އައްޑޫ ސިޓީ މަރަދޫގައި ތަރައްޤީކުރާ ކަސްޓަމްސްގެ ސަރަހައްދީ މައި އޮފީސް އިމާރާތްކުރުމުގެ މަޝްރޫޢު ބަޔަކާ ހަވާލުކޮށްފިއެވެ.

ކަސްޓަމްސްއިން, ދެކުނު ސަރަހައްދުގެ ސަރަހައްދީ މައި އޮފީސް އިމާރާތްކުރުމުގެ މަޝްރޫޢު ހަވާލުކޮށްފައިވަނީ އެސް.ޖޭ ޓްރޭޑް ޕްރައިވެޓް ލިމިޓެޑާއެވެ. މި މަޝްރޫޢޫގެ އެއްބަސްވުމުގައި ކަސްޓަމްސްގެ ފަރާތުން ސޮއިކުރެއްވީ ކޮމިޝަނަރ ޖެނަރަލް އޮފް ކަސްޓަމްސް ޢަބްދުﷲ ޝަރީފްއެވެ. އަދި އެސް.ޖޭ ޓްރޭޑް ޕްރައިވެޓް ލިމިޓެޑްގެ ފަރާތުން ސޮއިކުރެއްވީ ޑިރެކްޓަރ ޝިހާދު އިބްރާހީމެވެ.

411 ދުވަހުގެ ތެރޭގައި ނިންމުމަށް އެބަސްވެފައިވާ, މި އޮފީސް އިމާރާތުގެ މަޝްރޫޢަކީ 22.3 މިލިޔަން ރުފިޔާގެ މަޝްރޫޢެއްކަމަށް ކަސްޓަމްސްއިން ބުނެއެވެ. މި މަޝްރޫޢާ ގުޅޭގޮތުން ކޮމިޝަނަރ ޖެނަރަލް އޮފް ކަސްޓަމްސް ވިދާޅުވީ އައްޑޫގައި ހަދާ ކަސްޓަމްސްގެ ސަރަހައްދީ އޮފީސް އިމާރާތާއެކު އެސިޓީގައި ކަސްޓަމްސްއިން ފޯރުކޮށްދޭ ޚިދުމަތްތައް އިތުރަށް ފުޅާވެ، ވިޔަފާރިވެރިންނަށް އިތުރު ލުއިފަސޭހަތަކެއް ލިބިގެންދާނެކަމަށެވެ.

އައްޑޫ ސިޓީ މަރަދޫގައި ކަސްޓަމްސްގެ ސައުތު ރީޖަނަލް ހެޑް އޮފީސް ޢިމާރާތްކުރުމަށް ބޭނުންވާ ބިން ދޫކުރުމުގެ އެއްބަސްވުމުގައި ސިޓީ ކައުންސިލާއެކު ކަސްޓަމްސްއިން ސޮއިކޮށްފައިވަނީ މިދިޔަ އަހަރުގެ ޖެނުއަރީ މަހުގެ ތެރޭގައެވެ. ކަސްޓަމްސްއިން އަންނަނީ މާލެ ސިޓީގެ އިތުރުން، ރާއްޖޭގެ 9 ސަރަޙައްދެއްގައި އެ މުއައްސަސާގެ އޮފީސްތައް ޤާއިމުކޮށް ޚިދުމަތް ދެމުންނެވެ.