މޭޔަރު މުއިއްޒުއަށް ސަރުކާރުގެ މުއައްސަސާތައް ކަމަކު ނުދިޔަ!
ގިނަ މުއައްސަސާތަކުން ޖެއްސުން ކުރާކަމަށް ތުހުތަމު ކުރެއްވި
މާލޭ ސިޓީ ކައުންސިލްގެ މޭޔަރު ޑރ. މުހައްމަދު މުއިއްޒު
މާލޭ ސިޓީ ކައުންސިލްގެ މޭޔަރު ޑރ. މުހައްމަދު މުއިއްޒުއަށް ސަރުކާރުގެ މުއައްސަސާތައް ކަމުނުދާކަން ހާމަވެއްޖެއެވެ.
މަގާމަށް ހޮވިވަޑައިގަތުމަށްފަހު މުއިއްޒު ގެންދަވަނީ މާލޭ ސިޓީގެ ރައްޔިތުންނަށް ބޭނުންވާ ކަންތައްތައް ކޮށްދެއްވުމަށް މަސައްކަތްތައް ކުރައްވަމުންނެވެ. މި މަސައްކަތްތައް ކޮށްދެއްވުމަށްޓަކައި ރައްޔިތުންނާ ބައްދަލުކުރައްވައި ރައްޔިތުންގެ ޚިޔާލުތައް ވެސް ގެންދަވަނީ ހޯއްދަވަމުންނެވެ. އަދި އެ ޚިޔާލުތައް ހޯއްދެވުމަށްފަހު ސަރުކާރުގެ އެކި މުއައްސަސާތަކާއެކު މަޝްވަރާ ބައްދަލުވުންތައް ގެންދަވަނީ ބާއްވަމުންނެވެ. އެހެންނަމަވެސް މިފަދަ ބައްދަލުވުންތައް ބޭއްވުމަށްފަހު، މުއިއްޒުގެ ވާހަކައިން ހާމަވެގެންދާ އެއްކަމެއް އެބައޮތެވެ. އެއީ ސަރުކާރުގެ މުއައްސަސާތައް އެމަނިކުފާނަށް ކަމުނުދާ ކަމެކެވެ.
ދާދިފަހުން އެމަނިކުފާނު ވަނީ ގިނަ މުއައްސަސާތަކުން ޖެއްސުން ކުރާކަމަށް ތުހުތަމުކޮށް އެގޮތަށް އެކަން ނުކުރުމަށް އިލްތިމާސްކޮށްފައެވެ. ގިނަ މުއްސަސާތަކާއެކު މަސައްކަތް ކުރެއްވުމަކީ ވަރަށް ބޮޑު ގޮންޖެހުމަކަށް ވެފައިވާ ކަމަށް މުއިއްޒު ގެންދަވަނީ ތަކުރާރުކޮށް ވިދާޅުވަމުންނެވެ. ސަރުކާރުގެ ގިނަ މުއައްސަސާތަކާ މިހާރު ވަނީ މައްސަލަ ޖެހިފައެވެ. އެގޮތުން ގުޅީފަޅުގެ ބިމުގެ މައްސަލާގައި ޕްލޭނިންގ މިނިސްޓްރީއާ ދެބަސް ވެފައިވާއިރު، ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އަށް ދޫކޮށްފައިވާ ބިމެއް މާލެ ސިޓީ ކައުންސިލުން ހުސްކުރި މައްސަލާގައި ވެސް ސްޓެލްކޯ އިން ވަނީ ހިތްހަމަނުޖެހުން ފާޅުކޮށްފައެވެ. އަދި އެތަނުގައި ހުރި ބައެއް ސާމާނުތައް ގެއްލިފައިވާއިރު ފެންސުތައް ނަގައިގެން ގެންދިޔަކަމުގެ ތުހުމަތު ވެސް ސިޓީ ކައުންސިލްގެ މައްޗަށް ކުރެވި، އެ މައްސަލަ މިހާރު ވަނީ ފުލުހުންނަށް ހުށަހަޅާފައެވެ.
