ރާއްޖެޓީވީގައި ރޯކޮށްލި މައްސަލައިގެ ދައުވާލިބޭ މީޢާދުގެ ބަންދު މުރާޖަޢާ މާދަމާ

"ރާއްޖެޓީވީ"ގައި ރޯކޮށްލި މައްސަލައިގައި ޓެރަރިޒަމްގެ ދައުވާ އުފުލާފައިވާ ހ. ގަސްވާ މުޙައްމަދު މީޢާދުގެ ބަންދު މުރާޖަޢާކުރުމުގެ އަޑުއެހުމެއް ކްރިމިނަލް ކޯޓުގައި ތާވަލުކޮށްފިއެވެ.

މި މައްސަލައިގެ އަޑުއެހުން ތާވަލުކޮށްފައިވަނީ އާދީއްތަ ދުވަހުގެ މެންދުރު 13:30އަށެވެ.

ރާއްޖެޓީވީ ހިންގަމުން ގެންދިޔަ އިމާރާތުގައި ރޯކޮށްލުމުގެ ޖަރީމާ ހިންގާފައިވަނީ 2013ވަނަ އަހަރުގެ އޮކްޓޯބަރު 7 ވަނަ ދުވަހުގެ ރޭ މެންދަމުގެ ވަގުތެއްގައެވެ. ރާއްޖެޓީވީގެ ސްޓޫޑިއޯ ހިންގަމުން ދިޔަ ބީކޭޓީ އިމާރާތުގައި އަލިފާން ރޯކޮށްލައި ހުރިހާ އިކުއިޕްމެންޓެއް އަންދައި އަޅިއަށް ހަދާލާފައިވަނީ، ރާއްޖެޓީވީއަށް ހަމަލާދޭން އުޅޭކަމުގެ މައުލޫމާތު ލިބި، އެކަން ފުލުހުންގެ ސަމާލުކަމަށް ގެނެސްފައިވަނިކޮށެވެ. އެގޮތުން މި ޖަރީމާގެ ސަބަބުން 11.65 މިލިއަން ރުފިޔާގެ ގެންލުން ރާއްޖެޓީވީއަށް ލިބިފައިވެއެވެ.

މާސްކު އަޅައިގެން ތިބި 5 މީހުން ރާއްޖެޓީވީ ހުރި އިމާރާތަށް ވަދެ ސްޓޫޑިއޯގައި ރޯކޮށް އަންދައި އަޅިއަށް ހަދާލިތާ އެތައް އަހަރެއް ފާއިތުވެގެން ދިޔައިރު ވެސް އެކަމުގައި އިންސާފު ލިބިފައެއް ނެތެވެ. މި 5 މީހުން ރާއްޖެޓީވީ ހުރި މި ޖަރީމާ ހިންގި މަންޒަރު ފެންނަން ހުރި ނަމަވެސް، އެ މައްސަލަ އޭރު ކަމާ ގުޅުންހުރި އިދާރާތަކުން އެކަށީގެންވާ ގޮތެއްގައި ބަލާފައެއް ނުވެއެވެ.

ސްޓޭޝަނުގައި ރޯކޮށްލާފައިވަނީ، ކުރިންވެސް އެކިފަހަރުމަތިން ސްޓޭޝަންގެ މަސައްކަތްތައް ހުއްޓުވުމަށް އޭރު ތިއްބެވި ސިޔާސީ އެކި ބޭފުޅުން މަސައްކަތްކޮށް ކާމިޔާބު ނުވުމުންކަމަށް ބެލެވޭ ކަމަށްވެސް ބުނެފައިވެއެވެ. މި މައްސަލަ ކަމާ ގުޅުންހުރި އިދާރާތަކުން ބަލާފައި ނުވާތީ، ރާއްޖެޓީވީއަށް އިންސާފު ލިބޭނެ ގޮތަކަށް މައްސަލަ ބަލައި ދިނުމަށް އެދި އިންތިޤާލީ އިންސާފުގެ އޮމްބަޑްސްޕާރސަންގެ އޮފީހަށްވެސް ވަނީ އެ މައްސަލަ ހުށައަޅާފައެވެ.

