އަމިއްލަ މަސްލަހަތަށް މަސައްކަތް ކުރުމުގެ ޖާގަ އޭސީސީގައި މިހާރަކު ނޯންނާނެ: ޝިއުނާ

ސިޔާސީ އަމިއްލަ މަސްލަހަތަށް މަސައްކަތްކުރުމުގެ ޖާގައެއް މިހާރު އެންޓި ކޮރަޕްޝަން ކޮމިޝަން (އޭސީސީ)ގައި ނޯންނާނެ ކަމަށް އެ ކޮމިޝަންގެ ރައީސް މަރިޔަމް ޝިއުނާ ވިދާޅުވެއްޖެއެވެ.

އެންޓި ކޮރަޕްޝަން ކޮމިޝަންގެ އައު ވެބްސައިޓް އިފްތިތާހު ކުރުމަށާއި، މުވައްޒަފުންގެ ޚިދުމަތުގެ އަގު ވަޒަން ކުރުމަށް ބުރާސްފަތި ދުވަހުގެރޭ ބޭއްވި ހަފްލާގައި ވާހަކަދައްކަވަމުން ކޮމިޝަންގެ ރައީސް މަރިޔަމް ޝިއުނާ ވިދާޅުވީ އޭސީސީގެ މަސައްކަތް ހުންނަ ގޮތުން އެ ކޮމިޝަނަށް އަބަދުވެސް ފާޑުކިޔުން އަމާޒުވާ ކަމަށެވެ. ކޮމިޝަނުގެ މަސައްކަތްތަކާއިމެދު އަންނަ ފާޑުކިޔުންތައް ސިޔާސީ މަގުސަދުތަކުގައާއި، އަމިއްލަ މަސްލަހަތުގައި އަންނަ ކަމަށް ޝިއުނާ ވިދާޅުވިއެވެ. މައްސަލަތަކުގައި ތުހުމަތުކުރެވޭ މީހުންގެ ފަރާތުންނާއި، އަދި އޭސީސީން ރަނގަޅުކުރަންޖެހޭ ކަންކަމާ ގުޅޭގޮތުން އެ ކޮމިޝަނަށް ފާޑުކިޔުން އަމާޒުވާ ކަމަށެވެ.

ޝިއުނާ ވިދާޅުވީ މިފަދަ ކޮންމެ ކަހަލް ފާޑުކިޔުމެއް އަޔަސް އެކަން ބަލައިގަންނާނެ ކަމަށެވެ. އަދި އެ ކޮމިޝަނުގައި ސިޔާސީ އަދި އަމިއްލަ މަސްލަހަތަށް މަސައްކަތްކުރުމުގެ ޖާގައެއް މިހާރު ނޯންނާނެ ކަން އޭނާ ފާހަގަކުރެއްވިއެވެ.

ޝިއުނާ ވިދާޅުވީ ކޮމިޝަނާ ހަމައަށް އަންނަ ފާޑުކިޔުންތަކާއި ގުޅިގެން ހައްލު ކުރަންޖެހޭ ކަންކަން ހައްލު ކުރުމުގައި ބައެއް ފަހަރު ގޮންޖެހުންތަކާ ކުރިމަތިވި ނަމަވެސް އެކަންކަމަށް ހައްލު ހޯދަން އަބަދުވެސް މަސައްކަތްކުރާ ކަމަށެވެ. މީގެ އިތުރުން ކޮރަޕްޝަނާއި ގުޅިގެން އެ ކޮމިޝަނަށް ހުށަހެޅޭ މައްސަލަތައް ހައްލުކުރުމަށް ކުރާ މަސައްކަތުގައިވެސް ގޮންޖެހުންތަކާ ކުރިމަތިލާންޖެހޭ ކަމަށާއި، އަދި އެ ކޮމިޝަނުން އަންނަނީ އެ ކަންކަމާވެސް ކުރިމަތިލަމުން ކަމަށް ޝިއުނާ ވަނީ ވިދާޅުވެފައެވެ.

ދައުލަތުގެ މުއައްސަސާތަކުގެ ތެރޭގައި ކޮރަޕްޝަން އޮންނަ މިންވަރުގެ ވާހަކައަކީ އަބަދުވެސް ދެކެވެމުން އަންނަ ވާހަކައެކެވެ. ވަކިން ޚާއްސަކޮށް ރައީސް ޔާމީންގެ ސަރުކާރު ނިމުނުއިރު މުއައްސަސާތަކުގައި ކޮރަޕްޝަން އޮތް މިންވަރު ވަނީ އިންތިހާއަށް ބޮޑުވެފައެވެ. އެހެންކަމުން މި ސަރުކާރު ވުޖޫދުވެގެން އައީ ސަރުކާރުގެ މުއައްސަސާތަކުގެ އެތެރޭގައި ކޮރަޕްޝަން އޮތް މިންވަރު ކުޑަކުރުމުގެ ވައުދާއިއެކުއެވެ.