މީގެ އިތުރުން ވޭސްޓް މެނޭޖްމަންޓް ކޯޕަރޭޝަން (ވެމްކޯ) އާއެކު ބޭއްވި ބައްދަލުވުމަށްފަހު ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ) އިން ގޭގެއަށް އަރާ ކުނި ނަގާނެ ކަމަށް ވިދާޅުވެ މުއިއްޒު ވަނީ ވާހަކަދައްކަވާފައެވެ. މާލޭގެ ކުނީގެ މައްސަލަ ހައްލުކުރުމަށް ގޭބިސީތަކުން ކުނި ނެގުމަށާއި، މާލޭގެ އާންމު ތަންތަނުން ކުނި ނެގުމަށް ކުރަމުންދާ މަސައްކަތް މާލޭގެ މޭޔަރު ޑރ. މުހައްމަދު މުއިއްޒަށް އޮޅިވަޑައިގެންފައިވާ ކަމަށާއި، ގޭބީސީތަކުން ކުނި ނެގުމުގެ އިންތިޒާމަށް ބަދަލެއް ގެންނަން މަޝްވަރާ ނުކުރެވޭ ކަމަށް މެނޭޖިން ޑިރެކްޓަރު އާދަމް މުހައްމަދު ވަނީ ވިދާޅުވެފައެވެ.
މާލޭ ސިޓީގެ މަގުތައް ޒަމާނީ ފެންވަރަށް ތަރައްޤީކުރުުމުގެ މަޝްރޫޢުގެ ދަށުން ހެންވޭރު އުތުރު ސެގްމަންޓްގެ އަމަލީ މަސައްކަތް ފެށުމަށް އަންގާރަ ދުވަހު ރޯޑް ޑިވެލޮޕްމަންޓް ކޯޕަރޭޝަނާ ގުޅިގެން ބޭއްވި ހަފްލާގައި ވެސް މުއިއްޒު ވަނީ ބަހުގެ ހޫނު ހަމަލާތަކެއް ރައްދުކުރައްވާފައެވެ. އެގޮތުން މުއިއްޒު ވިދާޅުވީ ސަރުކާރުން އެކި ކުންފުނިތައް މެދުވެރިކޮށް "ޖެއްސުން ކުރުމަށް" މަސައްކަތް ކުރާ ކަމަށެވެ. އަދި ހަފްލާ އިން ވެސް އެކަން ފެނިގެންދާނެ ކަމަށެވެ. ސިޓީ ކައުންސިލްގެ އެއްވެސް ލޯގޯއެއް ހަފްލާގައި ނެތްކަން ފާހަގަކުރައްވައި މުއިއްޒު ވިދާޅުވީ، ހަފްލާގައި ވާހަކަދެއްކުމުގެ ފުރުސަތަކަށް އެދިވަޑައިގެން އާދޭސް ދަންނަވަން ޖެހިވަޑައިގަތް ކަމަށެވެ.
މުއިއްޒުގެ މި ވާހަކަތަކަށް ރައްދުދެއްވައި އާރްޑީސީގެ މެނޭޖިންގ ޑިރެކްޓަރ މޫސާ ޢަލިމަނިކު (މޫކޭ) ވިދާޅުވީ އާރްޑީސީން އެގޮތަށް މަސައްކަތް ނުކުރާ ކަމަށެވެ. އަދި ސިޓީ ކައުންސިލާއެކު އެއްބާރުލުން ދީގެން މަސައްކަތް ކުރިއަށް ގެންދެވުމަށް ތައްޔާރަށް ހުންނެވި ކަމަށެވެ. އާރްޑީސީގެ އަމާޒަކީ ސިޓީ ކައުންސިލަށް ޖެއްސުން ކުރުން ނޫންކަން ފާހަގަކުރައްވައި މޫކޭ ވިދާޅުވީ ކުންފުނީގެ ބޭނުމަކީ ރައްޔިތުންނަށް އަވަސް، ފަސޭހަ ޚިދުމަތެއް ފޯރުކޮށްދިނުން ކަމުގައެވެ.
މޫކޭ މިހެން ވިދާޅުވެފައިވާއިރު ޑރ. މުހައްމަދު މުއިއްޒު ގެންދަވަނީ ވަރަށް ފާޅުކަން ބޮޑު ގޮތެއްގައި ސަރުކާރުގެ މުއައްސަސާތައް ބަދުނާމުވާ ގޮތަށް ވާހަކަ ދައްކަވަމުންނެވެ.
