މުސާރައިން އުނިވެފައިވާ ފައިސާ ދިނުމާއި އިތުރަށް ދެވިފައިވާ ފައިސާ، އަނބުރާ ހޯދުމުގެ މަސައްކަތް ދަނީ ކުރަމުން - ފިނޭންސް

އޮގަސްޓް މަހުގެ މުސާރަ ޖަމާކުރިއިރު ހެލްތު ސެކްޓަރގެ ބައެއް މުވައްޒަފުންނަށް މުސާރަ ޖަމާކުރުމުގައި އުނި އިތުރު އައިސްފައިވާ މައްސަލަބަލައި މުސާރައިން އުނިވެފައިވާ ފައިސާ ދިނުމާއި އިތުރަށް ދެވިފައިވާ ފައިސާ, އަނބުރާ ހޯދުމުގެ މަސައްކަތް ކުރަމުންދާކަމަށް ފިނޭންސް މިނިސްޓްރީން ބުނެފިއެވެ.

ފިނޭންސް މިނިސްޓްރީން ބުނީ އެމިނިސްޓްރީން މިހާރު ދަނީ ދައުލަތުގެ މާލިއްޔަތުގެ ގަވާއިދުގައިވާ ގޮތުގެ މަތިން މުސާރަ އުނިވެފައިވާ ފަރާތްތަކަށް އެ ފައިސާ ދިނުމާއި އިތުރަށް ދެވިފައިވާ ފައިސާ އަނބުރާ ހޯދުމުގެ މަސައްކަތްކުރަމުން ކަމަށެވެ. މި މައްސަލަ ފާހަގަކުރެވުމާއެކު ކަމާ ގުޅޭ އިދާރާތަކާ ގުޅިގެން އެ ފައިސާ އަނބުރާ ހޯދުމުގެ މަސައްކަތް ފަށާފައިވާކަމަށާއި ކުރިމަގުގައި މިފަދަ ކަމެއް ތަކުރާރު ނުވާނެ ގޮތަށް މުސާރަ އާއި ގުޅުންހުރި މަސައްކަތްތައް ރާވާފައިވާ ކަމަށް މިނިސްޓްރީން ބުނެއެވެ.

މިނިމުނު އޮގަސްޓް މަހުގެ މުސާރަ މުވައްޒަފުންނަށް ޖަމާކުރިއިރު ހެލްތު ސެކްޓަރގައި މަސައްކަތް ކުރާ 1796 މުވައްޒަފުންނަށް މުސާރައިގެ އުނި އިތުރު އައިސްފައިވާކަން ވަނީ ފާހަގަކުރެވިފައެވެ. ބައެއް މުވައްޒަފުންނަށް އިތުރަށް ފައިސާ ޖަމާކުރެވިފައިވާއިރު ބައެއް މުވައްޒަފުންނަށް މުސާރަ ޖަމާވެފައިވަނީ މަދުންނެވެ. މިކަން ފިނޭންސް މިނިސްޓްރީގެ ސަމާލުކަމަށް އައިސްފައިވަނީ 31 އޮގަސްޓް 2021 ވަނަ ދުވަހުގެރޭ 7:45 ގައެވެ. މިގޮތަށް ދިމާވެފައިވަނީ މުސާރަ ޝީޓްގެ އަދަދުތައް އިސްފަސްވުމުގެ ސަބަބުންކަމަށް މިނިސްޓްރީން މައުލޫމާތުދެއެވެ.

މުވައްޒަފުންނަށް އިތުރަށް ޖަމާވި ފައިސާ ބޭނުން ނުކުރުމަށް ހެލްތު މިނިސްޓްރީ މެދުވެރިކޮށް ފިނޭންސުން މުވައްޒަފުންނަށް އަންގާފައިވާއިރު، އާންމު އުސޫލެއްގެ ގޮތުން މުސާރަ ސްލިޕާ ނުބައްދަލު އަދަދެއްގެ މުސާރަ ޖަމާވެއްޖެ ނަމަ އެ ފައިސާ ބޭނުންކޮށްގެން ނުވާނެއެވެ. ބޭންކުތަކަށް މުސާރަ ޝީޓު ފޮނުވުމުގައި ހެދުނު ގޯސްތަކެއްގެ ސަބަބުން މި މައްސަލަ ފެންމަތިވިއިރު، ބޭންކުތައް މެދުވެރިކޮށް އެ ޓްރާންސްފާތައް ރިވާސްކުރުމުގެ މަސައްކަތް ކުރެވެމުންދާ ކަމަށާއި، މިއަދުގެ ވަގުތެއްގައި އެކަން ހައްލުކުރެވޭނެ ކަމަށް މިނިސްޓްރީން ވަނީ ބުނެފައެވެ.

އޮގަސްޓް މަހުގެ މުސާރަ ޖަމާވިއިރު ބައެއް މުވައްޒަފުންނަށް މުސާރައިގެ ގޮތުގައި 70،000 ރުފިޔާ އާއި 95،000 ރުފިޔާ ފަދަ އަދަދުތަކުން މުސާރަ ޖަމާވެފައިވާއިރު، އަނެއް ބައި މުވައްޒަފުންނަށް މުސާރަ ސްލިޕުގައި ބުނާ އަދަދަށް ފައިސާ ޖަމާވެފައެއް ނުވެއެވެ.