އުކުޅަހުގައި ބަނދަރެއް އޮތުން، ލޯކަލް ޓުއަރިޒަމަށް މުހިންމު: ކައުންސިލްގެ ރައީސް

އުކުޅަހަކީ ލޯކަލް ޓުއަރިޒަމް ވަރަށް ބޮޑަށް ކުރިއަރާފައިވާ ރަށަކަށްވާތީ އެރަށުގައި ބޮޑު ބަނދަރެއް އޮތުން ވަރަަށް މުހިންމު ކަމަށް އުކުޅަހު ކައުންސިލްގެ ރައީސް ޝައުކަތު އިބްރާހީމް ވިދާޅުވެއްޖެއެވެ.

އެމްޓީސީސީން އުކުޅަހުގައި ކުރިއަަށްގެންދާ މަސައްކަތްތައް ބަލާލުމަށް އެމްޓީސީސީން އުކުޅަހަށް ކުރި ދަތުރުގައި މީޑިއާތަކަށް މައުލޫމާތުދެއްވަމުން އުކުޅަހު ކައުންސިލްގެ ރައީސް ޝައުކަތު އިބްރާހީމް ވިދާޅުވީ, އުކުޅަހަކީ ލޯކަލް ޓުއަރިޒަމްގެ ރަށަކަށް ވާއިރު ބަނދަރުގެ ސަބަބުން ލަފައި ފުރުމަށް ދަތިތަކެެއް ދިމާވާ ކަމަށެވެ. އަދި އާންމުންނަަށްވެސް މިކަމުގެ ދަތިތައް ދިމާވާ ކަމަށާއި, ބަނދަރެއް ތަރަައްގީކުރުމާއެކު މިފަދަ މައްސަލަތަކަށް ހައްލު ލިބިގެންދާނެ ކަމަަށް ޝައުކަތު ވިދާޅުވިއެވެ.

އުކުޅަހަކީ 1200 މީހުންގެ އާބާދީއެއް އޮންނަ ރަށަކަށް ވެފައި އެރަށުގެ އާބާދީ އިތުރުވަމުން އަންނަވަރަކަށް, ގެދޮރު އިމާރާތްކުުރުމަށް ބިން ބޭނުންވާނެތީ ރަށުގެ ބިން އިތުރަށް ހިއްކަން ޖެހިފައިވާކަމަށް ޝައުކަތު ވިދާޅުވިއެވެ.

މީގެ އިތުރުން މީޑިއާތަކަށް މައުލޫމާތުދެއްވަމުން އެމްޓީސީސީގެ ސީއީއޯ އާދަމް އާޒިމް ވިދާޅުވީ އއ. އުކުޅަހު ބަނދަރު ތަރައްގީކުރުމުގެ މަސައްކަތް ދެ މަހެއްހާ ދުވަސްތެރޭގައި ނިންމާލެވޭނެ ކަމަށެވެ. އަދި ބަނދަރު ތަރައްގީކުރުމާއި ބިން ހިއްކުމުގެ މަސައްކަތުގެ 60 އިންސައްތަ މިހާރު ނިމިފައިވާ ކަމަށެވެ. އަދި މިއަހަރުގެ ފަހުކޮޅު މި މަސައްކަތް އެއްކޮށް ނިންމާލެވޭނެ ކަމަށާއި, ބިން ހިއްކުމުގެ މަސައްކަތް އަންނަ އަހަރުގެ މެދުތެރޭގައި ފެށޭވަރު ވާނެ ކަމަށެވެ. މި މަސައްކަތް ފެށުމަށް ވާންޖެހޭ ތައްޔާރީތައް މިހާރު ވަމުންދާކަމަށްވެސް އާޒިމް ވަނީ ވިދާޅުވެފައެވެ.

އުކުޅަހު ބަނދަރު ތަރައްގީކުރުމުގެ މަސައްކަތް އެމްޓީސީސީން ކުރަމުންދާއިރު، އެމްޓީސީސީން ކުރަނީ އެއްގަމު ތޮށި ލުމާއި ޖެޓީ ހެދުމުގެ މަސައްކަތެވެ. މި މަސައްކަތުގެ ދަށުން 19،630 ކިއުބިކް މީޓަރުގެ ސަރަހައްދެއްގެ ބަނދަރު ފުންކުރުމާއި، 31 މީޓަރުގެ ސަރަހައްދެއްގައި ބޭރުތޮށި ލުމާއި، 136 މީޓަރުގެ ސަރަހައްދެއްފައި އެއްގަމުތޮށި ލުމާއި، 138.73 މީޓަރުގެ ޖެޓީއެއް ހެދުމާއި، 580 އަކަ މީޓަރުގެ ސަރަހައްދެއްގައި ޕޭވްމެންޓް ހެދުމުގެ މަސައްކަތެވެ. މި މަޝްރޫއަކީ 19.92 މިލިއަން ރުފިޔާގެ މަޝްރޫއެކެވެ.

މީގެ އިތުރުން ބިން ހިއްކުމާއި ގޮނޑުދޮށް ހިމާޔަތްކުރުމުގެ މަސައްކަތުގެ ދަށުން 10 ހެކްޓަރުގެ ބިން ހިއްކުމާއި، 1054 މީޓަރުގެ ސަރަހައްދެއްގައި ބޮޑުހިލައިގެ ރިވެޓްމެންޓް ޖެހުމާއި، 80 މީޓަރުގެ ސަރަހައްދެއްގައި ގްރޮއިންސް ޖެހުމުގެ މަސައްކަތް އެމްޓީސީސީއާ ވަނީ ހަވާލުކޮށްފައެވެ. މި މަޝްރޫއަކީ 71.25 މިލިއަން ރުފިޔާގެ މަޝްރޫއެކެވެ.