ގައްދޫ މަގުހެދުމުގެ މަސައްކަތުގެ ދަށުން ޝަޓަރިންގެ 93 އިންސައްތަ ނިންމާލައިފި
21 އޯގަސްޓު 2021 | ހޮނިހިރު 07:07ގައްދޫ މަގުހެދުމުގެ މަސައްކަތް ހަވާލުކޮށްފައިވަނީ 2019 ޑިސެމްބަރ 31 ވަނަ ދުވަހު
ގައްދޫ މަގު ހެދުމުގެ މަސައްކަތް
ގދ. ގައްދޫ މަގުހެދުމުގެ މަސައްކަތުގެ ދަށުން ޝަޓަރިންގެ 93 އިންސައްތަ ނިންމާލާފައިވާ ކަމަށްް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)ން ބުނެފިއެވެ.
އާރްޑީސީން ބުނީ ގައްދޫ މަގު ހެދުމުގެ މަސައްކަތް ވަރަށް ބާރަށް ކުރިއަށް ދާ ކަމަށެވެ. އަދި މިހާރު ބޮޑުބައި ނިމިފައިވާ ކަމަށާ. ހަލުވިކަމާއެކު އަވަހަށް ނިންމަން އަމާޒު ހިފާފައިވާ ކަމަށެވެ. އެގޮތުން ވަތަބަނޑޭރި މަގުގެ ސައިޑްވޯކް ކޮނެ، ޝަޓަރިންގެ 93 ނިމި ކޮންކްރީޓް ކީވޯލްގެ 35 ވެސް ވަނީ ނިމިފައި ކަމަށެވެ.
ގައްދޫ މަގުހެދުމުގެ މަޝްރޫޢުގެ މަސައްކަތްތަކުގެ ތެރޭގައި، ހޮޅި އެޅުމުގެ މަސައްކަތް ވެސް ހިމެނޭ ކަމަށް އާރްޑީސީ އިން ބުނެއެވެ.
މި މަޝްރޫއުގެ ދަށުން ކުރުމަށް ހަމަޖެހިފައިވާ މަސައްކަތްތަކުގެ ތެރޭގައި، ގދ.ގައްދޫގެ 06 މަގެއްގައި ތާރުއަޅާ ރަނަގަޅު ފެންވަރަކަށް ހެދުން ހިމެނެއެވެ. މިގޮތުން ގައްދޫގައި ހެދުމަށް ހަމަޖެހިފައިވަނީ 6 ކިލޯމީޓަރުގެ މަގެވެ.
އަދި މަގުތަކުގެ ސައިޑްވޯކްސް ހެދުމާއި ތާރު އެޅުމުގެ އިތުރުން ފެންް ހިންދުމުގެ ނިޒާމު ގާއިމުކުރުން ހިމެނެއެވެ. މި މަޝްރޫއުގެ އަގަކީ 138،738،153.42 (ސަތޭކަ ތިރީސް އަށް މިލިއަން ހަތްލައްކަ ތިރީސް އަށްހާސް އެއް ސަތޭކަ ފަންސާސް ތިން ރުފިޔާ ސާޅީސް ދެ ލާރި) އެވެ.
މިއީ 510 ދުވަހުގެ ތެރޭގައި ނިންމުމަށް ހަމަޖެހިފައިވާ މަޝްރޫއެކެވެ. ގައްދޫ މަގުހެދުމުގެ މަޝްރޫއު، މިނިސްޓްރީ އޮފް ނޭޝަނަލް ޕްލޭނިން، ހައުސިން އެންޑް އިންފްރާންސްޓްރަކްޗަރއިން ރޯޑް ޑިވެލޮޕްމަންޓް ކޯޕަރޭޝަނާ ހަވާލުކޮށްފައި ވަނީ 2019 ޑިސެމްބަރ 31 ވަނަ ދުވަހުއެވެ.
