވިލާތުގައި ހުންނަވައި ވަރޗުއަލްކޮށް ބޭއްވި ނޫސްވެރިންގެ ބައްދަލުވުމުގައި ރައީސް ނަޝީދު ވިދާޅުވީ ކޮންމެ ތިން ހަފްތާއިން އެއްފަހަރު ޑޮކްޓަރަށް ދެއްކުމަށް އަންގާފައިވާ ކަމަށެވެ. އަދި ވިދާޅުވީ ސެޕްޓެންބަރު މަހު ފަހުކޮޅު ރާއްޖެއަށް ވަޑައިގެންނެވޭނެ ކަމަށް އުންމީދު ކުރެއްވި ނަމަވެސް ރާއްޖެ ވަޑައިގެންނެވޭނެ ދުވަސް ލަސްވާނެ ކަމަށެވެ. އަދި ސީދާ ވަޑައިގެންނެވޭނެ ދުވަހެއް ދަންނަވަން ދަތިކަން އެމަނިކުފާނު ފާހަގަކުރެއްވިއެވެ.
ރައީސް ނަޝީދު ވިދާޅުވީ ރާއްޖެއަށް އެނބުރި ވަޑައިގަތުމުގައި ސަލާމަތާއި ރައްކާތެރިކަމަށް ވަރަށް ބޮޑަށް ބަލަންޖެހޭ ކަމަށެވެ.
އެމަނިކުފާނުގެ ހާލުކޮޅާ ބެހޭ ގޮތުން ވިދާޅުވީ ކުރިއަށް ވުރެ މާބޮޑަށް ރަނގަޅު ކަމަށެވެ. ހިނގާބިގާވެ އުޅެވޭ ކަމަށާއި، އަމިއްލައަށް ކަންކަން ކުރެވޭ ކަމަށް ރައީސް ނަޝީދު ވިދާޅުވިއެވެ. ނަމަވެސް ކަނާއަތުގެ ތިން އިނގިލީގައި އައްސިކަން ހުންނާތީ އެތިން އިނގިލީގެ ބޭނުން ނުހިފޭކަމަށް އެމަނިކުފާނު ވިދާޅުވިއެވެ.
ރައީސް ނަޝީދު ދިރިއުޅުއްވާ ކެނެރީގެ ކައިރީގައި، ސައިކަލެއްގައި ހަރުކޮށްފައިވާ އައިއީޑީއެއް ގޮއްވާލުމުން އެމަނިކުފާނުގެ ހަށިކޮޅަށް 10 ރޭޒާފުއް ވަދެ ހަށިގަނޑުގެ މުހިއްމު ގުނަވަންތައް ފޫއަޅުވާލިއެވެ. މި ރޭޒާފުއްތައް ނަގަން 16 ގަޑިއިރުގެ އޮޕަރޭޝަންތަކެއް ވަނީ ކޮށްފައެވެ. އަނިޔާތަކަށް އޭޑީކޭ ހޮސްޕިޓަލުގައި ފަރުވާ ހޯދެވުމަށްފަހު އިތުރު ފަރުވާއަށް ޖަރުމަންވިލާތަށް ވަޑައިގަތީ މެއި 13ވަނަ ދުވަހުއެވެ. ޖަރުމަނުވިލާތުން ފަރުވާ ހޯއްދެވުމަށްފަހު މިވަގުތު ފަރުވާ ހޯއްދަވަމުން ގެންދަވަނީ އިނގިރޭސިވިލާތުންނެވެ.
