އަމިއްލަ އުޅަނދުގައި ކުނި އުކުމުގެ ފުރުސަތު ވެމްކޯއިން ނުދޭކަމުގެ ޝަކުވާއެއް ނުލިބޭ - އާދަމް
މައްސަލައެއް ދިމާވާނަމަ ޝަކުވާ ހުށަހެޅުއްވުމަށް އެދިވަޑައިގެންނެވި
ތިލަފުއްޓަށް ކުނި އުފުލުމަށް ވެމްކޯއިން ބޭނުންކުރާ ބާޖެއް
އަމިއްލަ އުޅަނދުގައި ކުނި އުކުމުގެ ފުރުސަތު ވެމްކޯއިން ނުދޭކަމުގެ ޝަކުވާއެއް އެ ކޯޕަރޭޝަނަށް ލިބިފައި ނުވާ ކަމަަށް ބުނެފިއެވެ.
އަމިއްލަ ކުންފުނިތަކުން ކުންފުނީގެ އުޅަނދުގައި ކުނި އުކާލަން ދިޔުމުން އެ ފުރުސަތު ވެމްކޯއިން ނުދޭކަމުގެ ޝަކުވާ ބައެއް ކުންފުނިތަކުން އަންނަނީ ކުރަމުންނެވެ. އަދި ކުނި އުކާލުމަށް ރަޖިސްޓްރީ ކުރުމަށް ފުރުސަތު ނުދޭ ކަަމަށް ބައެއް ކުންފުނިތަކުން ވަނީ ބުނެފައެވެ. މިކަމާ ގުލޭ ގޮތުން ރާއްޖެއެމްވީން ކުރި ސުވާލަކަށް ޖަވާބު ދެއްވަމުން ވެމްކޯގެ މެނޭޖިން ޑިރެކްޓަރ އާދަމް މުހައްމަދު ވިދާޅުވީ، އެފަދަ ޝަކުވާއެއް އެ ކޯޕަރޭޝަންގެ މެނޭޖްމެންޓަށް ލިބިފައި ނުވާ ކަމަށެވެ.
އާދަމް ވިދާޅުވީ، ހުރިހާ ވެހިކަލެއްވެސް ރަޖިސްޓްރީވާން ވަކި އުސޫލެއް އޮންނަ ކަމަށެވެ. ވެމްކޯއަށް ކުނި އުކާލަން އަންނަ އުޅަނދުތަކުން ރަޖިސްޓްރީ ގެންނަން މަޖުބޫރުވަނީވެސް ދިމާވެދާނެ މައްސަލަތަކަށް ބަލާފައި ކަމަށް އާދަމް ވިދާޅުވިއެެވެ. އިތުރަށް ތަފްސީލް ކޮށްދެއްވަމުން އާދަމް ވިދާޅުވީ، ރަޖިސްޓްރީ ގެންނަން ޖެހެނީ، އަތޮޅުތެރެއަށް ރަޖިސްޓަރީ ކޮށްފައި ހުންނަ ބައެއް އުޅަނދުތައްވެސް މާލޭގައި ދުވާތީ ކަމަށާއި، އަދި ބައެއް އުޅަނދުގެ ރަޖިސްޓްރީގައި، 10 ޓަން އިނދެފައި، ލޮރީ ބޭރުގައި 7 ޓަނު ޖަހާފައިވެސް ހުންނަ ކަމަށެވެ. ހަމައެއާއެކު 25 ޓަނުގެ ލޮރީ 3 ޓަނަށް ރެޖިސްޓަރީ ކުރެވިފައި ހުރިކަން ފާހަގަކުރެވިފައިވާ ކަމަށާއި އެގޮތަށް އެކަން އޮތުމުން ވެމްކޯއަށް ގެއްލުންވާކަން ފާހަގަކުރެއްވިއެވެ. އަދި ދައުލަތުގެ ކޯޕަރޭޝަނެއްގެ ގޮތުގައި މަސައްކަތްކުރާއިރު ބަލަން ޖެހޭ ބެލުންތައް ހުންނަ ކަމަށް ވިދާޅުވިއެވެ.
ވެމްކޯގައި ރަޖިސްޓްރީ ނުކޮށް ކުނި ވައްދަންޏާ ގެއްލުންވާކަން ފާހަގަކުރައްވަމުން އާދަމް ވިދާޅުވީ، އެހެންނަމަވެސް މިހާތަނަށް ކުންޏާއެކު އަންނަ އުޅަނދެއް ފޮނުވާލާފައި ނުވާނެ ކަމަށެވެ. ކުންޏާއެކު އަންނަ ވެހިކަލްތަކުގެ ތެރެއިން އީޕީއޭއިން ވެހިކަލެއްގެ މައްސަލައެއް ހުރި ކަމަށް ބުނެފައިވާނަމަ އެ ވެހިކަލަކަށް ފިޔަވަޅުއަޅާފައިވާނެ ކަމަށް ވިދާޅުވިއެވެ.
ބައެއް ފަހަރަށް އޮޑް ސައިޒްގެ އެއްޗެއް ރަޖިސްޓްރީ ކުރަން ހުށަހަޅައިގެން ބައެއް މުވައްޒަފުންނަށް އޮޅުމެއް އަރާފާނެ ކަމަށާޢި އެހެންނަމަވެސް އެކަންވެސް ހައްލު ކުރައްވާފައިވާނެ ކަމަށް ވިދާޅުވިއެވެ.
ސްޓޭންޑަރޑް ސައިޒްތަކެއް ހުންނަ ކަމަށާއި، ދޭތެރެ މެދަށް އަންނަ ސައިޒެއްގެ ވެހިކަލެއްނަމަ އޮޅިގެން ރަޖިސްޓްރީ ނުވާނެ ކަމަށް ބުނެފައި ހުރެދާނެކަމަށް އާދަމް ވިދާޅުވިއެވެެ. އެފަދަ މައްސަލައެއް ދިމާވާނަމަ ޝަކުވާ ހުށަހެޅުއްވުމަށްވެސް އާދަމް އެދިވަޑައިގެންނެވިއެވެ.
