ހޮރެކާ އެކްސްޕޯ އޮކްޓޫބަރު މަހު!

ސަޕްލައި އެމްވީގެ ފަރާތުން ބާއްވާ އަހަރީ ހޮރެކާ އެކްސްޕޯގެ ދެވަނަ ހަރަކާތް އޮކްޓޫބަރު މަހުގެ 15ވަނަ ދުވަހުގައި ބޭއްވުމަށް ތާވަލްކޮށްފިއެވެ.

އިންޓަރނެޓްގެ ޒަރިއްޔާއިން ވާރޗުއަލްކޮށް ކުރިއަށްގެންދާ މިއެކްސްޕޯގައި ދިވެހި އަދި ބޭރުގެ ވިޔަފާރިތަކު ގެ ރިޒޯރޓް، ހޮޓާ، ގެސްޓްހައުސް ތަކަށް ހާއްސަ މުދާތައް ދައްކާލުމުގެ ފުރުޞަތު ލިބިގެން ދާނެ ކަމަށް ސަޕްލައި އެމްވީ އިން ބުނެއެވެ.

ޓޫރިޒަމް މިނިސްޓްރީ އަދި ރާއްޖޭގެ ޝެފުންގެ ޖަމްޢިއްޔާއިން ވަނީ މިއެކްސްޕޯ އެންޑޯރސްކޮށްފައެވެ. އެގޮތުން ޓޫރިޒަމް މ މިނިސްޓަރ ޑރ. އަބްދުﷲ މައުސޫމް ވަނީ މިއެކްސްޕޯއިން ކުދި އަދި މެދުފަންތީގެ ވިޔަފާރިތަކަށް ކުރުރާސްތާގައި އަދި ދުރުރަސްތާގައި ފައިދާ ކުރާނެކަމަށް ވިދާޅުވެފައެވެ.

މިއެކްސްޕޯ ތެރޭގައި ކެއްކުމުގެ މުބާރާތަކާއި، މިކްސޮލޮޖީ، ކޮފީ އަދި ހައުސްކީޕިންގ މުބާރާތްތަކެއް ބޭއްވޭނެކަމަށް ސަޕްލައިއެމްވީ އިން މައުލޫމާތުދެއެވެ. އެކުންފުނިން ބުނީ އަމާޒުކުރަނީ އެކި ސިނާއަތްތަކުގައި މަސައްކަތްކުރާ ހުނަރުވެރި މަސައްކަތްތެރީންގެ ހުނަރުދައްކާލުމަށް ފުރުޞަތުދިނުމަށް ކަމަށެވެ.

ސަޕްލައިއެމްވީގެ މެނޭޖިންގ ޑިރެކްޓަރ ރާއިދް ޝާޒް ވަލީދް ވަނީ ފާއިތުވެގެންދިޔަ އަހަރުތެރޭގައި އެކުންފުނިން މަސައްކަތް ކުރީ މީހުންނާއި މުއައްސަސާތައް ގުޅުވާދިނުމުގެ އެންމެ ފުރަތަމަ ސަފުގައި ސާބިތުވެ ހުރުމަށްކަމަށް ވިދާޅުވެފައެވެ. އަދި ނިއު ނޯރމަލްއަކަށް ދުނިޔެ އަހުލުވެރިވަމުންދާއިރު މަސައްކަތްކުރަނީ ވިޔަފާރިތަކަށް ފަސޭހަ ޕްލެޓްފޯރމްއެއް ގާއިމްކުރުމަށް ކަމަށާއި މައިކްރޮސޮފްޓްގެ ސްޓާރޓްއަޕް ޕްރޮގްރާމްގެ ދަށުން، އެބޭފުޅުންގެ އެއްބާރުލުން ލިބުމުގެ ނަސީބު ސަޕްލައިއެމްވީ އަށް ލިބުނު ކަމަށެވެ.

މީގެއިތުރުން ޕްރޮޖެކްޓް ފޯމޯ ގެ ދަށުން، ވައިރަލް މާރކެޓިން އަށް ހާއްސަ ބައިންލަ އަގްވާމީ ޕްރޮޑަކްޓެއް ނެރެފައިވާ ކަމަށާއި ގަބޫލުކުރަނީ މިއެކްސްޕޯގެ ތެރެއިން ހޮރެކާ އިންޑަސްޓްރީ ކުރިއެރުވުމަށް ބޭނުންވާނޭ ހުރިހާ ވަސީލަތެއް އަތުގައި އެބަހުރިކަމަށް ކަމަށް އޭނާ ވަނީ ވިދާޅުވެފައެވެ.

ފަތުރުވެރިކަމުގެ ދާއިރާއަށް އަމާޒުކޮށް ސަޕްލައި.އެމްވީއިން އެންމެފަހުން ޖޫން މަހުގައި ބޭއްވި ފުޑް އެންޑް ބެވަރޭޖް އެކްސްޕޯގައި ފުރަތަމަ ވާޗުއަލް ކެއްކުމުގެ މުބާރާތް ބޭއްވުނެއެވެ. އެއެކްސްޕޯގައި 50،000ށް ވުރެ ގިނަ މީހުންބައިވެރިވިއެވެ. އަދި 100ށް ވުރެ ގިނަ ރިޒޯރޓްތަކުން އެކްސްޕޯގައި ބައިވެރިވެފައިވެއެވެ.