ސިޔާސީ ތަރިތައް އޮއްސެނީ ހިފަހައްޓާލަން ނޭގުމުންތަ؟
ސިޔާސީ ޕާޓީތަކުގެ ނިޒާމު ފުރާފުރިހަމަވެގެން އައުމަށް ވަގުތު ބޭނުންވި
އެމްޑީޕީގެ ޖަލްސާއެއްގެ ތެރެއިން
އިންސާނަކަށް ލިބޭނެ އެންމެ ބޮޑު އުފަލަކީ އޭނާއަށް ލިބޭ ހިތްހަމަޖެހުމެވެ. އޭނާއަށް އޮތް މިނިވަންކަމެވެ. މިރާއްޖޭގެ ދިގު ތާރީޚުގައި ސިޔާސީ ގޮތުން އަރައިގެންއައި ކޮންމެ ތަރިއެއް މެދު އުޑުގައި ފިޔަޖެހުމަށްފަހު އޮއްސިގެން ގޮސްފައިވަނީ ކަރަށް މެހިގެންދާ މަޅި އަމިއްލަ ލޮލަށް ނުފެނިގެންނެވެ.
އެމްޑީޕީއަކީ މިރާއްޖެ ބަދަލުކުރުމަށް ނިކުމެ މަސައްކަތް ފަށައިގަތް މީހުންގެ އުންމީދެވެ. އެޕާޓީ ބިޔަވެ ބޮޑުވެގެން ގޮސް އެއީ މިއަދު މިގައުމުގައި އޮތް އެންމެ ބޮޑު ސިޔާސީ ޕާޓީއެވެ. ވެރިކަން އެކުރަނީ ދެވަނަ ފަހަރަށެވެ. އެހެން ގައުމުތަކާ ޚިލާފަށް މިގައުމުގައި ޕާޓީ ނިޒާމު ތައާރަފުވެގެން ފުރާ ފުރިހަމަވެގެން އައުމަށް ވަގުތު ބޭނުންވިއެވެ. އޭގެ އެންމެ ބޮޑު ސަބަބަކީ ދިވެހިންނަށް މަލްޓި ޕާޓީ ސިސްޓަމް މުޅިން އައު ވުމޭވެސް ބުނެވިދާނެއެވެ.
ދިވެހިންނަށް މިހާރު ލިބިފައިވާ ގާނޫނުއަސާސީގެ ދަށުން 2008 ގައި ބޭއްވި ރިޔާސީ އިންތިޚާބާ ހަމަޔަށް ދަތުރުކުރިއިރު ވެރިކަމަކީ ވަކި މީހަކަށް އޮތް އެއްޗެއް ނޫން ކަމުގެ އަޑު އޮތީ ގަދަވެފައެވެ. އަނިޔާވެރިކަމުގެ ކުރިމަތީގައި އެމްޑީޕީން އެދުވަހު ބެހެއްޓި އައްޑަނައިގައި އޮތީ ވެރިކަމުގެ ބާރުތައް ފެށިގެން އަންނަނީ ރައްޔިތުންގެ ކިބައިންކަމެވެ. އަދި ވެރިކަމަކީ އަބަދުމެ އެކަކަށް ޚާއްސަވެގެންވާ އެއްޗެއް ނޫން ކަމަށެވެ.
އެންމެ ފުރަތަމަ 2008ގައި އުފެދުނު އެމްޑީޕީގެ ވެރިކަމުގައި ނިއުޅި އެއްލިގެންދިޔަ ކިތަންމެ ސަފްހާއެއް އަޅުގަނޑުމެން ދުށީމެވެ. ނުކުރާންޖެހޭ ކިތަންމެ ކަމެެއް ކުރެވި ވެރިކަމާ ހަމަޔަށް އައުމަށް ދަތުރުކުރި “ވަތަން އެދޭ” ބިޔަ ކޯލިޝަން ރޫޅިގެން ދިޔަ ގޮތް ހަނދާނުން ފޮހެވިގެން ނުދެއެވެ. ކޯލިޝަން ރޫޅުމަށް ފަހު ވެރިކަމުގެ ވަށައިގެން ނަގަމުންދިޔަ ބިޔަ ރާޅުތައް ބިންދަމުން ދިޔައީ ސީދާ އޮޑީގެ އެތެރެއަށެވެ. މާސިންގާ ކަނޑުގައި އެހެންނަގާ ރާޅުގައި އަޑިޔަށް ފެތިގެންދާ އޮޑިއެއް ސަލާމަތްކުރަން ހުރިތަނުން ތައްޔާރުވެގެން ހަރަކާތްތެރިވާން ތިބޭނީ ދިވެހި ސަލާމަތީ ޚިދުމަތުގައި ހަރަކާތްތެރިވާ ބޭފުޅުންނެވެ. އެހެން ނަމަވެސް ދިޔަވެ ކޮޅުފަސްކޮޅު ލޮނުގައި އޮތް އޮޑިއަކަށް އެދުވަހު ފުރިހަމަ އެހީތެރިކަމެއް ނުލިބުނެވެ. ކޮންމެއަކަސް ވީގޮތެއް އެއޮތީވެ ނިމިގޮސްފައެވެ. ލިބޭ ބާރެއް ހިފެހެއްޓުމުގައި އިދިފުށަށް ވިޔަސް ވެރިމީހާ ލެނގިލަންޖެހޭނީ ބިންދައިގެންނުދާ މިންވަރަށެވެ.
