ކޮވިޑުގައި މީހުން މަރުވާއިރު ޕެރަމެޑިކުން ނަށަނީ!
26 އޯގަސްޓު 2021 | ބުރާސްފަތި 06:00އިނގިރޭސިވިލާތުގެ ނެޝަނަލް ހެލްތު ކެއަރއަށް މައްސަލަ ވަނީ ހުށައަޅާފައި
ރައިހާނާ އާއި އޭނާގެ އެކުވެރިޔާ އެމްބިއުލާންސެއްގެ ތެރޭގައި ލަވަކިޔާފައި ނަށަނީ
އިނގިރޭސިވިލާތުގެ ޔޯކްޝަޔަރގެ އެމްބިއުލާންސް ޚިދުމަތުގައި މަސައްކަތްކުރާ ޕެރަމެޑިކުންގެ ތެރެއިން ޒުވާން ދެ އަންހެންކުއްޖަކު އެމްބިއުލާންސެއްގެ ތެރޭގައި ނަށަމުންދާ މަންޒަރު ފެންނަ ވީޑިއޯއެއްގެ މައްސަލަ ހޫނުވެއްޖެއެވެ.
އުމުރުން 25 އަހަރުގެ ރައިހާނާ ހިގިންސްއާއި އޭނާގެ އެކުވެރިޔަކު އެމްބިއުލާންސްގެ ތެރޭގައި ނަށަމުންދިޔައީ އެމެރިކާގެ މަޝްހޫރު ލަވަކިޔުންތެރިޔާ ޖަސްޓިން ބީބަރގެ "ބޭބީ" މި ލަވަޔަށެވެ. ނަށަމުން ދިޔައިރު ދެ މީހުންވެސް ތިބީ ޕެރަމެޑިކުންގެ ރަސްމީ ޔުނިފޯމުގައެވެ. މި ވީޑިއޯ ޓިކްޓޮކްގައި ހިއްސާކުރީވެސް ރައިހާނާއެވެ.
ވީޑިއޯ ބަލާފައި ވަރަށް ގިނަ ބަޔަކު ބުނެފައިވަނީ ކޮވިޑުގެ ނުރައްކާތެރިކަން ފެތުރި އެތައް ބަޔަކު މަރުވަމުންދާއިރު އެމްބިއުލާންސް ޚިދުމަތުގައި އުޅޭ މީހުންގެ ކަމަކީ ޓިކްޓޮކް ވީޑިއޯ ހެދުމާއި ނެށުން ކަމަށާއި އެމްބިއުލާންސް ލަސްވުމާއި ފަރުވާ ނުލިބި އެހާ ގިނަބަޔަކު މަރުވާ ސަބަބު މިހާރު އެންމެނަށްވެސް މިއެނގުނީ ކަމުގައެވެ.
"އަހަރެންގެ މާމަ އެމްބިއުލާންސްގެ އިންތިޒާރުގައި އޮވެ މަރުވެގެންދިޔަ ސަބަބު އަދި ކިރިޔާ މިއެނގުނީ" ކޮންމެވެސް މީހަކު ކޮމެންޓް ކޮށްފައިވެއެވެ. މިހާރު ވަރަށް ގިނަ ބަޔަކު ވަނީ މިމައްސަލަ އިނގިރޭސިވިލާތުގެ ނެޝަނަލް ހެލްތު ސާރވިސްއަށް ޝަކުވާގެ ގޮތުގައި ހުށައަޅައިފައެވެ. ކޮވިޑުގައި މީހުން މަރުވާއިރު ރައްޔިތުންގެ ޓެކްސް ފައިސާއިން މުސާރަ ނަގައިގެން ތިބޭ ސިއްހީ ޚިދުމަތްތެރިން އުފަލުން ނަށަނީ ކަމަށް މި ޝަކުވާގައި ބުނެފައިވެއެވެ.
