ދެ ސްކޫލެއްގެ އައު އިމާރާތުގެ ނުނިމި ހުރި މަސައްކަތް ދެ ކުންފުންޏަކާ ހަވާލުކޮށްފި
އެ މިނިސްޓްރީން ހަވާލުކޮށްފައިވަނީ މާވަށު ސްކޫލާއި ވޭމަންޑޫ ސްކޫލުގެ އައު އިމާރާތުގެ ނުނިމި ހުރި މަސައްކަތް
މާވަށު ސްކޫލުގެ އެއްބަސްވުމުގައި ސޮއިކުރުމުގެ ތެރެއިން
ތ. ވޭމަންޑުއާއި ލ. މާވަށު ސްކޫލުގެ އައު އިމާރާތުގެ ނުނިމި ހުރި މަސައްކަތްތައް ނިންމަން ދެ ކުންފުންޏަކާ ހަވާލުކޮށްފިއެވެ.
މިނިސްޓްރީ އޮފް އެޑިއުކޭޝަނުން ބުރާސްފަތި ދުވަހު ވޭމަންޑޫ ސްކޫލް އިމާރާތުގެ ތިން ކްލާސްރޫމުގެ ނުނިމިހުރި މަސައްކަތް ހަވާލު ކުރީ ޓިކް ޓެކް އިންވެސްޓްމަންޓާއެވެ. އަދި މާވަށު ސްކޫލް އިމާރާތުގެ ނުވަ ކްލާސްރޫމުގެ ނުނިމި ހުރި މަސައްކަތް ނިންމަން ހަވަލު ކުރީ އިވޯސަން މޯލްޑިވްސް ޕްރައިވެޓް ލިމިޓެޑާއެވެ.
ބުރާސްފަތި ދުވަހު އެޑިއުކޭޝަން މިނިސްޓްރީގައި ބޭއްވި ރަސްމިއްޔާތެއްގައި މި އެއްބަސްވުންތަކުގައި އެ މިނިސްޓްރީގެ ފަރާތުން ސޮއި ކުރެއްވީ ސީނިއަރ ޕޮލިސީ ޑިރެކްޓަރު ނައުޝާދު އިބްރާހީމެވެ. އަދި ޓިކް ޓެކް އިންވެސްޓްމެންޓްގެ ފަރާތުން އެ ކުންފުނީގެ ޗީފް ފައިނޭންޝިއަލް އޮފިސަރު އިސްމާއީލް ޒަހުރާން ޒުބައިރު ސޮއިކުރެއްވިއިރު އިވޯސަން މޯލްޑިވްސް ޕްރައިވެޓް ލިމިޓެޑްގެ ފަރާތުން ސޮއި ކުރެއްވީ އެ ކުންފުނީގެ ޖެނެރަލް މެނޭޖަރު ހުސައިން ވަހީދެވެ.
ސަރުކާރުން ވޭމަންޑޫ ސްކޫލުގެ މަސައްކަތް ޓިކް ޓެކް އިންވެސްޓްމަންޓާ ހަވާލުކޮށްފައިވަނީ 365 ދުވަހުގެ ތެރޭގައި ނިންމާގޮތަށް 13,398,965.35 (ތޭރަ މިލިއަން ތިންލައްކަ ނުވަދިހަ އަށްހާސް ނުވަސަތޭކަ ފަސްދޮޅަސް ފަސް ރުފިޔާ ތިރީސް ފަސް ލާރި) އަށެވެ. މާވަށު ސްކޫލުގެ މަސައްކަތް ހަވާލުކޮށްފައިވަނީ 365 ދުވަސް ތެރޭގައި ނިންމާގޮތަށް، 8,816,041.04 (އަށް މިލިއަން އަށްލައްކަ ސޯޅަ ހާސް ސާޅިސް އެއް ރުފިޔާ ހަތަރު ލާރި) އަށެވެ.
