ނަދީމްގެ މަރުގެ މައްސަލައިގެ އަޑުއެހުން ކެންސަލް

ހއ. ތަކަންދޫ އިބްރާހީމީ ހިޔާ، ނަދީމު ޢަބްދުއްރަޙީމް (ނަޑޭ, 23އ)އަށް ތޫނު އެއްޗަކުން ހަމަލާދީ މަރާލި މައްސަލައިގެ ޝަރީއަތުގެ އަޑުއެހުން ކެންސަލްކޮށްފިއެވެ.

އާދީއްތަ ދުވަހުގެ ހެނދުނު 9:30 ގައި ކްރިމިނަލް ކޯޓުގައި ބޭއްވުމަށް ހަމަޖެއްސި އަޑު އެހުން ކެންސަލްކޮށްފައިވަނީ ދިފާއީ ވަކީލް އެދިގެން ކަމަށް ކްރިމިނަލް ކޯޓުން ބުނެއެވެ. އަދި މި އަޑު އެހުން ވަނީ އެހެން ދުވަހަކަށް ތާވަލުކޮށްފައެވެ.

ނަދީމް މަރާލި މައްސަލައިގައި، ގ. ޝާރާޒް، މުޙައްމަދު މަފާޒު ޙުސައިން ސަލީމްގެ މައްޗަށް ވަނީ ތޫނު އެއްޗަކުން ހަމަލާދީ މީހަކު މެރުމުގެ ކުށުގެ ދައުވާ އުފުލާފައެވެ. އަދި ތޫނު އެއްޗެއް ބޭނުންކޮށްގެން، ގަސްތުގައި މީހަކު މަރާލުމުގައި ބައިވެރިވި ކަމުގެ ކުށުގެ ދައުވާ، ރ. އިންނަމާދޫ ސަމަންތާ، ޙުސައިން ޝާމިންއާއި ގއ. ގެމަނަފުށި ހަވާސް، މުޙައްމަދު ކަރަމް ސުހައިލް އަދި ލ. ގަން ވިދާތަރި، ޢަލީ ނިފާޒުގެ މައްޗަށް އުފުލާފައިވެއެވެ. މި ހަތަރު މީހުން ވެސް ވަނީ ދައުވާއަށް އިންކާރުކޮށްފައެވެ.

ދައުވާގައިވާ ގޮތުން މަފާޒަކީ ނަދީމަށް ހަމަލާދިން މީހާއެވެ. މަފާޒް ފިޔަވައި ދައުވާ ލިބޭ ދެން ތިބި ތިން މީހުންނަކީ ސައިކަލުތަކުގައި އެތަނަށް ގޮސް، އެކަމުގައި ބައިވެރިވި މީހުން ކަމަށް ދައުލަތުން ވަނީ ފާހަގަކޮށްފައެވެ. އެ 4 މީހުން ވެސް ވަނީ ދައުވާއަށް އިންކާރުކޮށްފައެވެ. މި މައްސަލައިގައި ދަޢުވާ ލިބޭ މީހުންގެ ފަރާތުން ދިފާޢީ ވަކީލު ވަނީ މި މައްސަލައަށް ގިނަ ދުވަސްތަކެއް ވަމުންދާތީ އެކަމާ ކަންބޮޑުވެވަޑައިގަންނަވާ ކަމަށާއި، ވީހާވެސް އަވަހަކަށް މައްސަލަ ނިންމުމަށް ބޭނުންވާ ކަމަށް ވިދާޅުވެފައެވެ.

މި މައްސަލައިގައި އެންމެ ފަހުން ބޭއްވި އަޑުއެހުންތަކުގައި ވަނީ ދިފާއީ ބައެއް ހެކިންގެ ހެކިބަސް ނަގާފައެވެ. އެގޮތުން މި މައްސަލައިގައި ތުހުމަތުކުރެވޭ ބައެއް ފަރާތްތައް އެތަނުގައި ހާޒިރުވެ ނެތްކަމުގެ ދިފާއު ސާބިތުކުރުމަށް ވަނީ ހެކިން ހުށަހަޅާފައެވެ.

ނަދީމް މަރުވީ 2017 ޖުލައި 27 ވަނަ ދުވަހުގެ ހަވީރު ޓަރމިނަލް ކެފޭ ތެރޭގައި އިންދާ، ބަޔަކު ގޮސް ވަޅި ހަރައި ޒަޚަމްކޮށްލުމުން ލިބުނު އަނިޔާތަކަށް އޭޑީކޭގައި ފަރުވާ ހޯދަމުން ދަނިކޮށެވެ. މި މައްސަލައަށް ގިނަ އަހަރުތަކެއް ވަމުންދާއިރު، މަރުގެ މިފަދަ ބޮޑެތި މައްސަލަތަކުގެ ޝަރީއަތް ނުނިމި ދިގުލައިގެންދާކަމުގެ ޝަކުވާ ގިނަ ބަޔަކު ގެންދަނީ ކުރަމުންނެވެ.

މި މައްސަލައިގައި މަފާޒުގެ މައްޗަށް ދަޢުވާ ސާބިތުވެއްޖެ ނަމަ، އޭނާއަށް އަންނާނީ މަރުގެ އަދަބެވެ. ނަމަވެސް މަފާޒުގެ މައްޗަށް އެ ދަޢުވާ ސާބިތުނުވެ، އެ ކުށުގެ ޢަމަލުން ފުރިހަމަވާ އެހެން ކުށެއް ސާބިތުވެއްޖެ ނަމަ 15 އަހަރާއި 25 އަހަރާ ދެމެދުގެ ޖަލު ޙުކުމެއް މަފާޒަށް އަންނާނެއެވެ. އޭގެ އިތުރުން، އެކަމުގައި ބައިވެރިވި މީހުންގެ މައްޗަށް އެ ދަޢުވާ ސާބިތުވެއްޖެ ނަމަ 15 އަހަރާއި 25 އަހަރާ ދެމެދުގެ މުއްދަތުގެ ޖަލު ޙުކުމެއް އަންނާނެއެވެ.