ޔޫކޭ ރެޑް ލިސްޓްގައި ރާއްޖެ އޮންނަންޖެހޭ ސަބަބެއް މިހާރު ނެތް: ޑރ. ފަރަޙަނާޒް
އެންމެ ގިނަ އަދަދެއްގެ ފަތުރުވެރިން އަންނަ 10 ގައުމުގެ ލިސްޓުގައި ޔޫކޭ ހިމެނޭ
ދިވެހިރާއްޖެއިން އިނގިރޭސިވިލާތަށް ކަނޑައަޅާފައި ހުންނަވާ ސަފީރު ޑރ. ފަރަޙަނާޒް ފައިޞަލް
އިނގިރޭސިވިލާތުގެ ރައްޔިތުންނަށް ކަރަންޓީނު ނުވެ ދަތުރުކުރެވޭ ގައުމުތަކުގެ ތެރެއިން, ރެޑް ލިސްޓުގައި ރާއްޖެ ހިމެނެންޖެހޭ އެއްވެސް ސަބަބެއް މިހާރު ނެތްކަމަށް ދިވެހިރާއްޖޭން އިނގިރޭސިވިލާތަށް ކަނޑައަޅާފައި ހުންނަވާ ސަފީރު ޑރ. ފަރަޙަނާޒް ފައިޞަލް ވިދާޅުވެއްޖެއެވެ.
އިނގިރޭސިވިލާތުން "ދަތުރުފަތުރުގެ ސަމާލު"ގެ ގޮތުގައި ކަނޑައަޅާ "ރެޑް ލިސްޓް"ގައި ރާއްޖެ ހިމަނާފައިވަނީ, އެ ގައުމެއްގައި ފެތުރެނީ ބަލީގެ ކޮން ވޭރިއެންޓެއްކަން ދެނެގަތުމަށް ހަދާ ޖިނޯމިކް ސީކުއެންސިން ޓެސްޓު ނުހަދާ އޮތުމުންކަމަށް އެޗްޕީއޭއިން މީގެ ކުރިން ވަނީ މީޑިއާތަަކަށް މައުލޫމާތު ދީފައެވެ. ނަމަވެސް މިހާރު އިނގިރޭސިވިލާތުން ބޭނުންވާ ޖީނޯމް ސީކުއެންސް ޑާޓާތައް ލިބެން ހުންނާނެކަން ޑރ. ފަރަޙަނާޒް ފާހަގަ ކުރެއްވިއެވެ.
ޑރ ފަރަޙަނާޒް ވިދާޅުވީ، ޖިސެއިޑް ވެބްސައިޓުގައި މިހާރު އެ މައުލޫމާތުތައް އަޕްޑޭޓް ކޮށްފައިވާ ކަމަށެވެ. އަދި ރާއްޖޭގައި މިވަގުތު ހުރި ކޮވިޑު ކޭސްތަކުގެ އަދަދުވެސް ދަށްކަން ފާހަގަ ކުރައްވައި ޑރ. ފަރަހަނާޒް ވިދާޅުވީ، ގިނަ ގައުމުތަކާ އަޅާކިޔާއިރު ރާއްޖޭގެ ވެކްސިން ޖެހުމުގެ ރޭޓުވެސް މަތި ކަމަށެވެ. އެހެންކަމާއެކު މިހާރު ޔޫކޭގެ ރެޑް ލިސްޓުގައި ރާއްޖެ އޮންނަންޖެހޭ ސަބަބެއް ނެތްކަމަށް އޭނާ ވިދާޅުވިއެވެ.
ރާއްޖެއަށް އެންމެ ގިނަ އަދަދެއްގެ ފަތުރުވެރިން އަންނަ 10 ގައުމުގެ ލިސްޓުގައި އިނގިރޭސިވިލާތް ހިމެނޭއިރު، އެ ގައުމުގެ ރެޑް ލިސްޓުން ރާއްޖެ އުނިކުރުމަކީ ރާއްޖޭގެ ފަތުރުވެރިކަމަށް އިތުރު ކުރިއެރުމެއް އަންނާނެ ކަމެކެވެ. އެގޮތުން މިހާރުވެސް ކޮވިޑް-19ގެ ހާލަތުގެ ކުރިން ރާއްޖެއަށް އަންނަ މިންވަރަށް ފަތުރުވެރިން އަންނަމުންދާކަމަށް ޓޫރިޒަމް މިނިސްޓްރީގެ ފަހުގެ ތަފާސްހިސާބުތަކުން ދައްކައެވެ.
