ވެކްސިން ދިނުމުގެ ޕްރޮގްރާމް ފުޅާކުރުމަށް ޗައިނާއަށް ދަތިތަކެއް

ޗައިނާގައި ކުރިއަށްދާ ކޮވިޑް-19 ވެކްސިން ޕްރޮގްރާމް އިތުރަށް ފުޅާކުރުމުގައި ދަތިތަކެއް ކުރިމަތިވަމުންދާ ކަމަށް އެގައުމުގެ ސިއްހީ އޮފިޝަލުން ބުނެފިއެވެ.

ޗައިނާގެ ސިއްހީ އޮފިޝަލުންނާ ހަވާލާދީ ރޮއިޓަރސް އިން ރިޕޯޓްކޮށްފައިވަނީ ވެކްސިން ދިނުމުގެ ކަންކަން އިތުރަށް ފުޅާކުރުމަށް ދަތިތަކެއްދިމާވި ނަމަވެސް ގިނަ ބަޔަކަށް ވެކްސިން ދިނުމަށް މަސައްކަތް ކުރަމުންދާ ކަމުގައެވެ. އަދި ބޫސްޓަރ ޝޮޓް ދިނުމަށްވެސް އަންނަނީ މަސައްކަތްކުރަމުން ކަމުގައެވެ.

ޗައިނާގެ ނޭޝަނަލް ހެލްތު ކޮމިޝަންގެ އޮފިޝަލެއް ކަމުގައިވާ ޒެންގ ޒޮންގވެއި ވެކްސިން ޖެހުން ފުޅާކުރުމުގައި ދިމާވަނީ ކޮން ދައްޗެއްކަމެއް ސީދާ ހާމަކުރައްވާފައެއްނުވެއެވެ. އެހެންނަމަވެސް ވެކްސިން ނުޖަހާ ތިބި މީހުންނަށް ވެކްސިން ޖަހާފައިވާ މީހުންގެ ފުށުން ރައްކާތެރިކަން ލިބިދާނެކަމަށް ނުވިސްނުމަށް ވަނީ އެދިފައެވެ. ޗައިނާގައިވެސް ޑެލްޓާ ވޭރިއަންޓް އަންނަނީ ފެތުރެމުންނެވެ.

ޒެންގ ވިދާޅުވީ ވެކްސިން ޖެހުމުގެ ކަންކަން މިހާރު ކުރިއަށް ގެންދަން އުނދަގޫ ކަމަށެވެ. ޗައިނާގެ ވެކްސިން ޖަހަންޖެހޭ އާބާދީގެ ތެރެއިން 900 މިލިއަން މީހުންނަށް ވަނީ ދެ ޑޯޒް ދީފައެވެ. އެއީ 1.4 ބިލިއަން މީހުންގެ 60 އިންސައްތަ މީހުންނެވެ. ބައެއް މާހިރުން ލަފާކުރާ ގޮތުގައި ޗައިނާގެ ވެކްސިން ޖަހަންޖެހޭ އާބާދީގެ 80 އިންސައްތައަށް ވުރެ މައްޗަށް ވެކްސިން ދޭންޖެހޭނެއެވެ.

ޗައިނާގައި ޖޫން މަހު ދުވާލަކު 19 މިލިއަން ޑޯޒް ޖަހާފައިވެއެވެ. އެއަދަދު ޖުލައި މަހާއި އޮގަސްޓް މަހު ހުރީ ދުވާލަކު 13 މިލިއަން ޑޯޒްގައެވެ.

ޗައިނާއިން މަސައްކަތްކުރަމުން އަންނަނީ އޮކްޓޯބަރ މަސް ނިމެންވާއިރަށް 1.1 ބިލިއަން މީހުންނަށް ދެ ޑޯޒް ދިނުމަށެވެ. އަދި ވަކި އުމުރުފުރާތަކުގެ މީހުންނަށް ބޫސްޓަރ ޝޮޓް ދިނުމަށް އަންނަނީ މަސައްކަތްކުރަމުންނެވެ. އެގޮތުން އުމުރުން ދުވަސްވީ މީހުންނާއި މަސައްކަތްކުރާ މީހުންގެ ތެރެއިން ހައި ރިސްކު މީހުންނަށް ބޫސްޓަރ ޝޮޓް ދިނުމަށް ވަނީ ހަމަޖެހިފައެވެ.

ޗައިނާއިން ވަނީ މިހާތަނަށް ދުނިޔޭގެ އެކި ގައުމުތަކަށް 1 ބިލިއަން ޑޯޒް ދީފައެވެ. ޗައިނާގެ ރައީސް އޮގަސްޓް މަހު ވިދާޅުވެފައިވަނީ މިއަހަރު ނިމެންވާއިރަށް ޗައިނާއިން 2 ބިލިއަން ޑޯޒް ގައުމުތަކަށް ފޯރުކޮށްދިނުމަށް މަސައްކަތްކުރަމުންދާ ކަމަށެވެ.