އަލްޤައިދާގެ މައި ލީޑަރު، އަދި އުސާމާގެ އެންމެ އަރިސް މީހާ 20 އަހަރަށްފަހު އަމިއްލަ ވަޒަނަށް!
31 އޯގަސްޓު 2021 | އަންގާރަ 07:1120 އަހަރުވަންދެން އެ ޤައުމުގައި އޮތް އެމެރިކާގެ ބާރު ވަނީ ކެނޑިފައި
އަމީން އަނބުރާ ނަހަންގާރް ޕްރޮވިންސަށް ދިޔައިރު، ވަށައިގެން އަލްޤައިދާގެ ހަނގުރާމަވެރިން ހަތިޔާރާއެކު އޭނައަށް ރައްކާތެރިކަން ފޯރުކޮށްދެނީ
އަލްޤައިދާގެ މިވަގުތުގެ މައި ލީޑަރު އަމީނުލް ޙައްޤު 20 އަހަރަށްފަހު އަމިއްލަ ވަޒަން، އަފްޣާނިސްތާނަށް އެނބުރި ގޮސްފިއެވެ.
އަލްޤައިދާގެ ކުރީގެ ޗީފް އުސާމާ ބިން ލާދިންގެ އެންމެ އަރިސް އެކަކު ކަމަށްވާ އަމީނުލް ޙައްޤު އަފްޣާނިސްތާނަށް އެނބުރި ގޮސްފައި މިވަނީ 20 އަހަރުވަންދެން އެ ޤައުމުގައި އޮތް އެމެރިކާގެ ބާރު ކެނޑި، ޠާލިބާނުންގެ ބާރުގެ ދަށަށް އެ ޤައުމު ގޮސްފައިވާ ދަނޑިވަޅެއްގައެވެ. އޭނާ ވަނީ އަފްޣާނިސްތާނުގެ އޭނާގެ ވަޒަން ނަހަންގާރް ޕްރޮވިންސަށް އެނބުރި ގޮސްފައެވެ.
އަމީންއަކީ ބިން ލާދިން ފިއްލެވުމަށް އަފްޣާންގެ ތޯރާބޯރާ ފަރުބަދައިގައި މަޑު ކުރެއްވިއިރުވެސް ބިން ލާދިންއާއެކު މަޑު ކުރި މީހެކެވެ. އޭރު ބިންލާދިންގެ ސެކިއުރިޓީ އިންޗާޖަކަށް ވެސް ހުރީ އަމީންއެވެ. 80 ގެ އަހަރުތަކުގައި އުސާމާ ބިން ލާދިންގެ އެންމެ އަރިސް އެކެއްގެ ގޮތުގައި ވެސް ހުރީ އަމީނެވެ. އޭނާ އަނބުރާ ނަހަންގާރް ޕްރޮވިންސަށް ދިޔައިރު، ވަށައިގެން އަލްޤައިދާގެ ހަނގުރާމަވެރިން ހަތިޔާރާއެކު އޭނައަށް ރައްކާތެރިކަން ފޯރުކޮށްދީފައިވެއެވެ.
އަމީނަކީ އެމެރިކާގެ ޓްރެޜަރީން ގްލޯބަލް ޓެރަރިސްޓުންގެ ގޮތުގައި ކަނޑައަޅާފައިވާ ލިސްޓުގައި ވެސް ހިމެނޭ މީހެކެވެ. އަދި ޔުނައިޓެޑް ނޭޝަންސްއާއި، އިނގިރޭސިވިލާތުން ވަނީ އޭނާއާ ދެކޮޅަށް ދަތިކުރުމުގެ ފިޔަވަޅުތައް ވެސް އަޅާފައެވެ.
މިއާއެކު އެމެރިކާގެ އަސްކަރިއްޔާއިންވަނީ 20 އަހަރުވީ ދިގު ހަނގުރާމަ ނިމުމަކަށް އައިކަން ރަސްމީކޮށް އިއުލާންކޮށްފައެވެ. އެމެރިކާގެ ސެންޓްރަލް ކޮމާންޑްގެ ޖެނެރަލް ކެނެތް މެކެންޒީ ވިދާޅުވީ، އޮގަސްޓް 14 ވަނަ ދުވަހުން ފެށިގެން މިހާތަނަށް 79،000 މީހުން އަފްޣާނިސްތާނުން ގެންގޮސްފައިވާ ކަމަށެވެ. އޭގެ ތެރޭގައި އެމެރިކާގެ 6،000 މީހުން ވެސް ހިމެނޭ ކަމަށް ވިދާޅުވިއެވެ. ސެޕްޓެމްބަރު 11، 2001 ގެ ހަމަލާއަށްފަހު އެމެރިކާ ސިފައިން ވަނީ 20 އަހަރު އަފްޣާނިސްތާނުގެ ފަސްގަނޑުގައި މަޑުކޮށްފައެވެ.
