ޖަލަށް ސާމާނުތަކެއް އެތެރެކުރަން އުޅުނު މީހަކު ހައްްޔަރަށް: 92 ފޯނު ހިމެނޭ

މާފުށީ ޖަލަށް ގިނަ އަދަދެއްގެ ސާމާނުތަކެއް އެތެރެކުރަން އުޅުނު މީހަކު ފުލުހުން ހައްޔަރުކޮށްފިއެވެ.

އެކަން ހާމަކުރައްވާފައިވަނީ ހޯމަ ދުވަހު ކޮމިޝަނަރ އޮފް ޕޮލިސް (ސީޕީ) ކުރެއްވި ޓްވީޓެއްގައެވެ. ސީޕީގެ ޓްވީޓުގައި ވަނީ މިއީ ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން ހޯމަ ދުވަހުގެ ހެނދުނު ކުރިއަށް ގެންދިޔަ އޮޕަރޭޝަނެއްކަން ފާހަގަކުރައްވާފައެވެ. ސީޕީ ވިދާޅުވީ، މި އޮޕަރޭޝަން ހިންގާފައިވަނީ މާފުށީ ފުލުހުންނާއި، މޯލްޑިވްސް ކަރެކްޝަނަސް ސަރވިސަސް ގުޅިގެން ކަމަށެވެ.

މި އޮޕަރޭޝަންގައި މީހަކު ހައްޔަރުކޮށްފައިވަނީ މާފުށީ ގޮނޑުދޮށް ސަރަޙައްދުން ކަން ސީޕީ ފާހަގަކުރެއްވިއެވެ. ސީޕީ ވިދާޅުވީ، ޖަލަށް އެތެރެކުރުމަށްޓަކައި އޭނާ ގިނަ އަދަދެއްގެ ސާމާނުތަކެއް ގެންގުޅެނިކޮށް ހައްޔަރުކޮށްފައިވަނީ ހޯމަ ދުވަހުގެ ހެނދުނުގެ ވަގުތެއްގައި ކަމަށެވެ. އެގޮތުން އޭނާ އަތުން އަތުލައިގެން ތަކެތީގެ ތެރޭގައި 50 ސްމާޓްފޯނާއި، 42 ބައްތި ފޯނާއި، 109 ޗަރޖަރާއި، 77 ޔޫއެސްބީ ކޭބަލްގެ އިތުރުން، 65 ހެޑްސެޓާއި، 49 ދިރާގު ސިމް އަދި 12 އުރީދޫ ސިމާއި، އެނޫން ވެސް ގިނަ ތަކެއް ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ.

ޖަލުތަކުގައި ހިންގާ މިފަދަ ޚާއްސަ އޮޕަރޭޝަންތަކުގައި ގައިދީން ޖަލަށް ވެއްދުމަށް މަސައްކަތް ކުރަމުންދާ ތަކެތީގެ އިތުރުން، ޖަލަށް ވައްދާފައިވާ މިފަދަ ތަކެތި ދަނީ ފުލުހުންގެ ބެލުމުގެ ދަށަށް ގެންދަމުންނެވެ.

ކަރެކްޝަނުން އާންމުކޮށްފައިވާ އެންމެ ފަހުގެ ތަފާސްހިސަބުތައް ދައްކާ ގޮތުން މި އަހަރުގެ ތެރޭގައި ވެސް ގިނަ އަދަދެއްގެ އިލެކްޓްރޯނިކް ސާމާނުތަކާއި، މަސްތުވާތަކެތި މިފަދަ އޮޕަރޭޝަންތަކުގައި ހޯދާފައިވެއެވެ.