ދިރާސީ އައު އަހަރުގެ ކިޔެވުން ފެށުނުއިރު ދަރިވަރުންނަށް ނުލިބި ހުރި ފޮތްތައް ފޮނުވުމުގެ މަސައްކަތް އެޑިއުކޭޝަން މިނިސްޓްރީން ފަށައިފިއެވެ.
އެޑިއުކޭޝަން މިނިސްޓްރީން ބުނީ މިހާތަނަށް ދަރިވަރުންނަށް ހާޑްކޮޕީ ލިބިފައިނުވާ ފޮތްތައް މިހާރު މިނިސްޓްރީއަށް ލިބިފައިވާ ކަމަށެވެ. އަދި އެ ފޮތްތައް ސްކޫލްތަކަށް ފޯރުކޮށްދިނުމުގެ މަސައްކަތް ފަށައިވާ ކަމަށް ބުނެއެވެ.
ދިރާސީ އައު އަހަރުގެ ކިޔެވުން ފެށީ އޮގަސްޓް މަހުގެ 10 ވަނަ ދުވަހުއެވެ. ސްކޫލުތަކުގައި ކިޔަވައިދޭން ފެށިއިރު ފޮތްތައް ހަމަނުވާ މައްސަލަ ބޮޑުވެ، ބައެއް ސްކޫލުތަކުގެ ބެލެނިވެރިން ކަންބޮޑުވުން ފާޅުކޮށްފައިވެއެވެ. އަދި ޓީޗަރުން ހަމަނުވާ މައްސަލަ ވެސް ފެންމަތިވެފައިވެއެވެ.
ދިރާސީ އައު އަހަރުގެ ކިޔެވުން ފަށާފައިވަނީ ގިނަ ދުވަސްތަކެއް ވަންދެން ސްކޫލްތަކުގެ ކިޔެވުން އޮންލައިންކޮށް ކުރިއަށްގެންދިއުމަށްފަހުއެވެ. ދަރިވަރުން އަނބުރާ ސްކޫލްތަކަށް ގެންދިއުމަށް ސްކޫލްތަކުން އޮތީ ވަރަށް ބޮޑަށް ތައްޔާރުވެފައެވެ. އެގޮތުން ދަރިވަރުން ސްކޫލަށް ވަންނަ އިރު ހުން ބެލުމާއި އަތް ސާފުކުރުމުގެ ކަންކަން ކުރިއަށްގެންގޮސްފައިވެއެވެ. މިއީ އެޑިއުކޭޝަން މިނިސްޓްރީން އެކުލަވާލާފައިވާ ގައިޑްލައިންތަކުގައި ހިމަނާފައިވާ ކަންކަމެވެ.
ގައިޑްލައިންގައި ހިމަނާފައިވާ ގޮތަށް ކްލާސްރޫމްތަކުގައި ދަރިވަރުން ތިބޭއިރު ގައިދުރުކަން ހުންނާނެހެން ކުދިންގެ ސީޓިން އެރޭންޖްމެންޓް ވަނީ ހަމަޖައްސާފައެވެ. މީގެ އިތުރުން ދަރިވަރުން ސްކޫލް ތެރޭގައި އުޅޭއިރުވެސް ގައިދުރުކަން ހުންނާނެހެން އިންތިޒާމުތައް ވަނީ ހަމަޖައްސާފައެވެ. ދަރިވަރުންގެ ކިބައިން ކޮވިޑް-19 ގެ އެއްވެސް އަލާމާތެއް ފެންނަން ހުންނަނަމަ ދަރިވަރުން ސްކޫލަށް ނުފޮނުވުމަށް އެޑިއުކޭޝަން މިނިސްޓްރީން މީގެ ކުރިން އަންގާފައިވެއެވެ. ސްކޫލްތަކުގައި ބަލި ފެތުރުން ހުއްޓުވޭނީ މިގޮތަށް އަމަލުކޮށްގެން ކަމަށް އެޑިއުކޭޝަން މިނިސްޓްރީން ބުނެފައިވެއެވެ.
