ރާއްޖެއިން ކޮވިޑް-19ށް ޕޮޒިޓިވްވި މީހުންގެ އަދަދު 80،000ށް އަރައިފިއެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ)އިން އާންމުންކޮށްފައިވާ ތަފާސް ހިސާބުތައް ދައްކާގޮތުން, ހޯމަ ދުވަހު ޕޮޒިޓިވްވެފައިވަނީ 108 މީހެކެވެ. މިއާއެކު ރާއްޖެއިން ޕޮޒިޓިވްވި މީހުންގެ އަދަދު ވަނީ 80،067ށް އަރާފައެވެ.

ހޯމަ ދުވަހު ޕޮޒިޓިވްވި 108 މީހުންގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވްވި 37 މީހުންނާއި، ރަށްރަށުން ޕޮޒިޓިވްވި 63 މީހުންނާއި ރިސޯޓްތަކުން ޕޮޒިޓިވްވި 8 މީހުންނެވެ. އާދީއްތަ ދުވަހުގެ އިރުއޮއްސި 6:00ން ހޯމަ ދުވަހުގެ އިރުއޮއްސި 6:00ށް 5900 ސާމްޕަލް ނަގާފައިވެއެވެ. މީގެ ތެރޭގައި މާލެ ސަރަހައްދުން ނަގާފައިވަނީ 2099 ސާމްޕަލްއެވެ.

އެކްޓިވް ކޭސްގެ ގޮތުގައި ރިޕޯޓްކޮށްފައިވަނީ 1641 ކޭހެވެ. މީގެ ތެރެއިން 16 މީހުންނަށް ފަރުވާ ދެމުން އަންނަނީ ހޮސްޕިޓަލްތަކުގައެވެ. 78،189 މީހަކު މިހާތަނަށް ބަލިން ރަގަޅުވެފައައިވާ އިރު، ހޯމަ ދުވަހު ބަލިން ރަނގަޅުވެފައިވަނީ 113 މީހުންނެވެ.

ހޯމަ ދުވަހު މި ބަލީގައި 2 މީހަކު ނިޔާވެގެން ރިޕޯޓްކޮށްފައިވެއެވެ. އެއީ އައްޑޫ ކޮވިޑް މެނޭޖްމަންޓް ފެސިލިޓީއަށް ގެންދެވުނު 92 އަހަރުގެ އުމުރުން ދުވަސްވީ އަންހެނަކާއި ހުޅުމާލެ މެޑިކަލް ފެސިލިޓީގައި ފަރުވާދެމުން ދިޔަ 49 އަހަރުގެ ދިވެހި އަންހެނެކެވެ. މިއާއެކު ރާއްޖެއިން މި ބަލީގައި ނިޔާވި މީހުންގެ އަދަދު ވަނީ 225ށް އަރާފައެވެ.