ސެޕްޓެމްބަރ މަހު 15ގައި އޮލިމްޕަސް ބުކިންގއަށް ހުޅުވާލެވޭނެކަމަށް މިނިސްޓްރީ އޮފް އާރޓްސް ކަލްޗަރ އެންޑް ހެރިޓޭޖްގެ އިވެންޓްސް ޑައިރެކްޓަރ އަޙުމަދު ރަމީޒް ވިދާޅުވެއްޖެއެވެ.
ރާއްޖެ ޓީވީގެ "ކުލަ ސްކްރީން" ޕްރޮގްރާމްގައި ވާހަކަ ދައްކަވަމުން ރަމީޒް ވިދާޅުވީ އޮލިމްޕަސް މަރާމާތުކުރުމުގެ މަސައްކަތް ފަށައިފައިވަނީ ޖުލައި މަހުގެ ތެރޭގައި ކަމަށާއި, ދެމަސް ދުވަހުގެ ތެރޭގައި މަސައްކަތް ނިންމާލެވޭނެ ކަމަށް ލަފާކުރެވޭ ކަމަށެވެ.
ރަމީޒް ވިދާޅުވީ އިމާރާތް މަރާމާތުކުރުމުގެ މަސައްކަތް ފެށީ އިމާރާތް ހަލާކުވެ ވަރަށް ބޮޑެތި ގެއްލުންތަކެއް ލިބިފައި ހުރުމުން ކަމަށެވެ. އޮލިމްޕަހަށް ލިބިފައި ހުރި ގެއްލުންތަކުގެ ތަފްސީލު ހާމަކުރައްވައި ރަމީޒް ވިދާޅުވީ އޮލިމްޕަސް ހޯލާއި ހޯލުގެ ވަށައިގެން ހުރި ކޮރިޑޯ ތަކުގައި ހުރި ޝީޓްތައަ ވަރަށް ބޮޑަށް ހަލާކުވެފައިވާ ކަމަށެވެ. އަދި ފެން ލީކުވުމުގެ މައްސަލަވެސް ދިމާވެފައިވާ ކަމަށެވެ.
އިމާރާތުގެ ހުޅަނގު ފަރާތުގައި ހުރި ތިން ގަހެއްގެ ސަބަބުން އިމާރާތަށް ވަރަށް ބޮޑެތި ގެއްލުންތަކެއް ލިބިފައިވާ ކަމަށް ރަމީޒް ވިދާޅުވިއެވެ. ރަމީޒް އިތުރަށް ވިދާޅުވީ މިތިން ގަހުގެ ތެރެއިން އެއްގަސް ކަނޑާލުމުން ވަރަށް ގިނަ މީހުން އެކަމާ ނުރުހުން ފާޅުކޮށްފައިވާ ކަމަށެވެ. ގަހުގެ ސަބަބުން އިމާރާތުގެ ފައުންޑޭޝަނާއި މަތީ ޝީޓްތަކާއި އަދި ފުރާޅު ވަރަށް ބޮޑަށް ހަލާކުވެފައިވާ ކަމަށް ރަމީޒް ވިދާޅުވެފައިވެއެވެ. އަދި މިކަމުގެ ސަބަބުން ހޯލްތަކުގެ ފާރުތަކުގައި ފެން ހިފައިފައިވާ ކަމަށް ވެސް ފާހަގަކުރައްވާފައެވެ.
އޮލިމްޕަސް މަރާމާތު ކުރުމުގެ މަސައްކަތަށް އަލިއަޅުވާލައްވައި ރަމީޒް ވިދާޅުވީ އާންމުންނަށް ފަސޭހަވާގޮތަށް ކޮރިޑޯ ބޮޑު ކުރުމުގެ މަސައްކަތް ފަށާފައިވާ ކަމަށެވެ. އަދި ކޮރިޑޯ ބޮޑު ކުރުމަށްޓަކައި ޓިކެޓް ކައުންޓަރ ހުރި ތަނުން އެހެންތަނަކަށް ކައުންޓަރ ބަދަލުކުރުމުގެ މަސައްކަތް ފަށާފައިވާ ކަމަށާއި، ކެފޭ ސަރަހައްދުގެ ޖާގަ ބޮޑުކޮށް ސާފު ވައި ދައުރުވާހެން އެތަން ބައްޓަން ކުރުމަށް މަސައްކަތް ކުރަމުންދާ ކަމަށެވެ. ފާޚާނާބަރި ޒަމާނީ ފެންވަރަށް ބަދަލުކުރުމުގެ އިތުރުން ފުރޮޅުލީ ގޮނޑީގައި ތިބޭ ޚާއްސަ އެހީއަށް ބޭނުންވާ މީހުންނަށް ރޭމްޕެއް ހުންނާނެކަމަށް ރަމީޒް ވިދާޅުވިއެވެ.
އިތުރަށް ވާހަކަ ދައްކަމުން ރަމީޒް ވިދާޅުވީ އިމާރާތް މަރާމާތު ކުރަން ފެށީ އޮލިމްޕަހަށް ދާމީހުންގެ ރައްކާތެރިކަން ދެމެހެއްޓުމަށްޓަކައި ކަމަށެވެ. 2012 ވަނަ އަހަރު އޮލިމްޕަހުގެ އެތެރެ މަރާމާތުކުރި ނަމަވެސް އިމާރާތަށް އެއްކޮށް ބަދަލުތަކެއް ގެނެސްފައިނުވާ ކަމަށް ރަމީޒް ވިދާޅުވިއެވެ. އޭގެ އިތުރުން އިމާރާތް ރައްކާތެރިކުރުމަށްވެސް މިހާތަނަށް އެއްވެސް ކަމެއް ކޮށްފައި ނެތް ކަމަށް ރަމީޒު ފާހަގަ ކުރެއްވިއެވެ.
އޮލިމްޕަހަކީ 56 އަހަރު ވެފައި ހުރި އިމާރާތެއްގެ އިތުރުން އާސާރީ އިމާރާތެކެވެ. ރާއްޖޭގައި ގިނަ ސިނަމާތަކެއް އުފެދި އުވިގެން ދިޔަ ނަމަވެސް އޮލިމްޕަސް ދެމިއެބައޮތެވެ. މިހެން ވުމުން އޮލިމްޕަހަށް ގިނަ ބަދަލުތަކެއް ގެނެވެން ނެތް ކަމަށް ރަމީޒް ވިދާޅުވިއެވެ. އެހެންނަމަވެސް ޒަމާނީ ކުލަ ޖެއްސޭތޯ ވަރަށް ބޮޑަށް މަސައްކަތް ކުރައްވާ ކަމަށް ރަމީޒް ވިދާޅުވިއެވެ.
މިކަންތައްތަކުގެ އިތުރުން ހޯލްގެ އެކޯސްޓިކް ރަނގަޅު ކުރުމާއި ސައުންޑާއި ވީޑިއޯ ޕްރޮޖެކްޓްތައް ބަދަލުކުރުމާއި އިސްތިހާރުތައް ދެއްކޭނެހެން ލެޑް ޕެނަލްއެއް ދޮރުމައްޗަށް ބަދަލު ކުރުމަށް ރާވާފައިވާ ކަމަށް ރަމީޒް ވިދާޅުވިއެވެ. އަދި މަގުސަދަކީ އޮލިމްޕަހުން ޚިދުމަތް ލިބިގަންނަ މީހުންނަށް އެތަނަކީ ހިތްގައިމު ރައްކާތެރި މާހައުލަކަށް ހެދުން ކަމަށް ރަމީޒް ވިދާޅުވިއެވެ.
