ކޮޅުމަޑުލު ވޭމަންޑޫ ކައުންސިލުން އެދިލެއްވި ކަންކަމުގެ ތެރެއިން އަންނަ އަހަރަށް ބަޖެޓްކޮށްގެން ބައެއް މަޝްރޫޢުތައް ކުރިޔަށްގެންދަވާނެކަމަށް ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.

ރައީސް މިހެން ވިދާޅުވީ ކޮޅުމަޑުލުގެ ބައެއް ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން ވޭމަންޑޫއަށް ވަޑައިގެން އެރަށު ކައުންސިލް މެންބަރުންނާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ މެންބަރުންނާ ވާހަކަފުޅުދައްކަވަމުންނެވެ.

ވޭމަންޑޫ ކައުންސިލުން ވަނީ އެރަށުގެ ރައްޔިތުންނަށް އެންމެ މުހިންމު ކަންކަމާ ގުޅޭގޮތުން މަޝްވަރާކުރައްވައި، އެ ރަށުގެ ރައްޔިތުންގެ ކަންބޮޑުވުންތައް ރައީސުލްޖުމްހޫރިއްޔާއާ ހިއްސާކުރައްވާފައެވެ. އެގޮތުން، އެބޭފުޅުން ފާހަގަކުރެއްވި ކަންތައްތަކުގެ ތެރޭގައި މަގުތައް ޒަމާނީ ފެންވަރަކަށް ހެދުމަށާއި، ގިރާ ސަރަޙައްދު ހިމާޔަތްކުރުމާއި، ކުނި މެނޭޖްކުރުމާއި، ހޮސްޕިޓަލްގެ ޚިދުމަތްތަކުގެ ފެންވަރު މަތިކުރުމާއި، ބިން ހިއްކުމާއި، ބައެއް އިދާރާތަކުގެ ޖާގައިގެ ދަތިކަމާއި، އައިސް ޕްލާންޓް ޤާއިމުކުރުމާއި، މަގު ބައްތި ޖެހުންފަދަ ކަންކަން ހިމެނެއެވެ.

އަންހެނުންގެ ތަރައްޤީއަށް މަސައްކަތްކުރާ ކޮމިޓީއިން ވަނީ އެ ކޮމިޓީގެ މަސައްކަތްތައް ކުރިޔަށް ގެންދާ ގޮތްތަކާއި ރަށުގެ ތަރައްޤީއަށާއި އަންހެނުން ބާރުވެރި ކުރުމަށް ބޭނުންވާ ކަންކަމާ ގުޅޭ މަޢުލޫމާތު ރައީސުލްޖުމްހޫރިއްޔާއާ ހިއްސާކުރައްވާފައެވެ. މިގޮތުން އެބޭފުޅުން ވަނީ ވޭމަންޑޫގައި ހިންގާ ޕްރީސްކޫލްގެ ވަޞީލަތްތައް މަދުކަމާއި، އިޖްތިމާޢީ ކަންކަން ކުރިއެރުވުމަށް ބޭނުންވާ ޕާކާއި، އައުޓްޑޯ ޖިމް ފަދަ ވަޞީލަތްތައް ބޭނުންވާކަން ފާހަގަކުރައްވާފައެވެ. މީގެ އިތުރުން ވެސް ވޭމަންޑޫ ޒުވާނުންގެ ގުޅުމުގެ ފަރާތުން އެރަށު ޒުވާނުންގެ ކަންބޮޑުވުންތައް ވަނީ ރައީސުލްޖުމްހޫރިއްޔާއާ ހިއްސާކުރައްވާފައެވެ. އެބޭފުޅުން ފާހަގަކުރެއްވީ އެރަށުގައި ކުޅިވަރު ވަޞީލަތްތައް ފުރިހަމަޔަކަށް ނެތް މައްސަލައެވެ. އަދި، ސްކޫލް ނިންމާ ކުދިންނަށް ވޮކޭޝަނަލް ޓްރެއިނިންގ ދޭނެ ތަނެއް ޤާއިމުކޮށްދިނުމަށް ވެސް ވަނީ ރައީސުލްޖުމްހޫރިއްޔާގެ އަރިހުގައި ދަންނަވާފައެވެ.

މި ބައްދަލުކުރެއްވުމުގައި ރައީސުލްޖުމްހޫރިއްޔާ ވަނީ ކައުންސިލުން ފާހަގަކުރެއްވި ކަންކަމުގެ އެންމެ ފަހުގެ މަޢުލޫމާތު ހިއްސާކުރައްވާފައެވެ. މިގޮތުން އަންނަ އަހަރަށް ބަޖެޓްކޮށްގެން ކައުންސިލުން އެދިލެއްވި ބައެއް މަޝްރޫޢުތައް ކުރިޔަށްގެންދަވާނެކަމަށާއި، ކައުންސިލްތަކަށް ޤާނޫނުން ލިބިފައިވާ ބާރުތަކުގެ ބޭނުން ހިފައިގެން ކުރިޔަށްދިޔުމަށް އެމަނިކުފާނު ވިދާޅުވިއެވެ. އަދި، އެބޭފުޅުން ފާހަގަކުރެއްވި ކަންކަމުގައި ކަމާގުޅޭ ފަރާތްތަކާ އެކު މަޝްވަރާކޮށްގެން އެ މައްސަލަތަކަށް ހައްލު ހޯއްދަވައިދެއްވުމަށް މަސައްކަތްކުރައްވާނެކަމަށް އެމަނިކުފާނު ވަނީ ވިދާޅުވެފައެވެ.

ރައީސުލްޖުމްހޫރިއްޔާ މިހާރު ވޭމަންޑޫއަށް ކުރައްވަމުން މިގެންދަވާ ދަތުރުފުޅަކީ ތ. އަތޮޅުގެ 7 ރަށަކަށް ކުރައްވާ ދަތުރުފުޅުގެ ހަތަރުވަނަ މަންޒިލެވެ. ރައީސުލްޖުމްހޫރިއްޔާގެ އަރިހުގައި ބައެއް ވުޒާރާތަކުގެ ވަޒީރުންނާއި، ރައީސުލްޖުމްހޫރިއްޔާގެ އޮފީހާއި، ދަޢުލަތުގެ ބައެއް އިދާރާތަކުގެ އިސްވެރިންގެ ވަފްދެއް މިދަތުރުފުޅުގައި ބައިވެރިވެވަޑައިގަންނަވައެވެ