ތިންވަނަ ޑިވިޝަން ފުޓްބޯޅަ މުބާރާތުގެ ފައިނަލުގައި ބުރު ސްޕޯޓްސް ކުލަބާއި ބިސް ބުރު ސްޕޯޓްސް ކުލަބު ބައްދަލުކުރަން ޖެހިއްޖެއެވެ.

މާފަންނު ޓާފް އެއް ނަންބަރު ދަނޑުގައި ކުރިއަށްދާ މި މުބާރާތުގެ ފައިނަލުގެ ފުރަތަމަ ޖާގަ ބުރު ސްޕޯޓްސްއިން ހޯދި ބުރާސްފަތި ދުވަހުގެރޭ ކުޅުނު ސެމީ ފައިނަލް ފުރަތަމަ މެޗުގައި ކުލަބު އޮންލީ ވަން އޮޕޮޗިއުނިޓީ (އޯވަންއޯ) އާ ބައްދަލުކޮށް ފަސޭހަކަމާއެކު 7-1 ގެ ނަތީޖާއަކުން މޮޅުވެގެންނެވެ.

މި މެޗުގައި ބުރު ސްޕޯޓްސްގެ ލަނޑުތައް ކާމިޔާބުކޮށްދިނީ މުޙައްމަދު ތަޝްމީނާއި، އަބްދުﷲ ޝާފިއު އާއި، ރޯމަން ކުޑްޗެންކޯ އާއި، ސޮބޮލް އިލިއާ އާއި، އިބްރާހިމް މުބީން އަޙްމަދު ރަޝީދު އަދި މުޙައްމަދު އަތީފެވެ. މީގެ ތެރެއިން ތަޝްމީން ވަނީ މެޗުގައި ދެ ލަނޑު ޖަހާފަ އެވެ. މި މެޗުގައި އޯވަންއޯގެ ހަމައެކަނި ލަނޑު ފުރަތަމަ ހާފުގެ ފަހު މިނެޓުގައި ކާމިޔާބުކޮށްދިނީ ގޮޑްފްރޭ ވެސްޓް އޮމޮޑޫއެވެ.

މި ފަހަރުގެ ފައިނަލަށް ބުރު ސްޕޯޓްސް ދަތުރުކުރިއިރު، މި މުބާރާތުގައި އެ ޓީމަށް އިރުޝާދުދެމުން އަންނަނީ ކުލަބު އީގަލްސްގެ އެސިސްޓަންޓް ކޯޗު އަޙްމަދު ނިމާދު (ނިމާ) އެވެ.

މީގެ އިތުރުން މި މުބާރާތުގެ ފައިނަލަށް ބިސް ބުރު ދަތުރުކުރީ ހުކުރު ދުވަހުގެރޭ ކުޅުނު ސެމީ ފައިނަލް ދެވަނަ މެޗުގައި ލިޓްލް ޓައުން ސްޕޯޓްސް (އެލްޓީ) އަތުން 2-0 ގެ ނަތީޖާއަކުން މޮޅުވެގެންނެވެ. މި މެޗުގައި މެޗުގައި ބިސް ބުރުން ލީޑު ނަގާފައިވަނީ މެޗުގެ 19 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ މުޙައްމަދު ފައިހާން އިމްރާނެވެ. އަދި ފުރަތަމަ ހާފު ނިމެން ތިން މިނެޓަށް ވެފައި ވަނިކޮށް މުޙައްމަދު ފާރިޝް ހަސަން ބިސް ބުރަށް ލީޑު ފުޅާކޮށްދީފައެވެ.

މި ފަހަރުގެ މުބާރާތުގެ ފައިނަލުގައި ބުރު ސްޕޯޓްސް އާއި ބިސް ބުރު ބައްދަލުކުރާއިރު، ފައިނަލް މެޗު ކުޅޭނީ އަންނަ ހޯމަ ދުވަހުގެރެއެވެ. މި މުބާރާތުގެ ސެމީ އށް ދަތުރުކުރި ހަތަރު ޓީމަށްވެސް ވަނީ އަންނަ ސީޒަނުގެ ދެވަނަ ޑިވިޝަނުން ފުރުސަތު ލިބިފައެވެ.

މި އަހަރު ތިންވަނަ ޑިވިޝަން ފުޓްބޯޅަ މުބާރާތް ކުރިއަށްދާއިރު، މިދިޔަ ދެ އަހަރުވެސް މި މުބާރާތް ބާއްވާފައެއް ނުވެއެވެ. އެންމެ ފަހުން މި މުބާރާތް 2018 ވަނަ އަހަރު ބޭއްވިއިރު، އެ ފަހަރު ޗެމްޕިއަންކަން ހޯދީ ރޮކް ސްޓްރީޓްސް ސްޕޯޓްސް ކުލަބެވެ.