ހަމަލާދިނީ ސިޔާސީ ބޭނުމަކު ޓާގެޓްކޮށްގެންނެއް ނޫން، މަސްތުވެ ހުރެ: މީކާއީލް

އެމްޑީޕީ އޮފީހުގައި ބުރާސްފަތި ދުވަހުގެ މެންދުރެއް ހާއިރު ހިންގި މާރާމާރީއެއްގައި ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް އަޙުމަދު ނަސީމްގެ މަންމަ، މަރިޔަމް ޒުބައިރު (މަންދީ)އަށް ހަމަލާ ދިނީ ޓާގެޓް ކޮށްގެން ސިޔާސީ ބޭނުމަކު ނޫން ކަމަށް މީކާއިލް ވިދާޅުވެެއްޖެއެވެ.

މިމާރާމާރީއާ ގުޅިގެން ފުލުހުން ބުނީ އެމްޑީޕީ އޮފީސް ތެރޭގައި މާރާމާރީއެއް ހިންގިކަމުގެ މައުލޫމާތު ބުރާސްފަތި ދުވަހުގެ މެންދުރު 12:30 ހާއިރު ފުލުހުންނަށް ލިބުނުކަމަށެވެ. އެ މާރާމާރީގައި އަނިޔާވި އުމުރުން 50 އަހަރުގެ އަންހެނަކަށް އޭޑީކޭ ހޮސްޕިޓަލުގައި ފަރުވާދެމުންދާ ކަމަށްވެސް ފުލުހުން ބުނެފައިވެއެވެ. ނަމަވެސް މާރާމާރީ ހިނގާފައިވާ ގޮތުގެ އިތުރު ތަފްސީލެއް ފުލުހުން ހާމަކޮށްފައެއްނުވެއެވެ.

ސޯޝަލް މީޑިޔާގައި އާންމުވެފައިވާ ފޮޓޯތަކަށް ބަލާއިރު އެމްޑީޕީ އޮފީސްތެރޭގައި މާރާމާރީ ހިންގާފައިވަނީ ޗޭނު ގަނޑަކުންނެވެ. މިހަމަލާގައި މަންދީގެ އިތުރުން އެއޮފީހުގައި މަސައްކަތްކުރާ އެހެން މީހަކަށްވެސް ވަނީ އަނިޔާ ލިބިފައެވެ.

މަންދީއަށް ދިން ހަމަލާއާ ގުޅިގެން މީކާއީލް ކުރެއްވި ޓްވީޓެއްގައި ވިދާޅުވީ މަންމަ އަށް ދިން ހަމަލާއަކީ ބަޔަކު ރާވައިގެން ދިން ހަމަލާއެއް ނޫންކަމަށެވެ. އަދި މަންމަގެ ހާލު މިހާރު ރަނގަޅުކަމަށްވެސް މީކާއީލް ވަނީ ވިދާޅުވެފައެވެ. އަދި މިއީ މަސްތުގެ ހާލުގައި މީހަކު ހުރެގެން ދިން ހަމަލާއެއްކަމަށްވެސް މީކާއީލް ވަނީ ވިދާޅުވެފައެވެ.

ސޯސަން މަގުގައި ހުންނަ އެމްޑީޕީ އޮފީސް ތެރޭގައި ހިންގި މާރާމާރީ ކުށްވެރިކޮށް އެޕާޓީން ވަނީ ބަޔާނެއް ނެރެފައެވެ. އެބަޔާނުގައި ބުނެފައިވަނީ އެމް.ޑީ.ޕީ. ސެކްރެޓޭރިއެޓްގައި ހިމެނޭ މުވައްޒަފަކު އޮފީސްތެރޭގައި ހިންގި މާރާމާރީގެ ޢަމަލު އެ ޕާޓީން ކުށްވެރިކޮށް، އެފަދަ ޢަމަލުތައް މި ޕާޓީން ޓޮލަރޭޓް ނުކުރާނެކަން ހާމަކުރާކަމަށެވެ. އަދި އަވަސް ޖިނާއީ ތަހުގީގެއް ހިންގުމަށް ގޮވާލާ ކަމަށެވެ.

މަންދީއަށް ދިން ހަމަލާއާ ގުޅިގެން ރައީސް މުހައްމަދު ނަޝީދުވެސް ވަނީ, އެމްޑީޕީ އޮފީސްތެރޭގައި މާރާމާރީ ހިންގުން ބަލައިނުގަނެވޭކަމަށް ވިދާޅުވެ ޓްވީޓް ކުރައްވާފައެވެ. ރައީސް ނަޝީދު ކުރެއްވި ޓްވީޓްގައި އިތުރަށް ވިދާޅުވެފައިވަނީ އެކަންކުރި މީހުން ހައްޔަރުކޮށް އަނިޔާގައި ގެއްލުންވި ފަރާތްތަކަށް އިންސާފު ލިބެންޖެހޭ ކަމަށެވެ.

މައުލޫމާތު ލިބިފައިވާ ގޮތުގައި އެމްޑީޕީ އޮފީހަށް ވަދެ ހަމަލާދީފައިވަނީ އެއޮފީހުގައި މަސައްކަތްކުރާ މުވައްޒަފެކެވެ. އޭނާއަކީ އެމްޑީޕީ އޮފީހުގެ ޕިއޯން ކަމުގެ ވަޒީފާ އަދާކުރަމުންދާ ޖަޒީލް ކަމަށްވެއެވެ.