ފަޅުރަށްތަކުގެ ދަފްތަރެއް އެކުލަވާލެއްވުމުގެ ވިސްނުންފުޅު ގެންގުޅުއްވާކަމަށް ރައީސް ވިދާޅުވެއްޖެ
އަތޮޅުގެ ތަރައްޤީއަށް ކުރިޔަށްގެންދަވާ މަޝްރޫޢުތަކުގެ އެންމެ ފަހުގެ މަޢުލޫމާތު ހިއްސާކުރައްވާފައި
ރައީސް ޞާލިހު ތ. އަތޮޅު ކައުންސިލް މެންބަރުންނާ ބައްދަލުކުރެއްވުން
މިހާރު ސަރުކާރުން ކުރަން ވިސްނާފައިވާ މަސައްކަތަކީ ފަޅުރަށްތަކުގެ ފުރިހަމަ ދަފްތަރެއް އެކުލަވާލުންކަމުގައި ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ރައީސް މިހެން ވިދާޅުވީ ކޮޅުމަޑުލުގެ ބައެއް ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން ވޭމަންޑޫއަށް ވަޑައިގެން އަތޮޅު ކައުންސިލާ ބައްދަލުކުރައްވައި ދެއްކެވި ވާހަކަފުޅުގައެވެ. ރައީސް ވިދާޅުވީ ތ. އަތޮޅުގައި ފަތުރުވެރިކަން ތަރައްޤީކުރުމަށާއި، މަސްވެރިކަން ތަރައްޤީކުރުމަށް ސަރުކާރުން ވިސްނުން ގެންގުޅުއްވާކަމުގައެވެ. އަދި، ފަޅު ރަށްތަކުގެ މައްސަލައިގައި އެމަނިކުފާނު ވިދާޅުވީ މިހާރު ސަރުކާރުން ކުރަން ވިސްނާފައިވާ މަސައްކަތަކީ ފަޅުރަށްތަކުގެ ފުރިހަމަ ދަފްތަރެއް އެކުލަވާލުންކަމުގައެވެ.
ކައުންސިލްގެ އިދާރާގައި ބޭއްވެވި ބައްދަލުކުރެއްވުމުގައި، ލާމަރުކަޒީ ޤާނޫނަށް ގެނައި ބަދަލުތަކާއެކު ވެސް ރާއްޖޭގެ ތަރައްޤީގެ ކަންކަން ވަރަށް ގާތުން ބައްލަވަމުން ގެންދަވާތީ އެކަމަށްޓަކައި ރައީސުލްޖުމްހޫރިއްޔާއަށް ކޮޅުމަޑުލު އަތޮޅު ކައުންސިލުގެ ފަރާތުން ވަނީ ޝުކުރުއަދާކުރައްވާފައެވެެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާ ވަނީ އެމަނިކުފާނު ތ. އަތޮޅުގެ 7 ރަށަކަށް މިހާރު ކުރައްވަމުން ގެންދަވާ ދަތުރުފުޅަކީ ކައުންސިލްތަކުން ރަށްތައް ތަރައްޤީކުރުމުގައި ސަރުކާރުގެ ފަރާތުން ބޭނުންވާ ކަންކަމަކީ ކޮބައިތޯ ބަލައި އެކަންކަމުގައި އެހީތެރިކަން ފޯރުކޮށްދިނުމަށްކަމުގައި ވިދާޅުވެފައެވެ.
ތ. އަތޮޅު ކައުންސިލުން ވަނީ އަތޮޅުގެ ތަރައްޤީއަށް ބޭނުންވާ ކަންކަމާއި އަތޮޅުގެ ރައްޔިތުންނަށް އެންމެ މުހިންމު ކަންކަމާ ގުޅޭގޮތުން މަޝްވަރާކުރައްވައި، އަތޮޅުގެ ރައްޔިތުންގެ ކަންބޮޑުވުންތައް ރައީސުލްޖުމްހޫރިއްޔާއާ ހިއްސާކުރައްވާފައެވެ. އެގޮތުން، އެބޭފުޅުން ފާހަގަކުރެއްވި ކަންތައްތަކުގެ ތެރޭގައި ތ. އަތޮޅުގައި އިޤްތިޞާދީ ހަރާކާތްތައް ފަތުރުވެރިކަމުގެ ދާއިރާއިންނާއި ސިނާޢީ އެކިއެކި މަސައްކަތްތައް ސަރުކާރު މެދުވެރިކޮށް އިތުރުކުރެވޭނެ މަގު ފަހިކޮށްދެއްވުމަށް ވަނީ ދަންނަވާފައެވެ. އަދި، އަތޮޅުގައި ހިމެނޭ ފަޅު ރަށްތަކުގެ ބެލެނިވެރި ފަރާތެއް ކަނޑައަޅުއްވައިދެއްވުމަށާއި، އަތޮޅުގެ ރައްޔިތުންނަށް ޚާއްޞަކޮށްގެން ބޭންކިންގ ނިޒާމެއް ޤާއިމުކުރުމަށް ތ. އަތޮޅުން ޝައުޤުވެރިވާކަން އަތޮޅު ކައުންސިލްގެ ރައީސް ވަނީ ހާމަކުރައްވާފައެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާ ވަނީ އަތޮޅުގެ ތަރައްޤީއަށް ކުރިޔަށްގެންދަވާ މަޝްރޫޢުތަކުގެ އެންމެ ފަހުގެ މަޢުލޫމާތު ހިއްސާކުރައްވާފައެވެ. އަދި، އަތޮޅު ކައުންސިލުން ފާހަގަކުރެއްވި ކަންކަމުގައި ކަމާގުޅޭ ފަރާތްތަކާއެކު މަޝްވަރާކުރައްވައިގެން މައްސަލަތަކަށް ހައްލު ހޯއްދަވައިދެއްވުމަށް މަސައްކަތްކުރައްވާނެކަމަށް އެމަނިކުފާނު ވަނީ ވިދާޅުވެފައެވެ.
މި ބައްދަލުކުރެއްވުމަށްފަހު ރައީސުލްޖުމްހޫރިއްޔާ ވަނީ ތ. އަތޮޅު ހޮސްޕިޓަލަށާއި، ވޭމަންޑޫ ޕޮލިސް ސްޓޭޝަނަށް ޒިޔާރަތްކުރައްވައި އެތަންތަނުގެ ހާލަތު ބައްލަވާލައްވާފައެވެ.
ރައީސުލްޖުމްހޫރިއްޔާ މިހާރު ވޭމަންޑޫއަށް ކުރައްވަމުން މިގެންދަވާ ދަތުރުފުޅަކީ ތ. އަތޮޅުގެ 7 ރަށަކަށް ކުރައްވާ ދަތުރުފުޅުގެ ހަތަރުވަނަ މަންޒިލެވެ. ރައީސުލްޖުމްހޫރިއްޔާގެ އަރިހުގައި ބައެއް ވުޒާރާތަކުގެ ވަޒީރުންނާއި، ރައީސުލްޖުމްހޫރިއްޔާގެ އޮފީހާއި، ދަޢުލަތުގެ ބައެއް އިދާރާތަކުގެ އިސްވެރިންގެ ވަފްދެއް މިދަތުރުފުޅުގައި ބައިވެރިވެވަޑައިގަންނަވައެވެ.
