ކަސްޓަމްސްއިން ގިނަ އަދަދެއްގެ ބަނގުރާ، ބަނގުއާވި އަދި އޫރުމަސް ނައްތާލައިފި
ނައްތާލާފައިވަނީ 489.16 ލީޓަރުގެ ބަނގުރާ، 9922.11 ލީޓަރުގެ ބަނގުއާވި
ގިނަ ބާވަތްތަކެއްގެ ތަކެތި ނައްތާލުމުގެ ތެރެއިން،
ކަސްޓަމްސްގެ ބެލުމުގެ ދަށުގައި ހުރި ގިނަ ބާވަތްތަކެއްގެ ތަކެތި ނައްތާލައިފިއެވެ.
މި ތަކެތި ނައްތާލާފައިވަނީ 14 އޮގަސްޓްވީ ހޮނިހިރު ދުވަހު ކ. ތިލަފުށީ ކުނި ނައްތާލާ ސަރަހައްދުގައި ކަސްޓަމްސް އޮފިސަރުންނާއި މީޑިއާގެ ހާޒިރުގައެވެ. ނައްތާލެވުނު ތަކެތީގެ ތެރޭގައި ބަނގުރާ، ބަނގުއާވި އަދި އޫރުމަސް ހިމެނެއެވެ.
ނައްތާލާފައިވަނީ 489.16 ލީޓަރުގެ ބަނގުރާ، 9922.11 ލީޓަރުގެ ބަނގުއާވި، އަދި 1264.68 ކިލޯގްރާމްގެ އޫރުމަހެވެ.
ކަސްޓަމްސްއިން ބުނީ މި ތަކެއްޗަކީ ކަސްޓަމްސްގެ އާންމު ގަވާއިދުގެ 269 ވަނަ މާއްދާގެ ދަށުން ބޮންޑެޑް ވެއަރހައުސްގައި ހުންނަ މުދާ ހަލާކުވުމުން ނުވަތަ މުއްދަތު ހަމަވުމުން ނުވަތަ މިނޫން ވެސް ސަބަބަކާހުރެ ނައްތާލުމުގައި އަމަލުކުރާ އުސޫލުގެ ދަށުން ނައްތާލެވުނު ތަކެތި ކަމަށެވެ. އެކިއެކި ސަބަބުތަކާހުރެ ކަސްޓަމްސްގައި ހިފެހެއްޓިފައި ހުންނަ ތަކެތި ކަނޑައެޅިފައިވާ އުސޫލުގެ ދަށުން ނައްތާލެވިދާނެ ކަމަށް ކަސްޓަމްސްގެ އާންމު ގަވާއިދުގައި ބަޔާންކޮށްފައިވެއެވެ.
