ޔޫރޯގައި ވިދާލި ލޮކަޓެއްލީ ޔުވެންޓަސްއަށް

މި ފަހަރުގެ ޔޫރޯ ފުޓްބޯޅަ މުބާރާތުގައި ވިދާލި އިޓަލީގެ މިޑްފީލްޑަރު މަނުއެލް ލޮކަޓެއްލީ ޔުވެންޓަސްއަށް ބަދަލުވެއްޖެއެވެ.

ސަސުއޯލޯއަށް ކުޅެމުން އައި އުމުރުން 23 އަހަރުގެ ލޮކަޓެއްލީ ޔުވެންޓަސްއާ ގުޅުނީ ދެ އަހަރުގެ ލޯނު އެއްބަސްވުމެއްގެ ދަށުންނެވެ. އެކަމަކު މި އެއްބަސްްވުމުގެ ދަށުން ޔުވެންޓަސްއިން ބޭނުންނަމަ 2023 ވަނަ އަހަރު 37.5 މިލިޔަން ޔޫރޯ ޚަރަދުކުރުމަށްފަހު ތިން އަހަރަށް ލޮކަޓެއްލީގެ އެއްބަސްވުން ދާއިމީކުރެވޭނެ ކަމަށް ރިޕޯޓުތައް ބުނެއެވެ.

މި ފަހަރުގެ ޔޫރޯގެ ޗެމްޕިއަންކަން އިޓަލީން ހޯދިއިރު، ލޮކަޓެއްލީ އަކީ އެ ޓީމުގައި ހިމެނުނު މުހިންމު ކުޅުންތެރިއެކެވެ. އެގޮތުން ޔޫރޯގައި ކުޅުނު ފަސް މެޗުގައި ލޮކަޓެއްލީ ވަނީ ދެ ލަނޑު ޖަހާފައެވެ. އަދި ވަނީ އިންގްލެންޑާ ދެކޮޅަށް ކުޅުނު ފައިނަލް މެޗުގައިވެސް ކުޅެފައެވެ.

ޔުވެންޓަސްއިން ލޮކަޓެއްލީގެ ސޮއި ހޯދިއިރު، އޭނާ ހޯދުމަށް އިނގިރޭސި ޕްރިމިއާ ލީގުގެ ދެ ކުލަބު ކަމަށްވާ އާސެނަލާއި ލިވަޕޫލުން މަސައްކަތްކުރަމުން އައި ކަމަށް އިނގިރޭސި މީޑިއާތަކުން ވަނީ ރިޕޯޓުކޮށްފައެވެ.

ސަސުއޯލޯގެ ލޯނު އެއްބަސްވުމެއްގެ ދަށުން ލޮކަޓެއްލީ ޔުވެންޓަސްއާ ގުޅުނުއިރު، އޭނާ އެންމެ ފުރަތަމަ ސަސުއޯލޯއާ ގުޅުނީ 2018 ވަނަ އަހަރު އޭސީ މިލާނުގެ ލޯނު އެއްބަސްވުމެއްގެ ދަށުންނެވެ. އެކަމަކު އޭގެ އަނެއް ސީޒަނުގައި ސަސުއޯލޯއިން ވަނީ ލޮކަޓެއްލީގެ އެއްބަސްވުން އާކޮށްފައެވެ.

ކުލަބު ކެރިއަރުގައި ލޮކަޓެއްލީއަށް މިހާތަނަށް ހޯދުނު ހަމައެކަނި ކާމިޔާބީއަކީ މިލާނާއެކު 2016 ވަނަ އަހަރުގެ އިޓާލިއަން ސުޕަ ކަޕެވެ. އަދި މިލާނުގައި ހޭދަކުރި މުއްދަތުގައި އެ ޓީމަށް ލޮކަޓެއްލީ 63 މެޗު ކުޅެދީފައިވާއިރު، އޭނާ ވަނީ ސަސުއޯލޯގައި ހޭދަކުރި ތިން ސީޒަނުގައި އެ ޓީމަށް 68 މެޗު ކުޅެދީފައެވެ.