އަހަރުގެ ފުރަތަމަ ހަ މަސް ނިމުނު އިރު ރާއްޖޭގެ ގްރީން ފަންޑުގެ ބެލެންސް އެއް ބިލިއަނަށް އަރާފައިވާ ކަމަށް ފިނޭންސް މިނިސްޓްރީން ހާމަކޮށްފިއެވެ.

ފިނޭންސް މިނިސްޓްރީން އާންމުކޮށްފައިވާ އެންމެ ފަހުގެ ތަފާސްހިސާބުތައް ދައްކާގޮތުން މި އަހަރުގެ ފުރަތަމަ ހަ މަހު ގްރީން ފަންޑަށް ޖުމްލަ 398.9 މިލިއަން ރުފިޔާ ޖަމާވި އިރު، 184.4 މިލިއަން ރުފިޔާ ވަނީ ފަންޑުން ޚަރަދުކޮށްފައެވެ. އަދި ޖޫން މަސް ނިމުނު އިރު ގްރީން ފަންޑުގައި ޖުމްލަ ހުރީ 1.02 ބިލިއަން ރުފިޔާއެވެ.

މިނިސްޓްރީން އާންމުކޮށްފައިވާ އެންމެ ފަހުގެ ގްރީން ފަންޑު ރިޕޯޓް ދައްކާގޮތުން 59.9 މިލިއަން ރުފިޔާ ގްރީން ފަންޑަށް ވަނީ ޖަމާކޮށްފައެވެ. އެއީ ރިސޯޓްތަކުން ގްރީން ޓެކުހުގެ ގޮތުގައި ލިބުނު 56.9 މިލިއަން ރުފިޔާ އާއި ހޮޓާ ތަކުން ލިބުނު 883,379.82 ރުފިޔާގެ އިތުރުން ގެސްޓް ހައުސްތަކުން ލިބުނު 1.08 މިލިއަން ރުފިޔާ އަދި ސަފާރީތަކުން ލިބުނު 1.01 މިލިއަން ރުފިޔާއެވެ.

ވަކިވަކި އަތޮޅުތަކުން ގްރީން ޓެކުހުގެ ގޮތުގައި ލިބުނު އަދަދުތަކަށް ބަލާއިރު، އެންމެ ގިނަ އަދަދެއް ލިބިފައި ވަނީ ކ. އަތޮޅުންނެވެ. އެއީ 21.1 މިލިއަން ރުފިޔާއެވެ. މާލެ ސިޓީން ގްރީން ޓެކުހުގެ ގޮތުގައި ލިބިފައި ވަނީ 551,201.88 ރުފިޔާއެވެ.

ފިނޭންސްގެ ތަފާސްހިސާބުތައް ދައްކާގޮތުން ޖޫން މަހު ސަރުކާރުން ވަނީ ގްރީން ފަންޑުން 25.9 މިލިއަން ރުފިޔާ ޚަރަދުކޮށްފައެވެ. އޭގެ ތެރޭގައި އަތޮޅުތެރޭގެ އެކި ރަށްރަށުގެ ފެނާއި ނަރުދަމާ އާއި ތަފާތު އެކި މަޝްރޫއުތައް ހިންގުމަށް ކުރި ޚަރަދު ހިމެނެއެވެ.

އަހަރު ފެށުނު އިރު ގްރީން ފަންޑުގައި 809.6 މިލިއަން ރުފިޔާ ހުރި އިރު، އަހަރުގެ ޖެނުއަރީ މަހު ގްރީން ފަންޑަށް 57.3 މިލިއަން ރުފިޔާ ވަނީ އިތުރުވެފައެވެ. އަދި 12.9 މިލިއަން ރުފިޔާ ވަނީ ފަންޑުން ޚަރަދުކޮށްފައެވެ. ފެބްރުއަރީ މަހު ފަންޑަށް އިތުރުވި 63.5 މިލިއަން ރުފިޔާ އާއި އެމަހު ޚަރަދު ކުރި 58 މިލިއަން ރުފިޔާއާ އެކު ފެބްރުއަރީ މަހުގެ ނިޔަލަށް ގްރީން ފަންޑުގައި ޖުމްލަ ހުރީ 859.6 މިލިއަން ރުފިޔާއެވެ. މާޗު މަހު ގްރީން ފަންޑަށް 93.4 މިލިއަން ރުފިޔާ ޖަމާކޮށްފައިވާ އިރު، މިއީ މި އަހަރުގެ މިހާތަނަށް ފަންޑަށް އެންމެ ގިނަ އަދަދެއްގެ ފައިސާ ޖަމާވި މަހެވެ. އެމަހު ދައުލަތުން ވަނީ ގްރީން ފަންޑުން 31.2 މިލިއަން ރުފިޔާ ޚަރަދުކޮށްފައެވެ.

އޭޕްރިލް މަހު ފަންޑަށް 72 މިލިއަން ރުފިޔާ ޖަމާކޮށްފައިވާއިރު، ޚަރަދުކޮށްފައި ވަނީ 9.8 މިލިއަން ރުފިޔާއެވެ. އަދި މެއި މަހު ފަންޑަށް 52.7 މިލިއަން ރުފިޔާ ޖަމާކޮށްފައިވާއިރު، ފަންޑުން ޚަރަދުކޮށްފައި ވަނީ 46.3 މިލިއަން ރުފިޔާއެވެ. ޖޫން މަހު ފަންޑަށް ޖަމާވި އަދަދާއި ފަންޑުން ކުރި ޚަރަދާ އެކު ޖޫން މަހު ގްރީން ފަންޑުގެ ބެލެންސްގައި ހުރީ 33.9 މިލިއަން ރުފިޔާއެވެ.

ގްރީން ޓެކުހަކީ ރާއްޖެ އަންނަ ފަތުރުވެރިންގެ އަތުން ނަގާ ޓެކުހަކަށް ވުމުން، ފަތުރުވެރިން އައުން މަަދުވާނަމަ ގްރީން ފަންޑަށް ޖަމާވާ ފައިސާ މަދުވާނެއެވެ. ރާއްޖެ އަންނަ ފަތުރުވެރިންގެ ތެރެއިން ސަފާރީ، ރިސޯޓް އަދި ހޮޓެލްތަކަށް އަންނަ ފަތުރުވެރިންގެ އަތުން ގްރީން ޓެކުހުގެ ގޮތުގައި ދުވާލަކަށް 6 ޑޮލަރު ނަގައެވެ. އަދި ގެސްޓް ހައުސްތަކަށް ޒިޔާރަތްކުރާ ފަތުރުވެރިންގެ އަތުން ގްރީން ޓެކުހުގެ ގޮތުގައި ނަގަނީ ދުވާލަކަށް 3 ޑޮލަރެވެ.