ރާއްޖެޓީވީއަށް އިންސާފު ހޯދުމަށް ކެނޑިނޭޅި މަސައްކަތް ކުރެވުނެވެ. މި މައްސަލައިގައި ބަދަލު ނަގައި ދިނުމަށް ސިވިލް ކޯޓަށް ހުށަހެޅި މައްސަލަ، އެ ކޯޓުން ބޭރުކޮށްލިއިރު، ނެޝަނަލް އިންޓެގްރިޓީ ކޮމިޝަނަށް ވެސް މައްސަލަ ހުށަހެޅުނެވެ. އެއަށްފަހު އައު ސަރުކާރު އައުމުން ރާއްޖެޓީވީން އަނެއްކާވެސް އިންސާފު ހޯދުމުގެ މަސައްކަތް ފެށިއެވެ. އެގޮތުން 2018ވަނަ އަހަރު ރާއްޖެޓީވީގެ ފަރާތުން އޭރުގެ ޕްރޮސެކިއުޓަރ ޖެނެރަލް ޢާއިޝަތު ބިޝާމްއާ ބައްދަލުކޮށް މި މައްސަލަ އަލުން ރިވިއު ކޮށްދެއްވުމަށް އެދުނެވެ. އޭރު ހުންނެވި ޕީޖީގެ ފަރާތުންވެސް އުއްމީދީ ވާހަކަތަކެއް އަޑުއިވުނެވެ. ނަމަވެސް މަގާމުން އިސްތިއުފާދެއްވާފައި ވަޑައިގެންނެވި އިރުވެސް، މި މައްސަލައިގައި އިންސާފު ލިބޭނެ އެއްވެސް އަލިމަގެއް ފެނިފައެއް ނުވެއެވެ.

ރިޔާސީ އިންތިޚާބަށްފަހު އެކިއެކި މީޑިއާ ތަކުންނާއި ސިޔާސީ ބައެއް ފަރާތްތަކުން ދައްކާފައިވާ ވާހަކަތަކުންނާއި އަދި ފުލުހުންނާއި، "މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ތަޙުޤީޤުކުރާ ކޮމިޝަން"އިން ހާމަކޮށްފައިވާ އެކި އެކި މައުލޫމާތުތަކަށް ބަލާއިރު މިކަމުގައި އޭރުގެ ދައުލަތުގެ އެންމެ އިސްފަރާތްތަކުން ބައިވެރި ވެފައިވާކަމަށް ތުހުމަތު ކުރެވެއެވެ.

މިގޮތުން ރައިސުލްޖުމްހޫރިއްޔާއާއި ރައިސުލްޖުމްހުރިއްޔާގެ ނައިބު އަދި ދައުލަތުގެ ބައެއް ވަޒީރުންނާ ފުލުހުންގެ އިސްފަރާތްތަކުގެ ބައިވެރިވުން އޮތްކަމަށް ގަބޫލުކުރެވޭ ހެކިތައް ތަޙުޤީޤީ އިދާރާތަކަށް ފަހުން ލިބިފައިވާކަން އެނގެއެވެ. އެކަން ހާމަވާ ސަބަބަކީ ސްޓޭޝަން ރޯކޮށްލި ދުވަހު ކުރީގެ ރައީސް ޢަބްދުﷲ ޔާމީނަށް "މިޝަން އެކޮމްޕްލިޝްޑް"ކަމަށް ބުނެ ކުރީގެ ނައިބު ރައީސް އަޙުމަދު އަދީބު މެސެޖް ކުރެއްވިކަން ހާމަވެފައި ވާތީއެވެ.

މަރު ކޮމިޝަނުން އެކުލަވާލި ރިޕޯރޓުގައި ރައްޔިތުންގެ މަޖިލީހުގެ ކުރީގެ ނައިބު ރައީސް އަދި ދިއްގަރު ދާއިރާގެ ކުރީގެ މެމްބަރު އަޙުމަދު ނާޒިމުގެ ބަޔާނާއި ހަވާލާދީ ބުނެފައިވަނީ ރާއްޖެޓީވީ ރޯކޮށްލި ދުވަހު ނާޒިމް އިންނެވީ ރައީސް ޔާމީނު އަރިހުގައި ތާސް ކުޅުއްވަން ކަމަށާއި، އަދީބުގެ މެސެޖް އައުމުން މެސެޖް ވިދާޅުވީވެސް އޭނާ ކަމަށެވެ. 

މި ހާދިސާއަށްފަހުވެސް ރާއްޖެޓީވީގެ ޓްރާންސްމިޝަން މެދުނުކެނޑި ކުރިއަށް ގެންދިއުމަށް ކުންފުނީގެ މެނޭޖްމަންޓުން ކުރި މަސައްކަތުގެ ނަތީޖާއެއްގެ ގޮތުން މިއަދު ރާއްޖެޓީވީން ވަނީ ބޮޑެތި ކުރިއެރުންތަކެއްވެސް ހޯދާފައެވެ. އެގޮތުން ދުނިޔޭގެ ކޮންމެ ތަނަކުންވެސް ރާއްޖެޓީވީ ބަލައިލެވޭގޮތަށް ރާއްޖެޓީވީގެ ސިގްނަލް ސެޓެލައިޓުވެސް މިހާރު ވަނީ އަޕްލިންކް ކޮށްފައެވެ.