އެސްޓީއޯ މާލެ ލީގުގެ ދެވަނަ ބުރުގައި ވެލެންސިއާ އަތުން ނިއުރޭޑިއަންޓް ސްޕޯޓްސް ކުލަބު އުނދަގޫ މޮޅެއް ހޯދައިފިއެވެ.

ހޮނިހިރު ދުވަހުގެ ރޭ ގަލޮޅު ރަސްމީ ފުޓުބޯޅަ ދަނޑުގައި ކުޅުނު މި މެޗް ނިއުއިން ކާމިޔާބުކުރީ 1-0 ގެ ނަތީޖާއަކުންނެވެ. މިދެޓީމު ފުރަތަމަ ބުރުގައި ބައްދަލުކުރި މެޗުވެސް ނިއުއިން ކާމިޔާބުކުރީ ހަމަ މި ނަތީޖާއިންނެވެ.

ސަސްޕެންޝަނުގެ ސަބަބުން މުހިންމު ކުޅުންތެރިންތަކެއް މަދުކޮށް ކުޅުނު ނިއުރޭޑިއަންޓަށް މެޗުގައި މާ އެދެވޭ ކުޅުމެއް ދެއްކިފައެއް ނުވެއެވެ. އެގޮތުން ފުރަހަމަ ހާފުވެސް ނިމިގެންދިޔައީ ދެޓީމުންކުރެ ޓީމަކަށް ލަނޑެއް ނުޖެހި އެއްވަރު ވެގެންނެވެ.  ނަމަވެސް ދެވަނަ ހާފުގެ ވަރަށް ކުރީކޮޅުގައި ނިއުއިން ވަނީ ލިބުނު ފުރުސަތެއްގެ ބޭނުންހިފައި މެޗުގައި ފެނިގެންދިއަ ހަމައެކަނި ލަނޑު ކާމިޔާބުކޮށްފައެވެ. ވެލެންސިއާގެ ޑިފެންޑަރަކަށް ހެދުނު ބޮޑު ގޯހެއްގެ ބޭނުންހިފައި، މެޗުގެ 48 ވަނަ މިނެޓުގައި މި ލަނޑު އެޓީމަށް ކާމިޔާބު ކޮށްދިނީ، މެޗުގެ މޮޅު ކުޅުންތެރިޔާގެ މަގާމު ހޯދި ޢަލީ ފާސިރު (ސެންޓޭ) އެވެ.

ސަސްޕެންޝަނުގެ ސަބަބުން ނިއުގެ ކެޕްޓަން އަދި ކީޕަރު އިމްރާންއަށް މެޗުގައި ކުޅެވިފައި ނުވާއިރު، ނިއުގެ ބޭންޑް އަޅައިގެން މެޗުގައި ކުޅެފައުވަނީވެސް ފާއިތުވި އަހަރުގެ އެންމެ މޮޅު ކުޅުންތެރިޔާގެ މަގާމު ހޯދާފައިވާ، ސެންޓޭ އެވެ. މީގެ އިތުރުންވެސް އިންމަގެ ބަދަލުގައި ގޯލު ބެލެހެއްޓި ތަޖުރިބާކާރު ގޯލްކީޕަރު ޒިޔަޒަންގެ ފަރާތުންވެސް މޮޅު ކުޅުމެއް ފެނިގެން ގޮސްފައި ވެއެވެ.

ލީޑުގައި އޮވެގެން ނިއުއިން ކުޅެމުން ދިޔަ ނަމަވެސް ވެލެންސިއާއިން ވަނީ ލިބުނު ފުރުސަތުތަކުގައި ނިއުގެ ގޯލަށް ނުރައްކާ ކޮށްފައެވެ. މީގެ އިތުރުން ނިއުގެ ސެންޓޭއަށްވެސް ވަނީ މެޗުގެ ފަހު ކޮޅުގައި ލީޑު ފުޅާކުރުމަށް ރަނގަޅު ފުރުސަތެއް ލިބި ބޭކާރު ވެފައެވެ. އެގޮތުން އޭރިއާ އާއި ވަރަށް ކައިރިން ސެންޓޭ ފޮނުވާލި ހިލޭޖެހުން ދިޔައީ ގޯލުގެ ހުރަސް ދަނޑިމަތިން ބޭރަށެވެ. މެޗުގެ އިތުރު ވަގުތުގެ ތެރޭގައި ސެންޓޭއަށް ކުރި ފައުލަކާ ގުޅިގެން ވެލެންސިގެ ބިދޭސީ ކުޅުންތެރިޔާ ޕްރިންސް އަށް ވަނީ ދެވަނަ ރީންދޫ ކާޑާއިއެކު ރަތްކާޑު ދައްކާ ދަނޑުން ފޮނުވާލާފައެވެ.

މެޗުން ލިބުނު 3 ޕޮއިންޓާއިއެކު ނިއުއިންވަނީ ތާވަލުގެ ދެވަނާގައި 18 ޕޮއިންޓު ހަމަކޮށްފައެވެ. އެޓީމުން ވަނީ މިހާތަނަށް ލީގުއި 8 މެޗު ކުޅެފައެވެ. ތާވަލުގެ އެއްވަނާގައި އަދިވެސް އޮތީ، ހުރިހާ މެޗެއް ކާމިޔާބުކޮށްގެން ފުރަތަމަ ބުރު ނިންމާލި މާޒިޔާ ސްޕޯޓްސް އެންޑް ރެކްރިއޭޝަން އެވެ. އެޓީމުން މިހާތަނަށް ކުޅެފައިވަނީ 7 މެޗެވެ. ދެވަނަ ބުރުގައި އެޓީމުން ކުޅޭ ފުރަތަމަ ބުރުގައި ހޯމަ ދުވަހު ހަވީރު އެޓީމުން ނިކުންނާނީ، 8 ޕޮއިންޓާއިއެކު ތާވަލުގެ 6 ވަނާގައި އޮތް ވިކްޓްރީ ސްޕޯޓްސް ކުލަބާ ދެކޮޅާށެވެ. ނިއު އަތުން ބަލިވި ވެލެންސިއާ އޮތީ ކުޅުނު 8 މެޗުން ލިބުނު 1 ޕޮއިންޓާއިއެކު ތާވަލުގެ އެންމެ ފުލުގައެވެ.