ތ. ވިލުފުށީގައި ނުނިމި ހުރި ހައުސިންގ ޔުނިޓްތައް ނިންމުމަށް އަމީން ކޮންސްޓްރަކްޝަނާ ހަވާލުކޮށްފި
މި މަޝްރޫއަކީ ނޫމަޑި ކުންފުނިން 2011 ގައި ފަށާފައިވާއިރު މަޝްރޫއެއް
ތ. ވިލިފުށީ ހައުސިންގ ޔުނިޓްތައް ނިންމުމަށް އަމީން ކޮންސްޓްރަކްޝަނާ ހަވާލުކުރުމަށް އެއްބަސްވުމުގައި ސޮއިކުރަނީ
ތ. ވިލުފުށީގައި ނުނިމި ހުރި 36 ހައުސިންގ ޔުނިޓް ނިންމުމަށް އަމީން ކޮންސްޓްރަކްޝަނާ ހަވާލުކޮށްފިއެވެ.
ޕްލޭނިންގ މިނިސްޓްރީން ބުނީ މި މަޝްރޫއަކީ ނޫމަޑި ކުންފުނިން 2011 ގައި ފަށާފައިވާ މަޝްރޫއެއް ކަމަށެވެ. އެހެންނަމަވެސް 2014 ގައި މަޝްރޫއުގެ މަސައްކަތް ހުއްޓިފައިވާ ކަމަށާއި މި މަޝްރޫއުގެ ދަށުން އިމާރާތް ކުރުމަށް ހަމަޖެހިފައިވާ 200 ހައުސިންގ ޔުނިޓްގެ ތެރެއިން އިމާރާތް ކުރަން ފަށާފައިވަނީ 64 ހައުސިންގ ޔުނިޓްގެ މަސައްކަތް ކަމަށެވެ.
މި މަޝްރޫއަށް ޚަރަދު ކުރަނީ 2021 ވަނަ އަހަރު ޕީއެސްއައިޕީ ބަޖެޓުން ކަމަށާއި މި މަސައްކަތް 240 ދުވަހުގެ ތެރޭގައި ނިންމަން ޖެހޭ ކަމަށް އެ މިނިސްޓްރީން ބުންޏެވެ. މި ކޮންޓްރެކްޓްގެ އަގަކީ 82،138،268.57 ރުފިޔާއެވެ. އޮގަސްޓް 19 ވަނަ ދުވަހު އެއްބަސްވުމުގައި ސޮއިކޮށްފައިވާއިރު ޕްލޭނިންގ މިނިސްޓްރީގެ ފަރާތުން ސޮއިކުރެއްވީ ހައުސިންގ ޑިޕާޓްމަންޓްގެ ޑިރެކްޓަރ ޖެނެރަލް އަހްމަދު ވިޝާން ނަސީމެވެ. އަމީން ކޮންސްޓްރަކްޝަންގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ އަބްދުﷲ މުހައްމަދެވެ.
ޕްލޭނިންގ މިނިސްޓްރީން މި މަސައްކަތް އަމީން ކޮންޓްރަކްޝަނާ ހަވާލުކޮށްފައިވާއިރު ކުރީގެ މިނިސްޓަރ އޮފް ހައުސިންގ އާރބަން އެންޑް ޑިވެލޮޕްމަންޓް އާތިފާ ޝަކޫރު ވަނީ މިކަމާ ގުޅިގެން މަޖިލީހަށް ހާޒިރުކޮށް ސުވާލު ވެސް ކޮށްފައެވެ. ވިލުފުށީ ހައުސިން ޔުނިޓްގެ ފަރުމާއާ ގުޅޭގޮތުން ރައްޔިތުންގެ ޝަކުވާތައް ހުރުމުން އެކަމަށް ހައްލެއް ހޯއްދަވައިދެއްވިދާނެތޯ، މެމްބަރު އަފީފް ކުރެއްވި ސުވާލަށް ޖަވާބުދެއްވަމުން އާތިފާ ވިދާޅުވީ ވިލުފުށީ ހައުސިން ޔުނިޓްތައް ފަރުމާކުރުމުގައި ބޭނުންކުރަމުން އަންނަނީ، ސަރުކާރުގެ އެހެން ހައުސިންގ މަޝްރޫއުތަކުގައި ވެސް ބޭނުންކުރަމުން އަންނަ ފަރުމާ ކަމަށެވެ. އަދި އެ ފަރުމާއާ ގުޅޭގޮތުން ވިލުފުށީ ރައްޔިތުންގެ ފަރާތުން އެއްވެސް ޝަކުވާއެއް މިނިސްޓްރީއަށް ލިބިފައިނުވާ ކަމަށެވެ. ނަމަވެސް މި ވަގުތު ފަރުމާއަށް ބަދަލުގެނައުމަކީ އެކަމަށް ހޭދަވެގެންދާނެ ޚަރަދަށް ބަލާއިރު ކުރެވޭނެ ކަމެއް ނޫން ކަމަށް އާތިފާ ވިދާޅުވިއެވެ. އެހެން ނަމަވެސް އެ ފަރުމާތަކާ ގުޅޭ ގޮތުން ރައްޔިތުންގެ ޝަކުވާ ހުރިނަމަ ނުވަތަ ފަރުމާ ބަދަލުކުރަން އެދޭނަމަ ކުރިއަށް ހުރި ހައުސިންގ މަޝްރޫއުތަކުގައި ފަރުމާއަށް ބަދަލު ގެނެވިދާނެ ކަމަށް އާތިފާ ވިދާޅުވިއެވެ.
