މާލޭގެ ކުރީގެ ޑެޕިއުޓީ މޭޔަރު ސަމާހު ޕީޕީއެމްއާ ގުޅިވަޑައިގެންފި
4 ސެޕްޓެމްބަރު 2021 | ހޮނިހިރު 03:27ސަމާހު އަކީ ކުރިން އެމްޑީޕީގެ މެންބަރެއް
މާލެ ސިޓީގެ ކުރީގެ ޑެޕިއުޓީ މޭޔަރު ސަމާހު،
މާލޭ ސިޓީގެ ކުރީގެ ޑެޕިއުޓީ މޭޔަރު ސަމާހު ރަޝީދު އިދިކޮޅު ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)އާ ގުޅިވަޑައިގެންފިއެވެ.
ހުކުރު ދުވަހުގެ ރޭ ކާނިވާ ސަރަހައްދުގައި ޕީޕީއެމުން "އައްޑަނަ" ނަމުގައި ބޭއްވި ޖަލްސާގައި ސަމާހު އެޕާޓީއާ ގުޅިވަޑައިގެންނެވިކަމުގެ ފޯމު ވަނީ ހަވާލުކޮށްދެއްވާފައެވެ. އެ ފޯމާއި ހަވާލުވީ ޕީޕީއެމް/ޕީއެންސީ ކޯލިޝަން ހިންގެވުމާ ހަވާލުވެ ހުންނެވި އަބްދުއްރަހީމެވެ.
ސަމާހު އަކީ ކުރިން އެމްޑީޕީގެ މެންބަރެކެވެ. 2011 ވަނަ އަހަރު އޭނާ މާލޭގެ ޑެޕިއުޓީ މޭޔަރު ކަމަށް ވަޑައިގެންނެވީ ވެސް އެމްޑީޕީގެ ޓިކެޓްގައި ވާދަކުރައްވައިގެންނެވެ.
މީގެ އިތުރުން ވެސް އެޕާޓީއާ އަލަށް ގުޅުނު އާއްމު މެމްބަރުންގެ ފޯމުތައް ވެސް އެޖަލްސާގައި ހަވާލުކޮށްފައިވެއެވެ.
ހުކުރު ދުވަހުގެ ރޭ ބޭއްވި އައްޑަނަ ޖަލްސާއަކީ މިފަހުން ޕީޕީއެމުން ބޭއްވި އެންމެ ބޮޑު އެއްޖަލްސާއެވެ. މިސަރުކާރު ޒިންމާދާރު ކުރުވައި ރައްޔިތުންގެ ހައްގުތައް ހޯދައިދިނުމަށް އަބަދުވެސް ވަކާލާތު ކުރާނެ ކަމަށް އިދިކޮޅުން ބުނެފައިވެއެވެ. އެގޮތުން ހުއްޓުމެއްނެތި އަބަދުވެސް އެކިއެކި ސިޔާސީ ހަރަކާތްތައް ކުރިއަށް ގެންދާނެ ކަމަށް ޕީޕީއެމް/ޕީއެންސީން ބުނެއެވެ. ނަމަވެސް އައްޑަނަ ޖަލްސާ ބޭއްވިގެން މިދިޔައީ ދުވަސްތަކަކަށް ސިޔާސީ ހަރަކާތްތައް މަޑު ޖެހިފައި އޮތުމަށްފަހުއެވެ.
