ޕެޓިޝަންގައި ސޮއިކުރާ މީހުންގެ ޖުމްލަ އަދަދު މި ހަފްތާގެ ނިޔަލަށް ހާމަކުރެވޭނެ
ޕެޓިޝަންގައި ސޮއިކުރުމުގެ ކަންތައްތައް އެއް ސަރަހައްދަށްވުރެން ގިނަ ސަރަހައްދުތަކުގައި ކުރިއަށްދޭ
އެމްޑީޕީގެ ބައެއް މެމްބަރުން ހުށަހަޅާ ފެޓިޝަންގައި ސޮއިކުރި ބައެއް މަޖިލިސް މެމްބަރުން
ބަރުލަމާނީ ނިޒާމަށް ތާއީދުކޮށް ޕެޓިޝަންގައި ސޮއިކުރާ މީހުންގެ ޖުމްލަ އަދަދު މި ހަފްތާގެ ނިޔަލަށް ހާމަކުރެވޭނެ ކަމަށް އެމްޑީޕީގެ ޕެޓިޝަން ކޮމެޓީން ބުނެފިއެވެ.
ރާއްޖެއެމްވީއަށް މައުލޫތު ދެއްވަމުން އެ ކޮމެޓީގެ މެމްބަރަކު ވިދާޅުވީ ރާއްޖޭގެ އެކި ހިސާބުތަކުގައި ޕެޓިޝަންގައި ސޮއިކުރުމުގެ މަސައްކަތް ކުރިއަށްދާ ކަމަށެވެ. އެގޮތުން ބައެއް ބޮޑެތި ރަށްތައް ކަމަށްވާ އައްޑޫ ސިޓީ، ފުވައްމުލަކު ސިޓީ އަދި ކުޅުދުއްފުށި ސިޓީގައި ޕެޓިޝަންގައި ސޮއިކުރުމުގެ ކަންތައްތައް އެއް ސަރަހައްދަށްވުރެ ގިނަ ސަރަހައްދުތަކުގައި ކުރިއަށްދާނެ ކަމަށެވެ.
އެހެންކަމުން ޕެޓިޝަންގައި ސޮއިކުރާ މީހުންގެ ޖުމްލަ އަދަދު ލިބޭނީ މި ހަފްތާގެ ނިޔަލަށް ކަމަށެވެ. މެމްބަރު އިތުރަށް ވިދާޅުވީ ޕެޓިޝަނަށް ވަރަށް ބޮޑު ތަރުހީބެއް ލިބެމުން އަންނަ ކަމަށެވެ. އެގޮތުން މަޖިލީހުގެ ބައެއް މެމްބަރުން ވެސް ޕެޓިޝަންގައި ސޮއިކުރަމުން އަންނައިރު މަޖިލިސް މެމްބަރުންނާއި އިސް މަޤާމުތަކުގައި އުޅުއްވާ ބޭފުޅުންގެ ގާތަށް ގޮސް، ސޮއި ހޯދުމުގެ މަސައްކަތް ކުރަމުން އަންނަ ކަމަށް ވެސް އޭނާ ވިދާޅުވިއެވެ.
މިހާތަނަށް މި ޕެޓިޝަންގައި މަޖިލީހުގެ 14 މެމްބަރަކު ސޮއިކުރައްވާފައިވާއިރު އެ މެމްބަރުންނަކީ އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ)އާއި ރައްޔިތުންގެ މަޖިލީހުގެ ނާއިބުރައީސް އީވާ އަބްދުﷲއާއި މަޑަވެލި ދާއިރާގެ މެންބަރު ހުސައިން ފިރުޝާނާއި މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި)އާއި ހުޅުދޫ ދާއިރާގެ މެންބަރު އިލްޔާސް ލަބީބާއި ބިލެތްދޫ ދާއިރާގެ މެމްބަރު އަހުމަދު ހަލީމާއި ވިލުފުށީ ދާއިރާގެ މެންބަރު ހަސަން އަފީފާއި ގައްދޫ ދައިރާގެ މެމްބަރު އަހްމަދު ޒާހިރާއި ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމާއި ފޮނަދޫ ދާއިރާގެ މެމްބަރު މޫސާ ސިރާޖާއި ތޮއްޑޫ ދާއިރާގެ މެމްބަރު ހަސަން ޝިޔާނާއި ނ. ވެލިދޫ ދާއިރާގެ މެމްބަރު މުހައްމަދު އަބްދުﷲ ޝަފީގާއި މައްޗަންގޮޅި އުތުރު ދާއިރާގެ އެމްޑީޕީ މެމްބަރު މުހައްމަދު ރަޝީދެވެ.
