ޗެލްސީ ދޫކޮށް އަބްރަހަމް ރޯމާއަށް

ޗެލްސީއަށް ކުޅެމުން އައި އިންގްލެންޑުގެ ޒުވާން ފޯވާޑް ޓެމީ އަބްރަހަމް އިޓަލީގެ ރޯމާއަށް ބަދަލުވެއްޖެއެވެ.

އުމުރުން 23 އަހަރުގެ އަބްރަހަމް ރޯމާއަށް ބަދަލުވީ 40 މިލިޔަން ޔޫރޯގެ ފީއަކަށެވެ. އޭނާ ވަނީ ރޯމާއާއެކު ފަސް އަހަރުގެ އެއްބަސްވުމެއް ހަދާފައެވެ.

ރޯމާއަށް ސޮއިކުރުމަށްފަހު އަބްރަހަމް ބުނީ އެ ޓީމަކީ ބޮޑެތި ޓްރޮފީތައް ކާމިޔާބުކުރެވޭ ފެންވަރުގެ ޓީމެއް ކަމަށެވެ. އަދި ޗެލްސީގައި އޭނާއަށް އެ މުބާރާތްތަކުގެ ތަޖުރިބާ ހޯދިފައިވާ ކަމަށާއި، އެހެންކަމުން އެ ތަޖުރިބާގެ ބޭނުންހިފައި، ރޯމާއާއެކު އެ ކާމިޔާބީތައް ހޯދަން މަސައްކަތްކުރާނެ ކަމަށްވެސް ވަނީ ބުނެފައެވެ.

އުމުރުން އެންމެ ހަތް އަހަރުގެ ޗެލްސީއާ ގުޅުނު އަބްރަހަމް އެ ޓީމު ދޫކޮށްލިއިރު، މީގެ ކުރިން އޭނާ ވަނީ ލޯނު އުސޫލުން ބްރިސްޓަލް ސިޓީ އާއި، ސްވަންސީ ސިޓީ އަދި އެސްޓަން ވިލާއަށްވެސް ކުޅެފައެވެ. އަދި ޗެލްސީގައި ހޭދަކުރި މުއްދަތުގައި އޭނާ ވަނީ އެ ޓީމަށް 82 މެޗު ކުޅެދީ 30 ލަނޑު ޖަހާފައެވެ. މީގެ އިތުރުން އަބްރަހަމް ވަނީ ޗެލްސީއާއެކު މިދިޔަ ސީޒަނުގެ ޔުއެފާ ޗެމްޕިއަންސް ލީގާއި ޔުއެފާ ސުޕަ ކަޕުވެސް ކާމިޔާބުކޮށްފައެވެ.

އިންގްލެންޑުގެ ގައުމީ ފުޓްބޯޅަ ޓީމުން އަބްރަހަމް ޖާގަ ހޯދާފައިވަނީ 2019 ވަނަ އަހަރުގެ ތެރޭގައެވެ. އޭގެ ފަހުން މިހާތަނަށް އިންގްލެންޑުގެ ގައުމީ ޓީމަށް އަބްރަހަމް ހަ މެޗު ކުޅެދީފައިވާއިރު، އޭނާ ވަނީ އެއް ލަނޑު ކާމިޔާބުކޮށްފައެވެ.

ރޯމާއިން އަބްރަހަމުގެ ސޮއި ހޯދިއިރު، އެ ޓީމު ކުޅެމުން އައި ބޮސްނިއާގެ ފޯވާޑް އެޑިން ޒެކޯ ދާދި ފަހުން ވަނީ އިޓަލީގެ ޗެމްޕިއަން އިންޓަ މިލާނަށް ބަދަލުވެފައެވެ. މި ސީޒަނަށް ރޯމާ ނުކުންނާނީ ޗެލްސީގެ ކުރީގެ ކޯޗު ޖޯސޭ މޮރީނިއޯގެ އިރުޝާދުގެ ދަށުންނެވެ.