އިތުރު 407 މީހުން ކޮވިޑުން ދިފާއުވުމަށް ވެކްސިން ފުރިހަމަކޮށްފި
ބުރާސްފަތި ދުވަހު ވެކްސިން ޖަހާފައި ވަނީ ޖުމްލަ 1773 މީހުން
ވެކްސިން ޖެހުމުގެ ގައުމީ ކެމްޕޭންގެ ތެރެއިން އައްޑޫގައި ވެކްސިން ދެނީ
ބުރާސްފަތި ދުވަހު ރާއްޖޭގައި ވެކްސިންގެ ދެ ވަނަ ޑޯޒް ޖަހާފައި ވަނީ 407 މީހުން ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްޕީއޭ އިން އާންމުކޮށްފައިވާ އެންމެ ފަހުގެ ތަފާސްހިސާބުތައް ދައްކާގޮތުން ބުރާސްފަތި ދުވަހު ވެކްސިން ޖަހާފައި ވަނީ ޖުމްލަ 1773 މީހުންނެވެ. އެއީ ވެކްސިންގެ ދެ ވަނަ ޑޯޒް ޖެހި 407 މީހުންގެ އިތުރުން ފުރަތަމަ ޑޯޒް ޖެހި 1366 މީހުންނެވެ.
ފުރަތަމަ ޑޯޒް ޖެހި 1366 މީހުންގެ ތެރެއިން މާލެ ސަރަހައްދުން ވެކްސިން ޖަހާފައި ވަނީ 385 މީހުންނެވެ. އަދި އަތޮޅުތެރެއިން ވެކްސިންގެ ފުރަތަމަ ޑޯޒް ޖަހާފައި ވަނީ 981 މީހުންނެވެ. ބުރާސްފަތި ދުވަހު ވެކްސިންގެ ދެ ވަނަ ޑޯޒް ޖެހި 407 މީހުންގެ ތެރެއިން މާލެ ސަރަހައްދުން ވެކްސިން ޖަހާފައި ވަނީ 266 މީހުންނެވެ. އަތޮޅުތެރެއިން ވެކްސިން ޖަހާފައި ވަނީ 141 މީހުންނެވެ.
މިއާއެކު ރާއްޖޭގައި ވެކްސިންގެ ދެޑޯޒް ފުރިހަމަ ކުރި މީހުންގެ ޖުމްލަ އަދަދު ވަނީ 301،078ށް އަރާފައެވެ. އަދި 381،745 މީހުން ވަނީ ވެކްސިންގެ ފުރަތަމަ ޑޯޒް ޖަހާފައެވެ.
އޮގަސްޓު މަހުގެ ނިޔަލަށް ރާއްޖޭގެ ވެކްސިންޖެހޭ އާބާދީގެ 90 އިންސައްތައަށް ވެކްސިންގެ ދެ ޑޯޒް ޖެހުމަށް ސަރުކާރުން އަމާޒުހިފާފައިވާއިރު، މިހާރު ދަނީ އުމުރުން 12 އަހަރާއި 17 އަހަރާ ދެމެދުގެ ކުދިންނަށް ވެސް ވެކްސިން ދެމުންނެވެ. އެގޮތުން 10 ދުވަހުގެ ތެރޭގައި 30،109 ދަރިވަރުން ފައިޒަރ ވެކްސިންގެ ފުރަތަމަ ޑޯޒް ޖަހާފައިވާ ކަމަށް އެޑިއުކޭޝަން މިނިސްޓްރީން ބުނެއެވެ.
ވެކްސިން ލިބުނުހާ އަވަހަށް ސްކޫލް ދަރިވަރުންނަށް ވެކްސިން ދޭން ފަށާފައިވާއިރު، މިހާރު ވަނީ އިތުރު ކެޓަގަރީތަކަކަށް ވެކްސިން ދޭން ފަށާފައެވެ. އެއީ ދިފާއީ ނިޒާމު ދަށް މީހުންނާއި، މާބަނޑު މީހުންގެ އިތުރުން މިހާތަނަށް ކޮވިޑް-19ގެ އެއްވެސް ވެކްސިނެއް ނުޖަހާ ތިބި 60 އަހަރުން މަތީގެ މީހުންނެވެ.
ރާއްޖޭގައި ބޭނުންކުރުމުގެ އެމަޖެންސީ ހުއްދަ އެޗްޕީއޭ އިން ދީ، މިހާތަނަށް ޖަހާފައިވާ ވެކްސިންތަކަކީ ކޮވިޝީލްޑް ވެކްސިން، އެސްޓްރަޒެނެކާ ކޮވިޑް ވެކްސިން، ފައިޒަރ އަދި ބައޯއެންޓެކްގެ ކޮވިޑް-19 ވެކްސިންގެ އިތުރުން ޗައިނާގެ ސިނޮފަރމް ކުންފުނީގެ ކޮވިޑް ވެކްސިނެވެ.
