ފިލިޕީންސްގައި ކޮވިޑް ޖެހޭ މީހުންނާއި ކޮވިޑް ޖެހިގެން މަރުވާ މީހުންގެ އަދަދު ރިކޯޑް މިންވަރަކަށް މައްޗަށް އުފުލިއްޖެއެވެ.

އެގައުމުގައި ކޮވިޑްގެ ހާލަތު ގޯސްވާން ފަށާފައިވަނީ އިގްތިސާދީ ހަރަކާތްތަކަށް ޖާގަ ދިނުމުގެގޮތުން ކެޕިޓަލް ސިޓީ ހިމެނޭ ސަރަހައްދުގައި ކޮވިޑު ފެތުރުން ކޮންޓްރޯލްކުރުމަށް އަޅާފައިވާ ފިޔަވަޅުތަކަށް ކޮންމެސްވަރެއްގެ ލުޔެއް ދީފައިވަނިކޮށެވެ.

އެގައުމުގެ ހެލްތު މިނިސްޓްރީން ހާމަކޮށްފައިވާ ގޮތުގައި ހުކުރު ދުވަހު އެގައުމުގައި 17،231 މީހުންނަށް ވަނީ ކޮވިޑް ޖެހިފައެވެ. އަދި 317 މީހުން ވަނީ މަރުވެފައެވެ. މިއީ ފާއިތުވި ހަތަރު މަހު އެގައުމުގައި މިބަލީގައި އެއްދުވަހާ މިހާ ގިނަ މީހުން މަރުވި ފުރަތަމަ ފަހަރެވެ. މިއާއެކު އެގައުމުގައި ކޮވިޑް ޖެހުނު މީހުންގެ 1.8 އިންސައްތަ މީހުން ވަނީ މަރުވެފައެވެ. އޮގަސްޓް މަހު ކޮވިޑް ޖެހިގެން މަރުވާ މީހުންގެ އިންސައްތަ ހުރީ 1.5 އިންސައްތައިގައެވެ. ޖުލައި މަހު މަރުވާ ރޭޓް ހުރީ 1.9 އިންސައްތައިގައެވެ.

ފިލިޕީންސްގައި ކޮވިޑް ޖެހުނު މީހުންގެ އަދަދު 1.8 މިލިއަނަށް އަރާއިރު މަރުވި މީހުންގެ އަދަދު ހުރީ 31،198ގައެވެ. ފިލިޕީންސްއަކީ އޭޝިޔާގެ ގައުމުތަކުގެ ތެރެއިން ކޮވިޑް ޖެހިފައިވާ މީހުންގެ އަދަދު އެންމެ މަތިން ރިޕޯޓްކުރަމުން އަންނަ ގައުމެވެ.

ހެލްތު މިނިސްޓްރީން ވަނީ ކުރިޔަށް އޮތްތަނުގައިވެސް ކޮވިޑް ޖެހޭ މީހުންގެ އަދަދު އިތުރުވަމުންދާނެތީ އަވަހަށް ވެކްސިން ޖެހުމަށް ރައްޔިތުންނަށް އިލްތިމާސްކޮށްފައެވެ.

ހެލްތު މިނިސްޓްރީން ނެރެފައިވާ ބަޔާނެއްގައި ބުނެފައިވަނީ އަވަހަށް ޓެސްޓް ކުރުމުންނާއި ބަލީގެ އަލާމާތެއް ފެންނަނަމަ އަވަހަށް ޑޮކްޓަރަށް ދެއްކުމުގެ ސަބަބުން ބަލި ކުރީބައިގައި ދެނެގަތުމަށް ފަސޭހަވާނެ ކަމަށެވެ. އެހެންކަމުން ގޭގެއާއި ބޮޑެތި އާބާދީތައް އަދި މަސައްކަތްކުރާ ތަންތަނުގައި ވައިރަސް ފެތުރޭ މިންވަރު މަދުކުރެވިގެންދާނެކަމަށް ވަނީ ބުނެފައެވެ.

އެގައުމުގައި މިވަގުތު އެކްޓިވް ކޭހުގެ ގޮތުގައި 123،251 ކޭހެއް އަންނަނީ ރިޕޯޓްކުރަމުންނެވެ. އަދި ޓެސްޓް ކުރާ ސާމްޕަލްތަކުގެ 26 އިންސައްތަ އަންނަނީ ޕޮޒިޓިވްވަމުންނެވެ.

ކޮވިޑްގެ ބަލި މީހުންނާއިގެން ހޮސްޕިޓަލްތައް ފުރެމުންދާއިރު އައިސީޔޫތަކުގެ 73 އިންސައްތަ މިހާރު ވަނީ ފުރިފައެވެ. އަދި އައިސޮލޭޝަން ފެސިލިޓީތަކުގައި ހުރި އެނދުގެ 61 އިންސައްތަ ވަނީ ފުރިފައިކަމަށް އެގައުމުގެ ސަރުކާރުން ހާމަކޮށްފައިވާ ތަފާސްހިސާބުތަކުން ދައްކައެވެ.

ފިލިޕީންސްގެ ރައީސް ރޮޑްރިގޯ ޑުޓާޓޭ ވަނީ ބުރާސްފަތި ދުވަހު އެގައުމުގެ ކެޕިޓަލް ސިޓީ ސަރަހައްދުގައި ހިމެނޭ 16 އަވަށެއްގައި ފިޔަވަޅުތަކަށް ލުއި ދިނުމުގެ ހުއްދަ ދީފައެވެ. ފިޔަވަޅުތަކަށް ލުއި ދީފައިމިވަނީ އިގްތިސާދީ ހަރަކާތްތައް އަލުން ހިންގުމަށް ފުރުސަތު ދިނުމުގެ ގޮތުންނެވެ.