އަފްޣާނިސްތާނުގެ ދިހަ މިލިއަން ކުޑަކުދިން އިންސާނީ އެހީއަށް ބޭނުންވެފައިވާ ކަމަށް ޔުނިސެފުން ބުނެފިއެވެ.

ޔުނިސެފުން މިހެން ބުނެފައި މިވަނީ ޔޫއެންގެ ވޯރލްޑް ފުޑް ޕްރޮގްރާމުން 200 މިލިއަން ޑޮލަރުގެ ކާބޯތަކެތީގެ އެހީއަށް އެދި ގޮވާލާފައިވާ ދަނޑިވަޅެއްގައެވެ. މި އަހަރުގެ ތެރޭގައިވެސް ކާބޯތަކެތި ނުލިބުމުގެ ސަބަބުން މިލިއަނެއްހާ ކުޑަކުދިންގެ ފުރާނައަށް ނުރައްކާވާނެ ކަމަށް ޔުނިސެފުން ވަނީ އަންދާޒާ ކޮށްފައެވެ.

ވޯރލްޑް ބޭންކުންވަނީ އަފްޣާނިސްތާނަށް ދެމުން އައި އެހީތައްވެސް މެދު ކަނޑާލާފައެވެ. އަފްޣާންގެ 27 ޕްރޮޖެކްޓަކަށް 2002ވަނަ އަހަރުން ފެށިގެން 5.3 ބިލިޔަން ޑޮލަރު ވޯރލްޑް ބޭންކުންވަނީ ޚަރަދުކޮށްފައެވެ.

މި ދަނޑިވަޅަކީ، އަފްޣާނިސްތާނުގެ ސަރުކާރު ޠާލިބާނުންގެ ބާރުގެ ދަށަށް ގެންގޮސްފައިވާ ދަނޑިވަޅެކެވެ. އެއާއެކު އެމެރިކާއާއި ހުޅަނގުގެ ގައުމުތަކުން ވަނީ އެގައުމުން ފައިބަންފަށާފައެވެ. އޮގަސްޓް މަހުގެ 14ވަނަ ދުވަހުން ފެށިގެން މިހާތަނަށް 70،000ށްވުރެ ގިނަ މީހުން ވަނީ އެ ގައުމުން ފައިބާފައެވެ. އޭގެ ތެރޭގައި އެގައުމުގެ ރައްޔިތުންވެސް ހިމެނެއެވެ.

ޠާލިބާނުން ބުނެފައިވަނީ، އަފްޣާނިސްތާނުގެ ރައްޔިތުންނަށްވެސް އެ ގައުމުން ދިޔުމުގެ އެންމެ ފަހު ވަގުތަކީ، މި މަހުގެ 31 ކަމަށެވެ. އޭގެ ފަހުން ގައުމު ދޫކޮށް ދިޔުމުގެ ފުރުސަތު ނުދެވޭނެކަމަށެވެ.