ރާއްޖެއަށް ބަރުލަމާނީ ނިޒާމެއް ގެންނަން މަސައްކަތް ކުރަނީ ވަކި މީހަކަށް ވެރިކަމާއި ބާރުތައް ނުލިބިގެން ކަމަށް، ސަރުކާރު ހިންގާ ކޯލިޝަންގެ ދެވަނައަށް އެންމެ ބޮޑު ޕާޓީ، ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެއެވެ.
ޖުމްހޫރީ ޕާޓީގެ މީޑިއާ މެދުވެރިކޮށް ގާސިމް ދެއްކެވި ވާހަކައިގައި ވިދާޅުވީ ބަރުލަމާނީ ނިޒާމެއްގެ ތަޖްރިބާ ދިވެހި ރައްޔިތުން ހާސިލްކޮށްފައިވާ ކަމަށާއި، ރައީސް އިބްރާހިމް ނާސިރުގެ ވެރިކަމުގައި ވެސް ބަރުލަމާނީ ނިޒާމަކަށް ބަދަލުކޮށް ބޮޑުވަޒީރަކު ބަހައްޓައިގެން ކުރި މަސައްކަތުގެ ނަތީޖާ ފެންނަން އެބައޮތް ކަމަށެވެ. އަނެއްކޮޅުން ބަރުލަމާނީ ނިޒާމެއްގައި ރައީސަކު ހުންނަ އިރު، ސަރުކާރުގެ ވެރިޔަކާއި ދައުލަތުގެ ވެރިއަކާ ހުންނަ އިރު ދެ ބޭފުޅުން ތަޅައިގަނެ ބޮޑު މައްސަލައެއް ދިމާވާނެ ކަމަށެވެ. އަދި މިއީ ބޮޑު ޚަރަދެއް ކަމަށް ގާސިމް ވިދާޅުވިއެވެ.
ގާސިމް ވިދާޅުވީ ބަރުލަމާނީ ނިޒާމެއްގައި ރައީސަކީ އެއްވެސް ބާރެއް ނެތް މީހެއް ކަމަށާއި، ދައުލަތުގެ ޚަރަދު ދެކޮޅު ނުޖެހިގެން އުޅޭ އިރު ރައީސަކު ބަލަހައްޓަން ބޮޑު ސިންގާ ގަނޑުވަރަކާ އެއްޗެހި ދީފައި ބެހެއްޓުމުގެ ބޭނުމެއް ނެތް ކަމަށެވެ.
ގާސިމް ވިދާޅުވީ ބަރުލަމާނީ ނިޒާމެކޭ ކިޔައިގެން އުޅުއްވަނީ ރައްޔިތުންގެ މަޖިލީހުގެ ރައީސް ނަޝީދު ކަމަށާއި، އެމަނިކުފާނަށް ވަގިވެރިވާ ބަޔަކު އެކަމަށް ޕެޓިޝަނެއް ހައްދަވައިގެން އެބަ އުޅުއްވާ ކަމަށެވެ. އަދި އަނެއްކޮޅުން ބަރުލަމާނީ ނިޒާމުގެ ވެރިއަކަށް އަންނަ މީހާއަކީ ރާއްޖޭގެ އޮތް އެންމެ ކުޑަ ދާއިރާއިން ހޮވިގެން އަންނަ މެންބަރެއް ކަމުގައި ވިޔަސް އެ ޕާޓީއަށް މީހުން ހަމަވެއްޖެއްޔާ ނުވަތަ އެހެން ޕާޓީއަކާ ކޯލިޝަން ހަދައިގެން ކަމުގައި ވާނަމަ ނުވަތަ މަޖިލީހުގެ 50 އިންސައްތަ އަގުލަބިއްޔަތު ލިބިފައިވާނަމަ ބަރުލަމާނީ ނިޒާމުގެ ތެރެއިން އެމީހަކަށް ބޮޑުވަޒީރުކަމަށް އާދެވޭނެ ކަމަށެވެ.
