ސްކޫލް ފޮތްތަކުގައި ނަފުރަތު އުފެއްދުމަށް މަގުފަހިވާގޮތަށް ހުރި ބައިތައް ބަލައި، ތަޢުލީމީ މަންހަޖަށް ބަދަލުގެނައުމުގެ މަސައްކަތް ފަށައިފިއެވެ.

މެއި 6 ގައި ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދަށް އަމާޒުކޮށް ދިން ހަމަލާއަށްފަހު ހަރުކަށި ފިކުރާއި ނަފުރަތު އުފެދޭފަދަ ކަންކަން ނައްތާލުމަށް ކުރާ މަސައްކަތް ސަރުކާރުން ވަނީ އިތުރުކޮށްފައެވެ. މި ހަމަލާއާ ގުޅޭގޮތުން ރައްޔިތުންގެ މަޖިލީހުގެ 241 ކޮމިޓީއިން ނެރުނު ރިޕޯޓާއެކު މި މަސައްކަތްތައް އަވަސްކުރުމަށް ވެރިކަން ކުރާ ކޯލިޝަންގެ މައި ޕާޓީ، އެމްޑީޕީއިން ވަނީ ޚާއްސަ މަސައްކަތްތަކެއް ފަށައި، އެކި މުއައްސަސާތަކާ ބައްދަލުކުރަމުންނެވެ. މިކަމާ ގުޅޭގޮތުން މައުލޫމާތު ހިއްސާކުރައްވަމުން އެމްޑީޕީގެ މެއި 6 ކޮމިޓީގެ މުޤައްރިރު ރައްޔިތުންގެ މަޖިލީހުގެ ވިލުފުށީ ދާއިރާގެ މެންބަރު ޙަސަން ޢަފީފް ވިދާޅުވީ އެންމެ ފަހުން އެ ކޮމިޓީއިން އެޑިއުކޭޝަން މިނިސްޓްރީއާއި ޔޫތް މިނިސްޓްރީއާ ބައްދަލުކުރެއްވިކަމަށެވެ.

އެޑިއުކޭޝަން މިނިސްޓްރީއާއެކު އޮގަސްޓް 26 ވަނަ ދުވަހު ބޭއްވި ބައްދަލުކުރެއްވުމުގައި އެޑިއުކޭޝަން މިނިސްޓަރ ޑރ. އައިޝަތު އަލީ ވަނީ އެ މިނިސްޓްރީއިން 241 ކޮމިޓީގެ ރިޕޯޓްގެ ރިކޮމެންޑޭޝަންތަކަށް އަމަލުކުރަމުންދާގޮތުގެ ތަފުސީލު އަރުވާފައެވެ. އެގޮތުން ހަރުކަށި ފިކުރަށް ސްކޫލް ކުދިންގެ ފިކުރު ބަދަލުކުރުމަށް އެކުދިންގެ ވިސްނުމާ ކުޅެން މަސައްކަތްކުރާކަން އެ މިނިސްޓްރީއަށް ވަނީ ފާހަގަވެފައެވެ. އެގޮތުން އިންޓަނެޓް މެދުވެރިކޮށް ކުދިން ގްރޫމްކުރުމަށް މަސައްކަތް ކުރަމުންދާއިރު، މިކަމަށް ބެލެނިވެރިން އަހުލުވެރިކުރުމަށް ދަނީ މަސައްކަތްކުރަމުންނެވެ. އަދި މިކަމަށް ޚާއްސަ އަތްމަތީ ފޮތެއް ތައްޔާރުކުރުމުގެ މަސައްކަތް ވެސް ދަނީ ކުރަމުންނެވެ. މީގެ އިތުރުން މިކަން ހައްލުކުރުމުގައި މުދައްރިސުންގެ ދައުރު ބޮޑުއިރު، އެކަމަށް ޚާއްސަ ޕްރޮގްރާމްތައް ހިންގުމަށް ވެސް ވަނީ ރާވާފައެވެ.

ހޮނިހިރު ދުވަހުގެރޭ އެމްޑީޕީގެ ޤައުމީ މަޖިލީހުގެ ޖަލްސާގައި ވަނީ ސްކޫލް ފޮތްތަކުގައި ނަފުރަތު އުފެއްދުމަށް މަގުފަހިވާގޮތަށް ހުރި ބައިތައް ބަލައި، ތަޢުލީމީ މަންހަޖަށް ބަދަލުގެނައުމުގެ މަސައްކަތް ފަށައިފައިވާކަން ހާމަކޮށްފައެވެ. މީގެ އިތުރުން ހަރުކަށި ފިކުރު ހުއްޓުވަން ދަރިވަރުންނަށް ޚާއްސަ ޕްރިވެންޝަން ޕްރޮގްރާމްތަކާއި، އިހުތިރާމްކުރުމުގެ މުހިންމުކަމާއި، ކްރިޓިކަލް ތިންކިންގް އަދި ޓޮލަރެންސް ފަދަ މައުލޫތަކަށް ޚާއްސަ ސެޝަންތައް ހިންގުމަށް ދަނީ ރާވަމުންނެވެ.

ޔޫތް މިިނިސްޓްރީއާ މިހާރު ހަވާލުވެ ހުންނެވި ޓޫރިޒަމް މިނިސްޓަރ ޑރ. އަބްދުﷲ މަޢުސޫމް އިސްވެ ހުންނަވައި މެއި 6 ކޮމިޓީއާ ވަނީ ބައްދަލުކުރައްވާފައެވެ. މި ބައްދަލުވުމުގައި ދެ ފަރާތުން ވަނީ ޒުވާނުންނަކީ މިފަދަ ނުރައްކަލެއް ނައްތާލުމުގައި އެންމެ މުހިންމު ދައުރު އަދާކުރާ ބައެއްގެ ގޮތުގައި އެއްބަސްވެ އެކަމަށް ޚާއްސަ މަސައްކަތްތަކެއް ކުރަންޖެހޭކަން ފާހަގަކޮށްފައެވެ. އެގޮތުން އޯލެވެލް ނިންމާ އަދި އޭލެވެލް ނުނިންމާ ދަރިވަރުންގެ އުމުރުފުރާއަށް ޚާއްސަކޮށް ޕްރޮގްރާމްތަކެއް ހިންގުމަށް ވަނީ ރާވާފައެވެ. މި ޕްރޮގްރާމްތައް އިތުރަށް ފުރިހަމަކުރުމަށް ބޭރުގެ އެހީ ހޯދުމަށް ވެސް ވަނީ ނިންމާފައެވެ. އެހެންނަމަވެސް މިކަންކަމުގެ އިތުރު ތަފުސީލެއް ހާމަކޮށްފައެއްނުވެއެވެ.