މާލެ ސަހައްދުގައި އެޕޮއިންޓްމަންޓާ ނުލައި އެސްޓްރަޒެނެކާ ވެކްސިން ޖެހޭނެކަމަށް ހެލްތް ޕްރޮޓެކްޝަން އޭޖެންސީ، އެޗްޕީއޭއިން ހާމަކޮށްފިއެވެ.

އެޗްޕީއޭއިން ބުނީ އެސްޓްރަޒެނެކާގެ ވެކްސިންޖެހުމަށް ޚާއްސަކޮށްފައިވާ މަރުކަޒުތަކުން އެޕޮއިންޓްމަންޓާއި ނުލައި ވެކްސިންޖެހޭނެކަމަށެވެ. މި ސެންޓަރުތަކުގެ ތެރޭގައި ހިމެނެނީ ސޯޝަލް ސެންޓަރ، ހުޅުމާލޭ ހޮސްޕިޓަލް, އަދި ވިލިމާލޭ ޔޫތު ސެންޓަރެވެ. މިގޮތަށް ބަދަލު ގެނައިކަމުގައި ވީނަމަވެސް، ވެކްސިން ޖެހުމަށް މިހާތަނަށް އެޕޮއިންޓްމަންޓް ހަދާފައިވާ މީހުންނަށް އިސްކަންދޭނެކަމަށް އެޗްޕީއޭއިން ބުނެއެވެ.

އެޗްޕީއޭއިން މައުލޫމާތު ދޭ ގޮތުގައި 18 އަހަރު ފުރި ވެކްސިންގެ އެއްވެސް ޑޯޒެއް ޖަހާފައި ނުވާ މީހުން ފުރަތަމަ ޑޯޒް ޖެހުމަށާއި، ފުރަތަމަ ޑޯޒް ޖެހިތާ 8 ހަފްތާ ފާއިތުވެފައިވާ މީހުން ދެވަނަ ޑޯޒް ޖެހުމަށް މިހާރު ވަނީ ފުރުސަތު ހުޅުވާލާފައެވެ.

އެޗްޕީއޭއިން އާންމުކޮށްފައިވާ މައުލޫމާތުތަކަށް ބަލާއިރު، ސޯޝަލް ސެންޓަރުން ރޭގަނޑު 20:00ން ފެށިގެން 22:00ށް އެސްޓްރަޒެނެކާ ވެކްސިން ޖެހޭނެއެވެ. އަދި ހުޅުމާލޭ ހޮސްޕިޓަލުން ހެނދުނު 09:00ން ފެށިގެން މެންދުރު 12:00ށް ވެކްސިން ޖެހޭނެކަމަށް ބުނެފައިވާއިރު، ވިލިމާލޭ ޔޫތު ސެންޓަރުން ހެނދުނު 09:00ން ފެށިގެން މެންދުރު 12:00ށް ވެކްސިން އެސްޓްރަޒެނެކާ ވެކްސިން ޖެހޭނެކަމަށް އެޗްޕީއޭއިން މައުލޫމާތު ދެއެވެ.

ވެކްސިން ނުޖަހާ މީހުންނަށް ބައެއް ޚިދުމަތްތައް ލިބިގަތުމުގައި ހުރަސްތަކެއް މިހާރު ވަނީ ކުރިމަތިކޮށްފައެވެ. އެގޮތުން ސެޕްޓެމްބަރު 1 ވަނަ ދުވަހުގެ ފަހުން, ވެކްސިން ނުޖަހައި ދަތުރުކުރާ ފަރާތްތަކުގެ ރިލީޒް ސާމްޕަލް ދެން ހިލޭ ހަދައި ނުދޭނެ ކަމަށް އެޗްއީއޯސީން ވަނީ ބުނެފައެވެ. އަދި ވެކްސިން ނުޖަހާ މީހުންނަށް އެތެރޭގެ އުދުހުންތަކުން ވެސް ދަތުރުނުކުރެވޭ ގޮތަށް ނިންމުމަށް ސަރުކާރުން މަޝްވަރާތައް ފަށާފައިވާއިރު، ވެކްސިންގެ އެއްވެސް ޑޯޒެއް ނުޖަހާ ތިބި މީހުންނަށް ކެފޭ ރެސްޓޯރެންޓުތަކުން ޚިދުމަތް ނުދިނުމަށްވެސް ސަރުކާރުން ވަނީ ނިންމާފައެވެ.