ބޮޑވަޒީރަކަށް އައީމަ އޭނާ ރައްޔިތުން ކައިރިއަކަށް ދާކަށް ނުޖެހޭނެ. ރައްޔިތުންނާ ހަމައަށް ދާންނުޖެހުނީމަ އެ ލިބޭ ނިކަމެތިކަން ނިކަން ވިސްނާ ބައްލަވާ. ވެރިކަމަށް ނުކުންނަ މީހަކު 1000 މީހުން 2000 މީހުން ތިބޭ ދާއިރާތަކުން ހޮވުނީމަ އޭނާ އެ ވީ ގައުމުގެ ވެރިމީހާއަށް. ރައްޔިތުންގެ ކުރިމަތީގައި ވެވޭ ވައުދެއް ވެސް ނެތް ކުރަންޖެހޭ ކަމެއް ވެސް ނެތް. އޭނާ ދޭންޖެހޭ ކޮމިޓްމެންޓެއް ވެސް ނެތް. ރައްޔިތުންނާ ހަމައަށް ދާކަށް ވެސް ނުޖެހޭނެ. ކުޑަތަނަކުން ހޮވުނީމަ އެ ނިމުނީ އޭނާ އަކީ ގައުމުގެ ވެރިއެއް. މި ވަރުގެ ހަމަ ނުޖެހޭ ކަމެއް މިއީ،ޖުމްހޫރީ ޕާޓީގެ ލީޑަރު ގާސިމް އިބްރާހިމް
ގާސިމް ވިދާޅުވީ ރައީސުލްޖުމްހުރިއްޔާއަކީ ރާއްޖޭގެ ހުރިހާ ރަށަކަށް ދަތުރުކޮށް ހުރިހާ އެންމެންގެ ތާއިދު ލިބި، ބޭނުންވާ ކަންކަން އޮޅުން ފިލުވައި އެއް އިންތިޚާބަށްވުރެ ގިނަ އިންތިޚާބުގައި ވެރިކަމުގައި ތިބޭ ބަޔަކު އެއްފަހަރަށްވުރެ ގިނަ ފަހަރު ދާންޖެހުމަކީ ރައްޔިތުންނަށް ލިބޭ ވަރަށް ބޮޑު ހިތްހަމަޖެހުމެއް ކަމަށެވެ. އަދި އެކަމުގެ ސަބަބުން ރައްޔިތުން ތިބި ހާލު ވެސް އެނގިގެންދާނެ ކަމަށެވެ.
އަޅުގަނޑުގެ އާދޭހަކީ ބަރުލަމާނީ ނިޒާމަށް އެއްވެސް ބޭފުޅަކު ތާއިދު ނުކުރާށޭ. ގައުމަށް ހެޔޮއެދިގެން ވެރިކަން ކުރަން ބޭނުން ނޫން. ރައްޔިތުންގެ މަޖިލީހުގެ މެންބަރުންނަކީ މިނިސްޓަރުން ވެސް ކުންފުނީގެ ވެރިން ވެސް. އެމީހުން ލާރިކައިފައި ހިޔާނާތްތެރިވެފައި އެމީހުން މައްސަލަ ވެސް ބަލާނީ. އެއީ ބޭނުން އޮތްކަމެއް ވެސް ނޫން. އެއްވެސް ގޮތަކަށް ކުރަން ހެޔޮވަރުކަމެއް ވެސް ނޫން. ވަކި މީހަކަށް ވެރިކަމާއި ބާރުތައް ނުލިބިގެން އާދެވެން އޮތް ގޮތަކަށް އަންނަން ވެގެން ޕްރައިމް މިނިސްޓަރުކަމަށް އަންނަން ވެގެން ކުރާ ކަމެއް. މިއީ ކުރަން ހެޔޮވަރު ކަމެއް ނޫން އަމިއްލައަށް ގާނޫނު ހަދައިގެން މުޅި ނިޒާމް ބަދަލުކޮށްގެން. އަދި މިހާ ދަތި ދުވަސްވަރެއްގައި ވޯޓެއް ނަގަން. އެއީ ވެސް ހާދަ ލާރިއެކޭ،ޖުމްހޫރީ ޕާޓީގެ ލީޑަރު ގާސިމް އިބްރާހިމް
ގާސިމް ވިދާޅުވީ ބަރުލަމާނީ ރިޔާސީ ނިޒާމުގެ މައްސަލައިގައި ބަރުލަމާނީ ނިޒާމަކަށް ދިއުމަކީ ކުރަން ބޭނުންވާ ކަމެއް ނޫން ކަމަށް ދަންނަވާފައިވާނެ ކަމަށެވެ. އަދި މެނިފެސްޓޯގައި އެވާހަކަ ނޯންނާނެ ކަމަށާއި، މެނިފެސްޓޯގައި އެ ވާހަކަ އޮތް ކަމަށް ބައެއް ބޭފުޅުން ވާހަކަ ދެއްކި ނަމަވެސް އެއީ ކަނޑައެޅިގެން ދޮގު ވާހަކަތަކެއް ކަމަށެވެ.
