ޑޮލަރުގެ ތާށިކަމާއެކު ލަންކާގައި ތަކެތީގެ އަގު އުފުލިއްޖެ
މިހާރު ދިމާވެގެން އުޅެނީ ޑޮލަރުގެ ތާށިކަން
ސްރީލަންކާގެ ޕެޓްރޯލް ޝެޑެއްދޮށުގައި ކިޔޫހަދާފައި
ޑޮލަރުގެ ތާށިކަން ބޮޑުވެ, ލަންކާގައި ތަކެތީގެ އަގު ބޮޑުވެއްޖެއެވެ.
އަގު ބޮޑުވެގެން ބައެއް ތަކެތި ނުލިބިދާނެކަމުގެ ބިރާއެކު ރައްޔިތުންވަނީ ފިހާރަތަކާއި ޕެޓްރޯލް ޝެޑްތައްދޮށުގައި ކިޔޫ ހަދާފައެވެ. ޕެޓްރޯލާއި ޑީސެލްގެ ސްޓޮކް މަދުވަފައިވާކަން އެ ގައުމުގެ އެނަރޖީ މިނިސްޓަރ އިއުލާނު ކުރެއްވުމާއެކު ކޮލަމްބޯއާއި އެހެން ހިސާބުތަކުގެވެސް ޝެޑްތައްދޮށުގައި ވަނީ ކިޔޫ ހަދާފައެވެ. އެނަރޖީ މިނިސްޓަރ ބުނެފައިވަނީ ޕެޓްރޯލް ސްޓޮކް ހުރީ 10 ދުވަހަށް ވާވަރަށް ކަމަށާއި، ޑީސެލް ހުރީ 11 ދުވަހަށް ވާވަރަށް ކަމަށެވެ.
މިނިސްޓަރ ވިދާޅުވީ، މިހާރު ދިމާވެގެން އުޅެނީ ޑޮލަރުގެ ތާށިކަން ކަމަށެވެ.
މިހާރުވެސް ހަދާފައިވާ ދިގު ކިޔޫތަކަށް އެކަށީގެންވާވަރަށް ޕެޓްރޯލް ދެވޭނެކަމުގެ ޔަގީންކަން ނެތް ކަމަަށް ލަންކާގެ މީޑިއާތަކުން ރިޕޯޓު ކުރެއެވެ. ގައުމުގައި ފައިސާ ޗާޕް ކުރެވޭ އެންމެ ގިނަ އަދަދަކަށް މިހާރު ޗާޕް ކޮށްފައިވާކަމަަށް ވެސް ވަނީ ރިޕޯޓު ކޮށްފައެވެ.
ޕާނުގެ ބާވަތްތައް ހެދުމަށް ބޭނުންކުރާ ސާމާނުގެ އަގު ބޮޑުވެފައިވާތީ އެ ވިޔަފާރިތަކުންވެސް އަންނަނީ ޝަކުވާ ކުރަމުންނެވެ. މި ކަމުގެ އަސަރު, އަންނަ ހަފްތާގެ ތެރޭގައި އުފެއްދުންތަކުން ފެންނަން ފަށާނެ ކަމަށް މީޑިއާތަކުން ރިޕޯޓު ކޮށްފައިވެއެވެ. މިކަމުގެ ސަބަބުން ބޮޑެތި އުނދަގޫތަކެއް ކުރިމަތިވާނެ ކަމަށް އެ ވިޔަފާރިތަކުން ބުނެއެވެ. އަގުތައް މައްޗަށް ދަނީ ވިޔަފާރިތަކަށް ނުތަކާ ވަރަށް ކަމަށް އެމީހުން ބުނެއެވެ.
ވިޔަފާރިތަަކުން ބުނީ، މިކަމަށް ސަރުކާރުގެ ފަރާތުން ކޮންމެވެސް ހައްލެއް ގެނެސްދޭނެ ކަމަށް އުންމީދު ކުރެވޭ ކަމަށެވެ.
