މި އަހަރުގެ ޖޫން މަހުގެ ތެރޭގައި އުމުރުން 13 އަހަރުގެ ކުއްޖަކު ރަހީނުކޮށް، މަރާލައި މޫދަށް އެއްލާލާފައި އޮއްވާ ފެނުނު މައްސަލައިގައި ހައްޔަރުކޮށްފައިވާ ދެ މީހުންގެ މައްޗަށް ގަސްތުގައި މީހަކު މެރުމުގެ ދައުވާ އުފުލައި ކްރިމިނަލް ކޯޓަށް ފޮނުވައިފިއެވެ.
ނޫސްވެރިންނާ ބައްދަލު ކުރައްވައި ޕްރޮސެކިއުޓަރ ޖެނެރަލް ހުސެއިން ޝަމީމު ވިދާޅުވީ، ގަސްދުގައި މީހަކު މަރާލިކަމުގެ ދައުވާ އުފުލާފައިވަނީ 13 އަހަރުގެ ކުއްޖާގެ މަރާ ގުޅިގެން މިހާރު ހައްޔަރުކޮށްފައިވާ ނ. ލަންދޫ، ބަގީޗާގޭ އިބްރާހިމް ޒިހާންގެ އިތުރުން 17 އަހަރުގެ ފިރިހެން ކުއްޖާއަށް ކަމަށެވެ. ޕީޖީ ވިދާޅުވީ، ޒިހާންގެ މައްޗަށް 7 ބާވަތެއްގެ 13 ދައުވާއެއް އުފުލާފައިވާއިރު، އޭނާގެ މައްޗަށް ދައުވާ ސާބިތު ވެއްޖެނަމަ 100 އަހަރުގެ ޖަލު ހުކުމެއް އަންނާނެ ކަމަށެވެ.
ޕީޖީ ވިދާޅުވީ، މި މައްސަލައިގެ ދައުވާ ސާބިތުވާ ވަރަށް ހެކި އެބަހުރި ކަމަށެވެ.
ޒިހާންގެ މައްޗަށް އުފުލާފައިވާ ދައުވާތަކުގެ ތެރޭގައި:
ގަސްތުގައި މީހަކު މެރުން
މަސްތުވާތަކެތި ދީގެން ޖިންސީ އަމަލު ހިންގަން އުޅުން
ގްރޫމްކުރުން
މައްޔިތާގެ ބޭނުން ނަހަމަގޮތުގައި ހިފުން
ހުއްދަ ނޫން ގޮތެއްގައި ހިފެހެއްޓުން
ޖިނާއީ ކުށެއްގައި ކުޑަކުއްޖަކު ބޭނުންކުރުން
ޖިންސީ ނިޔަތެއް އޮވެގެން އަތް ލުމުގެ ފަސް ދައުވާ
ކުޑަކުދިންނަށް ޖިންސީ ގޯނާކުރުމުގެ އިތުރު ދައުވާތަކެއް
ކުޑަކުއްޖާގެ މައްޗަށް އުފުލި ދައުވާތަކުގެ ތެރޭގައި:
ގަސްތުގައި މީހަކު މެރުން
ހުއްދަ ނޫން ގޮތެއްގައި ހިފެހެއްޓުން
މައްޔިތާގެ ބޭނުން ނަހަމަ ގޮތެއްގައި ހިފުން
ހުޅުމާލޭގެ ދެވަނަ ފިޔަވަހީގެ އިރުމަތި ފަރާތު މޫދުގައި މަރާލާފައި ފޮއްޓެއްގެ ތެރެއަށްލާފައި އޮއްވާ ފެނުނު 13 އަހަރުގެ ފިރިހެން ކުއްޖާގެ ޕޯސްޓްމޯޓަމް ހަދަން ފޮނުވީ ޖުލައި 5 ވަނަ ދުވަހުއެވެ. އަދި އެކުއްޖާގެ ޕޯސްޓްމޯޓަމް ހެދުމަށްފަހު މާލެ ގެނެސް ވަޅުލާފައިވަނީ ޖުލައި 12 ވަނަ ދުވަހުއެވެ.
