ކޮވިޑާ ގުޅިގެން ސިއްހީ ކަންކަމަށް ކުރެވުނު ޚަރަދު 2 ބިލިއަނަށް
ސިއްހީ އަދި އިޖުތިމާއީ އެކި ކަންކަމަށް ސަރުކާރުން ވަނީ 2,049.6 މިލިއަން ރުފިޔާ ޚަރަދުކޮށްފައި
ގަމު ކޮވިޑް މެނޭޖްމެންޓް ފެސިލިޓީ
ކޮވިޑް-19 އާ ގުޅިގެން ސިއްހީ ކަންކަމަށް ސަރުކާރުން ކުރި ޚަރަދު ދެ ބިލިއަނަށް ވުރެ މައްޗަށް އަރާފައިވާ ކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައިފިއެވެ.
ފިނޭންސް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާގޮތުން އޮގަސްޓް 12 ވަނަ ދުވަހުގެ ނިޔަލަށް ސިއްހީ އަދި އިޖުތިމާއީ އެކި ކަންކަމަށް ސަރުކާރުން ވަނީ 2,049.6 މިލިއަން ރުފިޔާ ޚަރަދުކޮށްފައެވެ. އަދި މި މުއްދަތުގައި އިކޮނޮމިކް ރެސްޕޮންސްގެ ގޮތުގައި 1,772.8 މިލިއަން ރުފިޔާ ޚަރަދުކޮށް، ކޮވިޑާ ގުޅިގެން ސަރުކާރުން ކުރި ޖުމްލަ ޚަރަދު ވަނީ 3,822.4 މިލިއަން ރުފިޔާއަށް އަރާފައެވެ.
ފިނޭންސް މިނިސްޓްރީން ހާމަކޮށްފައިވާ މައުލޫމާތުތައް ދައްކާގޮތުން މިހާތަނަށް އެންމެ ބޮޑު ޚަރަދެއް ކޮށްފައި ވަނީ ނެޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) މެދުވެރިކޮށެވެ. އެއީ 868.9 މިލިއަން ރުފިޔާއެވެ. ހެލްތު މިނިސްޓްރީން 868.9 މިލިއަން ރުފިޔާ ޚަރަދުކޮށްފައިވާއިރު، ޓޫރިޒަމް މިނިސްޓްރީން ޚަރަދުކޮށްފައި ވަނީ 29.2 މިލިއަން ރުފިޔާއެވެ. އަދި ފޮރިން މިނިސްޓްރީން 6.8 މިލިއަން ރުފިޔާ، ޖެންޑަރ މިނިސްޓްރީން 4.5 މިލިއަން ރުފިޔާ، އަދި ހަޔަރ އެޑިއުކޭޝަން މިނިސްޓްރީން 3.3 މިލިއަން ރުފިޔާ ވަނީ ޚަރަދުކޮށްފައެވެ. ޕްލޭނިން މިނިސްޓްރީން މި މުއްދަތުގެ ތެރޭގައި 40.8 މިލިއަން ރުފިޔާ ވަނީ ޚަރަދުކޮށްފައެވެ.
އޭގެ އިތުރުން އެމްއެންޑީއެފްއިން 67.6 މިލިއަން ރުފިޔާ ޚަރަދުކޮށްފައިވާއިރު، ފުލުހުންގެ އިދާރާއިން ޚަރަދުކޮށްފައި ވަނީ 31.6 މިލިއަން ރުފިޔާއެވެ. އިމިގްރޭޝަން މެދުވެރިކޮށް ނުވަ ލައްކަ ރުފިޔާ ޚަރަދުކޮށްފައިވާ ކަމަށާއި ނެޝަނަލް ޑްރަގް އެޖެންސީން 1.4 މިލިއަން ރުފިޔާ އަދި ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން 43.6 މިލިއަން ރުފިޔާ ޚަރަދުކޮށްފައިވާ ކަމަށް ވެސް ފިނޭންސްއިން ބުނެއެވެ. އަދި ހުޅުމާލެ ހޮސްޕިޓަލުން 2.9 މިލިއަން ރުފިޔާ ވަނީ ޚަރަދުކޮށްފައެވެ.
އޭގެ އިތުރުން އައިޖީއެމްއެޗް މެދުވެރިކޮށް ކޮވިޑް-19 އާ ގުޅިގެން 191.8 މިލިއަން ރުފިޔާ ޚަރަދުކޮށްފައިވާއިރު، ޑިޒާސްޓަރ މެނޭޖްމެންޓް ފަންޑުން މިހާތަނަށް 84.1 މިލިއަން ރުފިޔާ ޚަރަދުކޮށްފައިވެއެވެ. އަދި ޓޫރިޒަމް އެކްޓިވިޓީސް އިމްޕްލިމެންޓޭޝަން ފަންޑުން ޚަރަދުކޮށްފައި ވަނީ 29.2 މިލިއަން ރުފިޔާއެވެ.
ކޮވިޑް-19 އާ ގުޅިގެން ފޯރުކޮށްދޭން ޖެހޭ ޚިދުމަތްތައް ފޯރުކޮށްދިނުމަށް ބޭނުންވާ ސާމާނަށް 1 ބިލިއަނަށް ވުރެ ގިނަ ރުފިޔާ ސަރުކާރުން ޚަރަދުކޮށްފައިވާ އިރު، ކެޕިޓަލް އިކުއިޕްމެންޓަށް 201.8 މިލިއަން ރުފިޔާ ވަނީ ޚަރަދުކޮށްފައެވެ. އަދި އޮޕަރޭޝަނަލް ސަރވިސަސްއަށް 202.5 މިލިއަން ރުފިޔާ ވަނީ ޚަރަދުކޮށްފައެވެ. އޭގެ އިތުރުން މުވައްޒަފުންނަށް އެލަވަންސް ދިނުމަށް 170.1 މިލިއަން ރުފިޔާ ޚަރަދުކޮށްފައިވާ އިރު، ގްރާންޓްސް، ކޮންޓްރިބިއުޝަން އަދި ސަބްސިޑީޒްގެ ގޮތުގައި 155.2 މިލިއަން ރުފިޔާ ވަނީ ޚަރަދުކޮށްފައެވެ.