ވެރިކަމާ ހިފާ ހިފުމުގައި 2013 ގައިވެސް އެމްޑީޕީ އިން ވާދަކުރަން ނިކުތީ މިޒަމާނުގެ ބަހުރުވައިން ބުނާނަމަ ފިސާރި “ގަދަ” ކޮށެވެ. ލިޔެވިފައި އޮތް މެނިފެސްޓޯއާ އަތުގައި އޮތް އެއްްޗެއް ހިފައިގެން އަލުން ވެރިކަމާ ހަވާލުވުމަށެވެ. ނަމަވެސް އިންތިޚާބުގެ 2 ވަނަ ބުރުގައި 2008 ގައި އެމްޑީޕީއާއެކު އެކުގައި މަސައްކަތްކުރި ޕާޓީތައް އެމްޑީޕީއާ ގުޅިގެން މަސައްކަތް ކުރާކަށް އެއްބަހެއް ނުވިއެވެ. އޭރު ކުރެވުނު މަޝްވަރާތަކާ އެމަޝްވަރާތަކުން ނިކުތް ނަތީޖާ އެންމެ ގާތުން އަޑުއިވުނު ބޭފުޅަކަށް ވާނީ މިހާރުގެ އެމްޑީޕީގެ އެންމެ އިސްލީޑަރު އިބުރާހިމް މުހައްމަދު ސާލިހެވެ. އެދުވަހު ދެކެވިފައި ހުރީ ލައްކަ ވާހަކައެވެ. އެވާހަކަތަކާއި ތަޖުރިބާ އެމަނިކުފާނުގެ ވެރިކަމުގައި ބޭނުން ކުރައްވާނެއެވެ.
އިރުއަރަމުން އޮއްސެމުން ކަޅުފޮއި އަނދިރި ރޭތައް ބައްދަލުކޮށް އަލުން އަލިވިލެމުން ދުވަސްތައް މަސްތަކަށް ބަދަލުވެ، މަސްތައް އަހަރުތަކަށް ބަދަލުވެގެން ދިޔައީއެވެ. އަލުން އެމްޑީޕީގެ ވެރިކަމެއް މިވަނީ އުފެދިފައެވެ. އެކަމަކު އަނެއްކާ ވެސް ގިނަ ޕާޓީތައް އެކުލެވޭ ގޮތަށެވެ.
ކުރީފަހަރާ މިފަހަރާ އެމްޑީޕީއަށް ވެސް އަދި ގުޅިފައިވާ ޕާޓީތަކަށް ވެސް އޮތް ތަފާތަކީ ރައީސުލްޖުމްހޫރިއްޔާގެ މަގާމުގައި ހުންނެވި ބޭފުޅަކު ގެންގުޅުއްވާ އުސޫލުތަކުގައި އޮތް ތަފާތެކެވެ. ދިވެހިން ބޭނުންވިފަދަ ވެރިކަމެެއް އަލުން އުފެއްދުމަށް ކުރެވުނު ގިނަ މަސައްކަތްތަކުގައި ގުޅިގެން މަސައްކަތްކުރެއްވި އެންމެހާ ފަރާތްތައް ބާކީ ކޮށްލުމެއްނެތި ކުރިއަށްދާ ކުރިޔަށް ދިޔުމެވެ. އެމްޑީޕީ ބިޔަވެބޮޑުވެގެން އައުމުގައި ކުރިމަތިވި ރަނގަޅު ކަންކަން ރޫޅާނުލައި ހިފެހެއްޓުމެވެ. ސަރުކާރަކީ ރައްޔިތުންކަމާއި، ބާރުތައް ފެށިގެން އަންނަނީ ވެސް ރަައްޔިތުންގެ ކިބައިން ކަމަށް ގަބޫލު ކުރެއްވުމެވެ. ރައްޔިތެއްގެ ހިތްހަމަޖެހުމާ މިނިވަންކަން ވެރިކަމުގައި ހުންނަވާއިރު ފުރިހަމައަށް ވަޒަންކުރެވިފައި އޮތުމެވެ.
