މިވަގުތަށް ކޮވިޑަށް ބޫސްޓަރ ޝޮޓެއް ބޭނުމެއް ނުވޭ: ޑަބްލިޔުއެޗްއޯ
މިހާރު ފެންނަން ހުރި ޑާޓާތަކަށް ބަލާއިރު ބޫސްޓަރ ޝޮޓެއް ބޭނުމެއް ނުވޭ
ފައިޒަރ ވެކްސިން ޖަހަނީ
މިހާތަނަށް ފެންނަން ހުރި ޑާޓާތަކަށް ބަލާއިރު ކޮވިޑް-19ށް ބޫސްޓަރ ޝޮޓެއް ބޭނުމެއް ނުވާކަމަށް ދުނިޔޭގެ ސިއްހަތު ޖަމުޢިއްޔާ (ޑަބްލިޔުއެޗްއޯ)ން ބުނެފިއެވެ.
އެ ޖަމުޢިއްޔާއިން ބުދަ ދުވަހު ބޭއްވި ބައްދަލުވުމެއްގައި މިކަން ހާމަކޮށްފައި މިވަނީ އެމެރިކާއިން ބޫސްޓަރ ޝޮޓް ސެޕްޓެމްބަރ މަހު ޖަހަން ފަށާނެކަން ހާމަކުރި ފަހުންނެވެ. އެމެރިކާއިން އަންނަނީ ޑެލްޓާ ވޭރިއަންޓް ފެތުރެމުން އަންނާތީ އެގައުމުގައި ސެޕްޓެމްބަރ މަހުގެ 20 ވަނަ ދުވަހުން ފެށިގެން ބޫސްޓަރ ޝޮޓް ޖެހުމުގެ ކަންކަން ކުރިޔަށްގެންދާނެކަން ހާމަކޮށްފައެވެ.
ބޫސްޓަރ ޝޮޓާ ގުޅޭގޮތުން ވާހަކަދައްކަވަމުން ޑަބްލިޔުއެޗްއޯގެ ޗީފް ސައިންޓިސްޓް ސޯމިޔާ ސްވަމިންތަން ވިދާޅުވީ މިހާރު ފެންނަން ހުރި ޑާޓާތަކަށް ބަލާއިރު ބޫސްޓަރ ޝޮޓެއް ބޭނުމެއް ނުވާނެ ކަމަށެވެ. އެކަމަށް އިތުރު ދިރާސާތައް ބޭނުންވާކަމަށް ވެސް ސޯމިޔާ ވިދާޅުވިއެވެ.
ޑަބްލިޔުއެޗްއޯގެ ސީނިއަރ އެޑްވައިޒަރ ބްރޫސް އެލީވަރޑް ވިދާޅުވީ ދުނިޔޭގައި ދިރިއުޅެމުންދާ މީހުންނަށް ބޭނުންވާވަރަށް މިހާރު ވެކްސިން އެބަހުރި ކަމަށެވެ. ނަމަވެސް ވެކްސިން ލިބެމުންދަނީ އެންމެ ބޭނުންވާ މީހުންނަށް ނޫންކަމަށާއި ވެކްސިން ލިބެންޖެހޭ މީހުންގެ ތަރުތީބުން ނޫންކަމަށް ވަނީ ވިދާޅުވެފައެވެ. ގިނައިން އާމްދަނީ ލިބޭ ގައުމުތަކުން ބޫސްޓަރ ޝޮޓް ޖެހުމަށް ތައްޔާރުވަމުން އަންނައިރު ވެކްސިން ލިބެންޖެހޭ އާބާދީތަކަށް އެކަށީގެންވާ މިންވަރަށް ވެކްސިން ނުލިބުމުގެ ދަތިކަން ވަނީ އިހުސާސްކުރަން ޖެހިފައެވެ.
ބްރޫސް ވިދާޅުވީ ބޫސްޓާރ ޝޮޓް ޖެހުމުގެ ކުރިން ވެކްސިން ޖަހަންޖެހޭ މީހުންނަށް ދެ ޑޯޒް ޖަހަންޖެހޭ ކަމަށެވެ. އެހެންނަމަވެސް އެކަންވާން އަދިވެސް ވަރަށް ގިނަ ވަގުތުނަގާނެކަމަށް ވަނީ ވިދާޅުވެފައެވެ.
