ވިސްނުމަކީ ރައްޔިތުންގެ އަޑުއަހައިގެން ވެރިކަން ކުރުން - ރައީސުލްޖުމްހޫރިއްޔާ
ޑިމޮކްރަޓިކް ވެރިކަމެއް ކުރަން ފަސޭހަ ނުވަނީ ރައްޔިތުންނަށް ދޭންޖެހޭ މިނިވަންކަމާއި ބާރުތައް މިކަމުގައި އެކުލެވިގެންވާތީ
ރައީސް އިބްރާހިމް މުހައްމަދު ސާލިހު ކަނޑޫދޫގެ އެމްޑީޕީގެ އާންމު މެންބަރުންނާއި ބައްދަލުކުރެއްވުން
ވިސްނުންފުޅަކީ ރައްޔިތުންގެ އަޑުއަހައި ވެރިކަން ކުރެއްވުން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
ކޮޅުމަޑުލުގެ 7 ރަށަކަށް ރައީސް ކުރައްވަމުން ގެންދަވާ ދަތުރުފުޅުގެ ތެރެއިން ކަނޑޫދޫގެ އެމްޑީޕީގެ އާންމު މެންބަރުންނާއި ބައްދަލުކުރައްވާ ވާހަކަފުޅު ދައްކަވަމުން ރައީސް ވަނީ ވެރިކަން ކުރެއްވުމުގައި ރައްޔިތުންގެ އަޑު އައްސަވާނެކަމަށް ވިދާޅުވެފައެވެ. އަދި ކުރިއަށް އޮތްތަނުގައި ވެސް ސަރުކާރުން އަމަލުކުރައްވާނީ އެގޮތަށް ކަމަށާއި، ޑިމޮކްރަޓިކް ވެރިކަމަކީ ކުރަން ފަސޭހަ ކަމެއް ނޫން ކަމަށް ވިދާޅުވިއެވެ. އެމަނިކުފާނު ވިދާޅުވީ ޑިމޮކްރަޓިކް ވެރިކަމެއް ކުރަން ފަސޭހަ ނުވަނީ ރައްޔިތުންނަށް ދޭންޖެހޭ މިނިވަންކަމާއި ބާރުތައް މިކަމުގައި އެކުލެވިގެންވާތީ ކަމަށެވެ،. އަދި އެމިނުކުފާނު ވެރިކަން ކުރައްވަމުން ގެންދަވަނީ އެ ހުރިހާ ކަމަކަށް ބެލުމަށްފަހުގައި ކަމަށާއި، ރަނގަޅު ކަންތައްތައް އަންނާނެ ކަމަށް ވިދާޅުވިއެވެ.
ރައީސް ވިދާޅުވީ އެމަނިކުފާނާއި ސަރުކާރުގެ ވިސްނުންފުޅަކީ މި ކަންކަން އަޑުއަހައި ވެރިކަން ކުރެއްވުން ކަމަށާއި، ރައޔްިތުންނަށް އެ ލުއިފަސޭހަތައް ލިބިގެންދާނެ ކަމުގެ ޔަގީންކަށް ދެއްވާ ކަމުގައެވެ. ރައީސް ވަނީ އާންމު މެންބަރުން ޕާޓީއާއެކު ތިބުމަށް އެދިވަޑައިގެންފައެވެ. އަދި ޕާޓީއާއި ސަރުކާރުން ރައްޔިތުންނަށް ކުރަން ޖެހޭ ކަންކަން ކޮށްދެއްވާނެ ކަމަށާއި، ރައްޔިތުންގެ އަޑު އައްސަވާނެކަމަށް ވިދާޅުވިއެވެ.
ރައީސް ސާލިހު ވަނީ ޕާޓީ ހިންގުމުގައި ހުރި ކަންކަން ސާފުކުރައްވާފައެވެ. އަދި އާންމު މެންބަރުންގެ ފަރާތުން ހުށަހަޅަން ހުރި ކަންކަން ރައީސް ވަނީ އޮޅުން ފިލުއްވާފައެވެ.
ކޮޅުމަޑުލުގެ 7 ރަށަކަށް ކުރެއްވި ދަތުުރުފުޅުގެ ތެރެއިން ވަޑައިގެންނެވި ހުރިހާ ރަށެއްގެ އެމްޑީޕީގެ އާންމު މެންބަރުންނާއި ރައީސް ސާލިހު ވަނީ ބައްދަލުކުރައްވާފައެވެ. ރައީސް ވަނީ ޕާޓީގެ އެންމެ އިސް ލީޑަރުގެ ހައިސިއްުޔަތުން ޕާޓީއަށް ދެރަގޮތެއް ވިޔަ ނުދެއްވާނެކަމަށް ވިދާޅުވެފައެވެ. އަދި ޕާޓީ ހިންގުމުގައި އެމަނިކުފާނަށް ކުރެއްވެން ހުރި ކަންކަން ކުރައްވާނެ ކަމަށާއި، މި ސަރުކާރު ހިންގުމުގައި އެމްޑީޕީން އިސްރޯލެއް އަދާކުރާކަމަށް ރައީސް ވަނީ ވިދާޅުވެފައެވެ.
