ޖަޕާނުން ވެސް ރާއްޖެއަށް ވެކްސިން ހަދިޔާ ކުރަނީ!

ކޮވިޑް-19ން ރައްކާތެރިވުމަށް ޖަޕާނުން ރާއްޖެއަށް ވެކްސިން ހަދިޔާކުރަން ނިންމައިފިއެވެ.

ފޮރިން މިނިސްޓްރީން ހާމަކުރި ގޮތުގައި ކޮވިޑް-19ން ރައްކާތެރިވުމަށް ޖަޕާނުން ރާއްޖެއަށް ވެކްސިން ހަދިޔާކުރަން ވަނީ ނިންމާފައެވެ. މިތަކެތި ހަވާލުކުރުން އޮގަސްޓް 22 ވަނަ ދުވަހު މެންދުރު އެ މިނިސްޓްރީގައި ކުރިއަށްދާނެކަމަށް ވަނީ ބުނެފައެވެ. ޖަޕާނުން މި ވެކްސިން ހަދިޔާ ކުރަނީ ކޮވެކްސް ފެސިލިޓީގެ ތެރެއިން ކަމަށް އެ މިނިސްޓްރީއިން ހާމަކުރެއެވެ. މިކަމުގެ އިތުރު ތަފްސީލެއް އެ މިނިސްޓްރީއިން ހާމަކޮށްފައެއް ނުވެއެވެ.

ދިވެހިރާއްޖެއަށް މީގެ ކުރިން ވެސް އެކި ޤައުމުތަކުން ވަނީ ވެކްސިން ހަދިޔާކޮށްފައެވެ. އެގޮތުން އިންޑިއާ އަދި އެމެރިކާ ފަދަ ޤައުމުތަކުން ވަނީ ވެކްސިން ހަދިޔާކޮށްފައެވެ.

އުންމީދަކީ، މަހެއްހާ ދުވަހުގެ ތެރޭގައި އުމުރުން 5 އަހަރުން މަތީގެ އާބާދީއަށް ވެކްސިން ޖެހޭނެ ގޮތް ހަމަޖެހިގެން ދިޔުން ކަމަށް ހެލްތް މިނިސްޓަރު އަހުމަދު ނަސީމު ވަނީ ވިދާޅުވެފައެވެ. މިނިސްޓަރު ވިދާޅުވީ، ރާއްޖޭގައި ކޮވިޑްގެ ކޭސްތައް މިހާރު ކޮންމެވެސް ވަރަކަށް ކޮންޓްރޯލް ވެފައިވާކަމަށެވެ. މިހާރުވެސް އާބާދީގެ ބޮޑުބަޔަކަށް ވެކްސިން ޖެހުމުން ޕޮޒިޓިވް ރޭޓް އިތުރަށް ދަށަށްދާނެ ކަމަށާއި، ބަލި ޖެހުނަށް ބޮޑުވަރުނުވެ އެކަމުން ސަލާމަތް ވެވޭނެ ކަމަށެވެ.

ފައިޒަރ ވެކްސިން ޖަހަން ފަށާފައިވަނީ އޮގަސްޓް 15ވީ އާދީއްތަ ދުވަހުގެ ހެނދުނު އިސްލާމީ މަރުކަޒުގައެވެ. ސްކޫލް ދަރިވަރުންގެ އިތުރުން އާންމުންނަށް މި ވެކްސިން ދިނުމަށް ވަނީ ހުޅުވާލާފައެވެ. އެޕޮއިންޓްމެންޓް ހެއްދުމުން ވެކްސިން ޖެހުމުގެ އިންތިޒާމުތައް ހަމަޖެހިގެންދާނެ ކަމަށް އެޗްޕީއޭއިން ބުނެއެވެ.