ނިޒާމު ބަދަލުކުރުމަށް އެމްޑީޕީން ވީ ވައުދު ރައީސް ފުއްދަވަން ޖެހިވަޑައިގަންނަވާނެ ކަމަށް ބުނެ އެމްޑީޕީގެ ބައެއް މެމްބަރުން ފެޓިޝަނެއް ހުށަހަޅަން ތައްޔާރުވަމުންދާއިރު ގުޅިފައިވާ ޕާޓީތަކުން އެކުލަވާލި މެނިފެސްޓޯގައި ބަރުލަމާނީ ނިޒާމު ގެންނަން ވައުދުވެފައި ނުވާ ކަމަށް ރައީސުލްޖުމްހޫރިއްޔާގެ ތަރުޖަމާނު މަބްރޫކް އަޒީޒް ވަނީ ވިދާޅުވެފައެވެ.
މަބްރޫކް ވިދާޅުވީ ރިޔާސީ ނިޒާމު ބަރުލަމާނީ ނިޒާމަކަށް ބަދަލުކުރުމުގެ ވާހަކަ އޮތީ އެމްޑީޕީން ފުރަތަމަ ތައްޔާރުކުރި ޖަޒީރާ މެނިފެސްޓޯގައި ކަމަށެވެ. އަދި ގުޅިފައިވާ ޕާޓީތަކުން އެކުލަވާލި މެނިފެސްޓޯގައި އެކަން ނެތް ކަމަށް ވެސް ވިދާޅުވިއެވެ.
މަބްރޫކް ވިދާޅުވީ ރާއްޖޭގައި މިހާރު އޮތް ރިޔާސީ ނިޒާމުން ބަރުލަމާނީ ނިޒާމަކަށް ބަދަލުކުރަން ރައްޔިތުންގެ ޚިޔާލު ހޯދުމަށް ޕެޓިޝަނެއްގައި ސޮއިކުރަން ފެށުމަކީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް މަރުހަބާ ވިދާޅުވާ ކަމެއް ކަމަށެވެ.
ރައީސް ޞާލިޙް މީގެ ކުރިން ވެސް ވިދާޅުވެފައިވަނީ ރާއްޖޭގައި އޮންނާނެ ނިޒާމެއް ކަނޑައަޅާނީ ރައްޔިތުން ކަމަށެވެ. މަބްރޫކް ވިދާޅުވީ ރައީސްގެ ހަމައެކަނި އަމާޒަކީ ވައުދުތައް ފުއްދެވުން ކަމަށެވެ.
މި ހަރަކާތް ހިންގާ މެމްބަރުން ބުނީ ރާއްޖޭގެ އެކި ކަންކޮޅުތަކުގައި ޕެޓިޝަނުގައި ސޮއިކުރުމުގެ ކަންތައްތައް ކުރިއަށްދާނެ ކަމަށެވެ. މި މަހުގެ 21 ވަނަ ދުވަހު ޕެޓިޝަންގައި ސޮއިކުރުމުގެ މަސައްކަތް ފަށާފައިވާއިރު އަންނަ މަހުގެ 10 ވަނަ ދުވަހު މި ޕެޓިޝަން ރައީސުލްޖުމްހޫރިއްޔާއަށާއި ރައްޔިތުންގެ މަޖިލީހަށް ހުށަހަޅާނެ ކަމަށެވެ.
