ޔާމީން ހިޔާ ފްލެޓްގެ ނަމުގައި ހެދީ ޗޯޕަލްޕައްޓީއެއް- ބޮންޑާ

ކުރީގެ ރައީސް އަބްދުﷲ ޔާމީން ހިޔާ ފްލެޓްގެ ނަމުގައި ހެދީ ޗޯޕަލްޕައްޓީއެއް ކަމަށް މާފަންނު މެދުދާއިރާގެ މެންބަރު އިބްރާހިމް ރަޝީދު (ބޮންޑާ) ވިދާޅުވެއްޖެއެވެ.

އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާގައި ދިވެހިރާއްޖޭގެ ބިމާބެހޭ ގާނޫނަށް ހުށަހެޅި އިސްލާހުގެ ބިލަށް ވާހަކަ ދައްކަވަމުން ނައިފަރު ދާއިރާގެ ޕީޕީއެމް މެމްބަރ އަހުމަދު ޝިޔާމު ވަނީ މައުލޫޢުއިން ބޭރުން ވާހަކަ ދައްކަވައި ރައީސް ޔާމީނަކީ ރައްޔިތުންނަށް ހެޔޮއެދޭ ސިޔާސީ ލީޑަރެއް ކަމަށް ވިދާޅުވެފައެވެ. އަދި އެމަނިކުފާނު ޖަލުގައި ހުންނަވަނީ ނުހައްގުން ކަމަށް ތަކުރާރުކޮށް ވިދާޅުވެފައެވެ. އަދި ރާއްޖޭގައި ބިމުގެ އަގު ވައްޓާލާފައިވާ ކަމަށް ވިދާޅުވިއެވެ.

މި ވާހަކައަށް ރައްދު ދެއްވަމުން ބޮންޑާ ވިދާޅުވީ ހިޔާ ފްލެޓްގެ ނަމުގައި ހެދީ ޗޯޕަލްޕައްޓީއެއް ކަމަށާއި މައުލޫޢަށް ވާހަކަ ދެއްކެވުމަށް އިލްތިމާސް ކުރައްވާ ކަމަށެވެ. އަދި އެގޮތަށް މައުލޫއިން ބޭރުން ވާހަކަ ދައްކަވާތީ ރައްޔިތުންނަށް ވަރަށް ބޮޑަށް އޮޅޭ ކަމަށް ވިދާޅުވިއެވެ.

ބިން ވިއްކުމުގެ ބާރު ކައުންސިލަށް ދިނުމަށް ދިވެހިރާއްޖޭގެ ބިމާބެހޭ ގާނޫނަށް ހުށަހެޅި އިސްލާހުގެ ބިލު ސަރުކާރުގެ ފަރާތުން ހުށަހަޅުއްވާފައިވަނީ މަތިވެރި ދާއިރާގެ މެންބަރު ޙަސަން ޒަރީރެވެ. ބިލު ހުށަހަޅުއްވަމުން މެންބަރު ވިދާޅުވީ ސަރުކާރުން މި ބިލު ހުށަހެޅުމުގެ ބޭނުމަކީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ 150 ވަނަ މާއްދާގައި، އެ ގާނޫނާއި އެ ގާނޫނުގެ މަގްސަދުތަކާ ތަޢާރުޒުވާ ޤާނޫނުތައް ފާހަގަކުރަން ޖެހޭތީ ކަމަށެވެ.

އަދި އެ ގާނޫނަށް 9 ވަނަ އިސްލާހު ގެނައުމުގެ ގާނޫނަށް އަމަލުކުރަން ފެށި ތާރީޚުން ފެށިގެން 6 މަސް ދުވަހުގެ ތެރޭގައި އެފަދަ ގާނޫނުތަކަށް އިސްލާހު ގެނައުމަށްޓަކައި ރައްޔިތުންގެ މަޖިލީހަށް ހުށަހަޅަންވާނެ ކަމަށް ބަޔާންކޮށްފައިވާތީ، ދިވެހިރާއްޖޭގެ ބިމާބެހޭ ގާނޫނުގައި އެކުލެވޭ، ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ މަގްސަދުތަކާ ތަޢާރުޒުވާ ކަންކަން އިސްލާހު ކުރުމަށްޓަކައި، ގާނޫނަށް ގެންނަންޖެހޭ އިޞްލާޙުތައް ގެނައުން ކަމަށެވެ.

ބިލުގައި ބުނީ ކައުންސިލުތަކުގެ މިލްކުވެރިކަމުގެ ދަށުގައިވާ ބިން އެ ކައުންސިލުތަކުން ދޫކޮށް، ކުއްޔަށްދީ، ބިމާބެހޭ އެހެނިހެން މުޢާމަލާތްތައް ކުރަންވާނީ، މިޤާނޫނާއި، އެކި ބޭނުންތަކަށާއި ކަންކަމަށް އެކަށައަޅާ ބިންބިމާ ބެހޭގޮތުން ޢަމަލުކުރެވޭ ގާނޫނުތަކާއި ގަވާއިދުތަކުގައި ބަޔާންކޮށްފައިވާ ގޮތުގެމަތިން ކަމަށެވެ.

އަދި އިޤްތިޞާދީ ބޭނުމަށް އެކަށައަޅައި، މިޤާނޫނުގެ 5 ވަނަ މާއްދާގައިވާ ގޮތުގެމަތިން ކަމާބެހޭ މިނިސްޓްރީތަކާއި، ނުވަތަ ދައުލަތުގެ އިދާރާތަކާ ޙަވާލުކުރާ ބިމުން، ނުވަތަ ކައުންސިލުތަކުގެ މިލްކުވެރިކަމުގެ ދަށުގައިވާ ބިމުން، މި ޤާނޫނުގެ ދަށުންހަދާ ގަވާއިދުތަކާ އެއްގޮތްވާ ގޮތުގެމަތިން ވިޔަފާރީގެ އުސޫލުން މުއާމަލާތް ކުރެވިދާނެ ކަމަށެވެ.

މިގޮތުން ކަމާބެހޭ މިނިސްޓްރީތަކާ ނުވަތަ ދައުލަތުގެ ބިން ނުވަތަ ކައުންސިލުގެ މިލްކުވެރިކަމުގެދަށުގައިވާ ބިން އެ ފަރާތްތަކުން ޤާނޫނުތަކާ އެއްގޮތްވާ ގޮތުގެމަތިން، ދެވަނަ ފަރާތަކަށް ވިއްކައި ނުވަތަ ކުއްޔަށް ދޫކުރެވިދާނެ ކަމަށެވެ.